၁၇. သာရိပုတ္တတ္ထေရဝတ္ထု

အက္ကောဓနန္တိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော သာရိပုတ္တတ္ထေရံ အာရဗ္ဘ ကထေသိ.

တဒါ ကိရ ထေရော ပဉ္စဟိ ဘိက္ခုသတေဟိ သဒ္ဓိံ ပိဏ္ဍာယ စရန္တော နာလကဂါမေ မာတု ဃရဒွါရံ အဂမာသိ. အထ နံ သာ နိသီဒါပေတွာ ပရိဝိသမာနာ အက္ကောသိ – ‘‘အမ္ဘော၊ ဥစ္ဆိဋ္ဌခါဒက ဥစ္ဆိဋ္ဌကဉ္ဇိယံ အလဘိတွာ ပရဃရေသု ဥဠုင်္ကပိဋ္ဌေန ဃဋ္ဋိတကဉ္ဇိယံ ပရိဘုဉ္ဇိတုံ အသီတိကောဋိဓနံ ပဟာယ ပဗ္ဗဇိတောသိ၊ နာသိတမှာ တယာ၊ ဘုဉ္ဇာဟိ ဒါနီ’’တိ. ဘိက္ခူနမ္ပိ ဘတ္တံ ဒဒမာနာ ‘‘တုမှေဟိ မမ ပုတ္တော အတ္တနော စူဠုပဋ္ဌာကော ကတော၊ ဣဒါနိ ဘုဉ္ဇထာ’’တိ ဝဒေတိ. ထေရော ဘိက္ခံ ဂဟေတွာ ဝိဟာရမေဝ အဂမာသိ. အထာယသ္မာ ရာဟုလော သတ္ထာရံ ပိဏ္ဍပါတေန အာပုစ္ဆိ. အထ နံ သတ္ထာ အာဟ – ‘‘ရာဟုလ၊ ကဟံ ဂမိတ္ထာ’’တိ? ‘‘အယျိကာယ ဂါမံ၊ ဘန္တေ’’တိ. ‘‘ကိံ ပန တေ အယျိကာယ ဥပဇ္ဈာယော ဝုတ္တော’’တိ? ‘‘အယျိကာယ မေ၊ ဘန္တေ၊ ဥပဇ္ဈာယော အက္ကုဋ္ဌော’’တိ. ‘‘ကိန္တိ ဝတွာ’’တိ? ‘‘ဣဒံ နာမ၊ ဘန္တေ’’တိ. ‘‘ဥပဇ္ဈာယေန ပန တေ ကိံ ဝုတ္တ’’န္တိ? ‘‘န ကိဉ္စိ၊ ဘန္တေ’’တိ. တံ သုတွာ ဘိက္ခူ ဓမ္မသဘာယံ ကထံ သမုဋ္ဌာပေသုံ၊ ‘‘အာဝုသော၊ အစ္ဆရိယာ ဝတ သာရိပုတ္တတ္ထေရဿ ဂုဏာ၊ ဧဝံနာမဿ မာတရိ အက္ကောသန္တိယာ ကောဓမတ္တမ္ပိ နာဟောသီ’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ၊ ‘‘ဘိက္ခဝေ၊ ခီဏာသဝါ နာမ အက္ကောဓနာဝ ဟောန္တီ’’တိ ဝတွာ ဣမံ ဂါထမာဟ –

၄၀၀. ‘‘အက္ကောဓနံ ဝတဝန္တံ၊ သီလဝန္တံ အနုဿဒံ၊

ဒန္တံ အန္တိမသာရီရံ၊ တမဟံ ဗြူမိ ဗြာဟ္မဏ’’န္တိ.

တတ္ထ ဝတဝန္တန္တိ ဓုတဝတေန၊ သမန္နာဂတံ စတုပါရိသုဒ္ဓိသီလေန သီလဝန္တံ၊ တဏှာဥဿဒါဘာဝေန အနုဿဒံ ၊ ဆဠိန္ဒြိယဒမနေန ဒန္တံ၊ ကောဋိယံ ဌိတေန အတ္တဘာဝေန အန္တိမသရီရံ တမဟံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

သာရိပုတ္တတ္ထေရဝတ္ထု သတ္တရသမံ.