၄၀. ဒေဝဟိတဗြာဟ္မဏဝတ္ထု

ပုဗ္ဗေနိဝါသန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဒေဝဟိတဗြာဟ္မဏဿ ပဉှံ အာရဗ္ဘ ကထေသိ.

ဧကသ္မိဉှိ သမယေ ဘဂဝါ ဝါတရောဂေန အာဗာဓိကော ဟုတွာ ဥပဝါဏတ္ထေရံ ဥဏှောဒကတ္ထာယ ဒေဝဟိတဗြာဟ္မဏဿ သန္တိကံ ပဟိဏိ. သော ဂန္တွာ သတ္ထု အာဗာဓိကဘာဝံ အာစိက္ခိတွာ ဥဏှောဒကံ ယာစိ၊ တံ သုတွာ ဗြာဟ္မဏော တုဋ္ဌမာနသော ဟုတွာ ‘‘လာဘာ ဝတ မေ၊ ယံ မမ သန္တိကံ သမ္မာသမ္ဗုဒ္ဓေါ ဥဏှောဒကဿတ္ထာယ သာဝကံ ပဟိဏီ’’တိ ဥဏှောဒကဿ ကာဇံ ပုရိသေန ဂါဟာပေတွာ ဖာဏိတဿ စ ပုဋံ ဥပဝါဏတ္ထေရဿ ပါဒါသိ. ထေရော တံ ဂါဟာပေတွာ ဝိဟာရံ ဂန္တွာ သတ္ထာရံ ဥဏှောဒကေန နှာပေတွာ ဥဏှောဒကေန ဖာဏိတံ အာလောဠေတွာ ဘဂဝတော ပါဒါသိ၊ တဿ တင်္ခဏေယေဝ သော အာဗာဓော ပဋိပဿမ္ဘိ. ဗြာဟ္မဏော စိန္တေသိ – ‘‘ကဿ နု ခေါ ဒေယျဓမ္မော ဒိန္နော မဟပ္ဖလော ဟောတိ၊ သတ္ထာရံ ပုစ္ဆိဿာမီ’’တိ သော သတ္ထု သန္တိကံ ဂန္တွာ တမတ္ထံ ပုစ္ဆန္တော ဣမံ ဂါထမာဟ –

‘‘ကတ္ထ ဒဇ္ဇာ ဒေယျဓမ္မံ၊ ကတ္ထ ဒိန္နံ မဟပ္ဖလံ၊

ကထဉှိ ယဇမာနဿ၊ ကထံ ဣဇ္ဈတိ ဒက္ခိဏာ’’တိ. (သံ. နိ. ၁.၁၉၉)၊

အထဿ သတ္ထာ ‘‘ဧဝရူပဿ ဗြာဟ္မဏဿ ဒိန္နံ မဟပ္ဖလံ ဟောတီ’’တိ ဝတွာ ဗြာဟ္မဏံ ပကာသေန္တော ဣမံ ဂါထမာဟ –

၄၂၃. ‘‘ပုဗ္ဗေနိဝါသံ ယော ဝေဒိ၊ သဂ္ဂါပါယဉ္စ ပဿတိ၊

အထော ဇာတိက္ခယံ ပတ္တော၊ အဘိညာဝေါသိတော မုနိ၊ (သံ. နိ. ၁.၁၉၉)၊

သဗ္ဗဝေါသိတဝေါသာနံ၊ တမဟံ ဗြူမိ ဗြာဟ္မဏ’’န္တိ.

တဿတ္ထော – ယော ပုဗ္ဗေနိဝါသံ ပါကဋံ ကတွာ ဇာနာတိ၊ ဆဗ္ဗီသတိဒေဝလောကဘေဒံ သဂ္ဂဉ္စ စတုဗ္ဗိဓံ အပါယဉ္စ ဒိဗ္ဗစက္ခုနာ ပဿတိ၊ အထော ဇာတိက္ခယသင်္ခါတံ အရဟတ္တံ ပတ္တော၊ အဘိညေယျံ ဓမ္မံ အဘိဇာနိတွာ ပရိညေယျံ ပရိဇာနိတွာ ပဟာတဗ္ဗံ ပဟာယ သစ္ဆိကာတဗ္ဗံ သစ္ဆိကတွာ ဝေါသိကော နိဋ္ဌာနံ ပတ္တော၊ ဝုသိတဝေါသာနံ ဝါ ပတ္တော၊ အာသဝက္ခယပညာယ မောနဘာဝံ ပတ္တတ္တာ မုနိ၊ တမဟံ သဗ္ဗေသံ ကိလေသာနံ ဝေါသာနံ အရဟတ္တမဂ္ဂဉာဏံ ဗြဟ္မစရိယဝါသံ ဝုတ္ထဘာဝေန သဗ္ဗဝေါသိတဝေါသာနံ ဗြာဟ္မဏံ ဝဒါမီတိ.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသု. ဗြာဟ္မဏောပိ ပသန္နမာနသော သရဏေသု ပတိဋ္ဌာယ ဥပါသကတ္တံ ပဝေဒေသီတိ.

ဒေဝဟိတဗြာဟ္မဏဝတ္ထု စတ္တာလီသံ.

ဗြာဟ္မဏဝဂ္ဂဝဏ္ဏနာ နိဋ္ဌိတာ.

ဆဗ္ဗီသတိမော ဝဂ္ဂေါ.

နိဂမနကထာ

ဧတ္တာဝတာ သဗ္ဗပဌမေ ယမကဝဂ္ဂေ စုဒ္ဒသ ဝတ္ထူနိ၊ အပ္ပမာဒဝဂ္ဂေ နဝ၊ စိတ္တဝဂ္ဂေ နဝ၊ ပုပ္ဖဝဂ္ဂေ ဒွါဒသ၊ ဗာလဝဂ္ဂေ ပန္နရသ၊ ပဏ္ဍိတဝဂ္ဂေ ဧကာဒသ၊ အရဟန္တဝဂ္ဂေ ဒသ၊ သဟဿဝဂ္ဂေ စုဒ္ဒသ၊ ပါပဝဂ္ဂေ ဒွါဒသ၊ ဒဏ္ဍဝဂ္ဂေ ဧကာဒသ၊ ဇရာဝဂ္ဂေ နဝ၊ အတ္တဝဂ္ဂေ ဒသ၊ လောကဝဂ္ဂေ ဧကာဒသ၊ ဗုဒ္ဓဝဂ္ဂေ နဝ၊ သုခဝဂ္ဂေ အဋ္ဌ၊ ပိယဝဂ္ဂေ နဝ၊ ကောဓဝဂ္ဂေ အဋ္ဌ၊ မလဝဂ္ဂေ ဒွါဒသ၊ ဓမ္မဋ္ဌဝဂ္ဂေ ဒသ၊ မဂ္ဂဝဂ္ဂေ ဒွါဒသ၊ ပကိဏ္ဏကဝဂ္ဂေ နဝ၊ နိရယဝဂ္ဂေ နဝ၊ နာဂဝဂ္ဂေ အဋ္ဌ၊ တဏှာဝဂ္ဂေ ဒွါဒသ၊ ဘိက္ခုဝဂ္ဂေ ဒွါဒသ၊ ဗြာဟ္မဏဝဂ္ဂေ စတ္တာလီသာတိ ပဉ္စာဓိကာနိ တီဏိ ဝတ္ထုသတာနိ ပကာသေတွာ နာတိသင်္ခေပနာတိဝိတ္ထာရဝသေန ဥပရစိတာ ဒွါသတ္တတိဘာဏဝါရပမာဏာ ဓမ္မပဒဿ အတ္ထဝဏ္ဏနာ နိဋ္ဌိတာတိ.

ပတ္တံ ဓမ္မပဒံ ယေန၊ ဓမ္မရာဇေနနုတ္တရံ၊

ဂါထာ ဓမ္မပဒေ တေန၊ ဘာသိတာ ယာ မဟေသိနာ.

သတေဝီသာ စတုဿတာ၊ စတုသစ္စဝိဘာဝိနာ၊

သတတ္တယဉှိ ဝတ္ထူနံ၊ ပဉ္စာဓိကာ သမုဋ္ဌိတာ.

ဝိဟာရေ အဓိရာဇေန၊ ကာရိတမှိ ကတညုနာ၊

ပါသာဒေ သိရိကူဋဿ၊ ရညော ဝိဟရတာ မယာ.

အတ္ထဗျဉ္ဇနသမ္ပန္နံ၊ အတ္ထာယ စ ဟိတာယ စ၊

လောကဿ လောကနာထဿ၊ သဒ္ဓမ္မဋ္ဌိတိကမျတာ.

တာသံ အဋ္ဌကထံ ဧတံ၊ ကရောန္တေန သုနိမ္မလံ၊

ဒွါသတ္တတိပမာဏာယ၊ ဘာဏဝါရေဟိ ပါဠိယာ.

ယံ ပတ္တံ ကုသလံ တေန၊ ကုသလာ သဗ္ဗပါဏိနံ၊

သဗ္ဗေ ဣဇ္ဈန္တု သင်္ကပ္ပါ၊ လဘန္တု မဓုရံ ဖလန္တိ.

ပရမဝိသုဒ္ဓသဒ္ဓါဗုဒ္ဓိဝီရိယပဋိမဏ္ဍိတေန သီလာစာရဇ္ဇဝမဒ္ဒဝါဒိဂုဏသမုဒယသမုဒိတေန သကသမယသမယန္တရဂဟနဇ္ဈောဂါဟဏသမတ္ထေန ပညာဝေယျတ္တိယသမန္နာဂတေန တိပိဋကပရိယတ္တိပ္ပဘေဒေ သာဋ္ဌကထေ သတ္ထုသာသနေ အပ္ပဋိဟတဉာဏပ္ပဘာဝေန မဟာဝေယျာကရဏေန ကရဏသမ္ပတ္တိဇနိတသုခဝိနိဂ္ဂတမဓုရောဒါရဝစနလာဝဏ္ဏယုတ္တေန ယုတ္တမုတ္တဝါဒိနာ ဝါဒီဝရေန မဟာကဝိနာ ပဘိန္နပဋိသမ္ဘိဒါပရိဝါရေ ဆဠဘိညာပဋိသမ္ဘိဒါဒိပ္ပဘေဒဂုဏပဋိမဏ္ဍိတေ ဥတ္တရိမနုဿဓမ္မေ သုပ္ပတိဋ္ဌိတဗုဒ္ဓီနံ ထေရဝံသပ္ပဒီပါနံ ထေရာနံ မဟာဝိဟာရဝါသီနံ ဝံသာလင်္ကာရဘူတေန ဝိပုလဝိသုဒ္ဓဗုဒ္ဓိနာ ဗုဒ္ဓဃောသောတိ ဂရူဟိ ဂဟိတနာမဓေယျေန ထေရေန ကတာယံ ဓမ္မပဒဋ္ဌကထာ –

တာဝ တိဋ္ဌတု လောကသ္မိံ၊ လောကနိတ္ထရဏေသိနံ၊

ဒဿေန္တီ ကုလပုတ္တာနံ၊ နယံ သဒ္ဓါဒိဗုဒ္ဓိယာ.

ယာဝ ဗုဒ္ဓေါတိ နာမမ္ပိ၊ သုဒ္ဓစိတ္တဿ တာဒိနော၊

လောကမှိ လောကဇေဋ္ဌဿ၊ ပဝတ္တတိ မဟေသိနောတိ.

ဣတိ တေဝီသာဓိကစတုသတဂါထာပဉ္စာဓိကတိသတဝတ္ထုပဋိမဏ္ဍိတာ

ဆဗ္ဗီသတိဝဂ္ဂသမန္နာဂတာ ဓမ္မပဒဝဏ္ဏနာ သမတ္တာ.

ဓမ္မပဒ-အဋ္ဌကထာ သဗ္ဗာကာရေန နိဋ္ဌိတာ.