၁၅. ဝတ္ထုနာနတ္တဉာဏနိဒ္ဒေသဝဏ္ဏနာ

၆၆. ဝတ္ထုနာနတ္တဉာဏနိဒ္ဒေသေ စက္ခုံ အဇ္ဈတ္တံ ဝဝတ္ထေတီတိ အဇ္ဈတ္တဘူတံ စက္ခုံ ဝဝတ္ထပေတိ. ယထာ သော စက္ခုံ ဝဝတ္ထပေတိ၊ တထာ ဝတ္တုကာမော ကထံ စက္ခုံ အဇ္ဈတ္တံ ဝဝတ္ထေတီတိ ပုစ္ဆိတွာ ပုန စက္ခု အဝိဇ္ဇာသမ္ဘူတန္တိ ဝဝတ္ထေတီတိအာဒိနာ ဝဝတ္ထာပနာကာရံ ဒဿေတိ. တတ္ထ အဝိဇ္ဇာတဏှာ အတီတာ ဥပတ္ထမ္ဘကဟေတုယော၊ ကမ္မံ အတီတံ ဇနကဟေတု၊ အာဟာရော ဣဒါနိ ဥပတ္ထမ္ဘကဟေတု. ဧတေန စက္ခူပတ္ထမ္ဘကာနိ ဥတုစိတ္တာနိ ဂဟိတာနေဝ ဟောန္တိ. စတုန္နံ မဟာဘူတာနံ ဥပါဒါယာတိ ဥပယောဂတ္ထေ သာမိဝစနံ၊ စတ္တာရိ မဟာဘူတာနိ ဥပါဒိယိတွာ ပဝတ္တန္တိ အတ္ထော. ဧတေန ပသာဒစက္ခုဘာဝေါ ဒဿိတော ဟောတိ၊ သသမ္ဘာရဘာဝေါ ပဋိက္ခိတ္တော. ဥပ္ပန္နန္တိ အဒ္ဓါဝသေန၊ သန္တတိခဏဝသေန ဝါ ပစ္စုပ္ပန္နံ. သမုဒါဂတန္တိ ဟေတုတော သမုဋ္ဌိတံ. ဧတ္တာဝတာ ဝိပဿနာပုဗ္ဗဘာဂေ စက္ခုဝဝတ္ထာနံ ဒဿိတံ. အဟုတွာ သမ္ဘူတန္တိအာဒီဟိ အနိစ္စာနုပဿနာ. ပုဗ္ဗေ ဥဒယာ အဝိဇ္ဇမာနတော အဟုတွာ သမ္ဘူတံ၊ ဥဒ္ဓံ ဝယာ အဘာဝတော ဟုတွာ န ဘဝိဿတိ. အန္တဝန္တတောတိ အန္တော အဿ အတ္ထီတိ အန္တဝါ၊ အန္တဝါ ဧဝ အန္တဝန္တော ယထာ ‘‘သတိမန္တော၊ ဂတိမန္တော၊ ဓိတိမန္တော စ ယော ဣသီ’’တိ (ထေရဂါ. ၁၀၅၂). တတော အန္တဝန္တတော၊ ဘင်္ဂဝိဇ္ဇမာနတောတိ အတ္ထော. အဒ္ဓုဝန္တိ သဗ္ဗာဝတ္ထာနိပါတိတာယ၊ ထိရဘာဝဿ စ အဘာဝတာယ န ထိရံ. အသဿတန္တိ န နိစ္စံ. ဝိပရိဏာမဓမ္မန္တိ ဇရာယ စေဝ မရဏေန စာတိ ဒွေဓာ ဝိပရိဏာမပကတိကံ. စက္ခု အနိစ္စန္တိအာဒီနိ စက္ခုံ အနိစ္စတောတိအာဒီနိ စ ဝုတ္တတ္ထာနိ. မနောတိ ဣဓ ဘဝင်္ဂမနဿ အဓိပ္ပေတတ္တာ အဝိဇ္ဇာသမ္ဘူတောတိအာဒိ ယုဇ္ဇတိယေဝ. အာဟာရသမ္ဘူတောတိ ဧတ္ထ သမ္ပယုတ္တဖဿာဟာရမနောသဉ္စေတနာဟာရဝသေန ဝေဒိတဗ္ဗံ. ဥပ္ပန္နောတိ စ အဒ္ဓါသန္တတိဝသေန.

ဝတ္ထုနာနတ္တဉာဏနိဒ္ဒေသဝဏ္ဏနာ နိဋ္ဌိတာ.