၇. သာရိပုတ္တတ္ထေရဝတ္ထု

န ဗြာဟ္မဏဿာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော သာရိပုတ္တတ္ထေရံ အာရဗ္ဘ ကထေသိ.

ဧကသ္မိံ ကိရ ဌာနေ သမ္ဗဟုလာ မနုဿာ ‘‘အဟော အမှာကံ၊ အယျော၊ ခန္တိဗလေန သမန္နာဂတော၊ အညေသု အက္ကောသန္တေသု ဝါ ပဟရန္တေသု ဝါ ကောပမတ္တမ္ပိ နတ္ထီ’’တိ ထေရဿ ဂုဏေ ကထယိံသု. အထေကော မိစ္ဆာဒိဋ္ဌိကော ဗြာဟ္မဏော ‘‘ကော ဧသ န ကုဇ္ဈတီ’’တိ ပုစ္ဆိ. ‘‘အမှာကံ ထေရော’’တိ. ‘‘နံ ကုဇ္ဈာပေန္တော န ဘဝိဿတီ’’တိ? ‘‘နတ္ထေတံ၊ ဗြာဟ္မဏာ’’တိ. ‘‘တေန ဟိ အဟံ နံ ကုဇ္ဈာပေဿာမီ’’တိ? ‘‘သစေ သက္ကောသိ၊ ကုဇ္ဈာပေဟီ’’တိ. သော ‘‘ဟောတု၊ ဇာနိဿာမိဿ ကတ္တဗ္ဗ’’န္တိ ထေရံ ဘိက္ခာယ ပဝိဋ္ဌံ ဒိသွာ ပစ္ဆာဘာဂေန ဂန္တွာ ပိဋ္ဌိမဇ္ဈေ မဟန္တံ ပါဏိပ္ပဟာရမဒါသိ. ထေရော ‘‘ကိံ နာမေတ’’န္တိ အနောလောကေတွာဝ ဂတော. ဗြာဟ္မဏဿ သကလသရီရေ ဍာဟော ဥပ္ပဇ္ဇိ. သော ‘‘အဟော ဂုဏသမ္ပန္နော၊ အယျော’’တိ ထေရဿ ပါဒမူလေ နိပဇ္ဇိတွာ ‘‘ခမထ မေ၊ ဘန္တေ’’တိ ဝတွာ ‘‘ကိံ ဧတ’’န္တိ စ ဝုတ္တေ ‘‘အဟံ ဝီမံသနတ္ထာယ တုမှေ ပဟရိ’’န္တိ အာဟ. ‘‘ဟောတု ခမာမိ တေ’’တိ. ‘‘သစေ မေ၊ ဘန္တေ၊ ခမထ၊ မမ ဂေဟေယေဝ နိသီဒိတွာ ဘိက္ခံ ဂဏှထာ’’တိ ထေရဿ ပတ္တံ ဂဏှိ၊ ထေရောပိ ပတ္တံ အဒါသိ. ဗြာဟ္မဏော ထေရံ ဂေဟံ နေတွာ ပရိဝိသိ.

မနုဿာ ကုဇ္ဈိတွာ ‘‘ဣမိနာ အမှာကံ နိရပရာဓော အယျော ပဟဋော၊ ဒဏ္ဍေနပိဿ မောက္ခော နတ္ထိ၊ ဧတ္ထေဝ နံ မာရေဿာမာ’’တိ လေဍ္ဍုဒဏ္ဍာဒိဟတ္ထာ ဗြာဟ္မဏဿ ဂေဟဒွါရေ အဋ္ဌံသု. ထေရော ဥဋ္ဌာယ ဂစ္ဆန္တော ဗြာဟ္မဏဿ ဟတ္ထေ ပတ္တံ အဒါသိ. မနုဿာ တံ ထေရေန သဒ္ဓိံ ဂစ္ဆန္တံ ဒိသွာ၊ ‘‘ဘန္တေ၊ တုမှာကံ ပတ္တံ ဂဟေတွာ ဗြာဟ္မဏံ နိဝတ္တေထာ’’တိ အာဟံသု. ကိံ ဧတံ ဥပါသကာတိ? ဗြာဟ္မဏေန တုမှေ ပဟဋာ၊ မယမဿ ကတ္တဗ္ဗံ ဇာနိဿာမာတိ. ကိံ ပန တုမှေ ဣမိနာ ပဟဋာ၊ ဥဒါဟု အဟန္တိ? တုမှေ၊ ဘန္တေတိ. ‘‘မံ ဧသ ပဟရိတွာ ခမာပေသိ၊ ဂစ္ဆထ တုမှေ’’တိ မနုဿေ ဥယျောဇေတွာ ဗြာဟ္မဏံ နိဝတ္တာပေတွာ ထေရော ဝိဟာရမေဝ ဂတော. ဘိက္ခူ ဥဇ္ဈာယိံသု ‘‘ကိံ နာမေတံ သာရိပုတ္တတ္ထေရော ယေန ဗြာဟ္မဏေန ပဟဋော၊ တဿေဝ ဂေဟေ နိသီဒိတွာ ဘိက္ခံ ဂဟေတွာ အာဂတော. ထေရဿ ပဟဋကာလတော ပဋ္ဌာယ ဣဒါနိ သော ကဿ လဇ္ဇိဿတိ၊ အဝသေသေ ပေါထေန္တော ဝိစရိဿတီ’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ၊ ‘‘ဘိက္ခဝေ၊ ဗြာဟ္မဏော ဗြာဟ္မဏံ ပဟရန္တော နာမ နတ္ထိ၊ ဂိဟိဗြာဟ္မဏေန ပန သမဏဗြာဟ္မဏော ပဟဋော ဘဝိဿတိ၊ ကောဓော နာမေသ အနာဂါမိမဂ္ဂေန သမုဂ္ဃါတံ ဂစ္ဆတီ’’တိ ဝတွာ ဓမ္မံ ဒေသေန္တော ဣမာ ဂါထာ အဘာသိ –

၃၈၉. ‘‘န ဗြာဟ္မဏဿ ပဟရေယျ၊ နာဿ မုဉ္စေထ ဗြာဟ္မဏော၊

ဓီ ဗြာဟ္မဏဿ ဟန္တာရံ၊ တတော ဓီ ယဿ မုဉ္စတိ.

၃၉၀. ‘‘န ဗြာဟ္မဏဿေတဒကိဉ္စိ သေယျော၊ ယဒါ နိသေဓော မနသော ပိယေဟိ၊

ယတော ယတော ဟိံသမနော နိဝတ္တတိ၊ တတော တတော သမ္မတိမေဝ ဒုက္ခ’’န္တိ.

တတ္ထ ပဟရေယျာတိ ‘‘ခီဏာသဝဗြာဟ္မဏောဟမသ္မီ’’တိ ဇာနန္တော ခီဏာသဝဿ ဝါ အညတရဿ ဝါ ဇာတိဗြာဟ္မဏဿ န ပဟရေယျ. နာဿ မုဉ္စေထာတိ သောပိ ပဟဋော ခီဏာသဝဗြာဟ္မဏော အဿ ပဟရိတွာ ဌိတဿ ဝေရံ န မုဉ္စေထ၊ တသ္မိံ ကောပံ န ကရေယျာတိ အတ္ထော. ဓီ ဗြာဟ္မဏဿာတိ ခီဏာသဝဗြာဟ္မဏဿ ဟန္တာရံ ဂရဟာမိ. တတော ဓီတိ ယော ပန တံ ပဟရန္တံ ပဋိပဟရန္တော တဿ ဥပရိ ဝေရံ မုဉ္စတိ၊ တံ တတောပိ ဂရဟာမိယေဝ.

ဧတဒကိဉ္စိ သေယျောတိ ယံ ခီဏာသဝဿ အက္ကောသန္တံ ဝါ အပစ္စက္ကောသနံ၊ ပဟရန္တံ ဝါ အပ္ပဋိပဟရဏံ၊ ဧတံ တဿ ခီဏာသဝဗြာဟ္မဏဿ န ကိဉ္စိ သေယျော၊ အပ္ပမတ္တကံ သေယျော န ဟောတိ၊ အဓိမတ္တမေဝ သေယျောတိ အတ္ထော. ယဒါ နိသေဓော မနသော ပိယေဟီတိ ကောဓနဿ ဟိ ကောဓုပ္ပါဒေါဝ မနသော ပိယော နာမ. ကောဓော ဟိ ပနေသ မာတာပိတူသုပိ ဗုဒ္ဓါဒီသုပိ အပရဇ္ဈတိ. တသ္မာ ယော အဿ တေဟိ မနသော နိသေဓော ကောဓဝသေန ဥပ္ပဇ္ဇမာနဿ စိတ္တဿ နိဂ္ဂဟော၊ ဧတံ န ကိဉ္စိ သေယျောတိ အတ္ထော. ဟိံသမနောတိ ကောဓမနော. သော တဿ ယတော ယတော ဝတ္ထုတော အနာဂါမိမဂ္ဂေန သမုဂ္ဃါတံ ဂစ္ဆန္တော နိဝတ္တတိ. တတော တတောတိ တတော တတော ဝတ္ထုတော သကလမ္ပိ ဝဋ္ဋဒုက္ခံ နိဝတ္တတိယေဝါတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

သာရိပုတ္တတ္ထေရဝတ္ထု သတ္တမံ.