၁၃. ဧကဗြာဟ္မဏဝတ္ထု

န စာဟန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဧကံ ဗြာဟ္မဏံ အာရဗ္ဘ ကထေသိ.

သော ကိရ ‘‘သမဏော ဂေါတမော အတ္တနော သာဝကေ ဗြာဟ္မဏာတိ ဝဒတိ အဟဉ္စမှိ ဗြာဟ္မဏယောနိယံ နိဗ္ဗတ္တော၊ မမ္ပိ နု ခေါ ဧဝံ ဝတ္တုံ ဝဋ္ဋတီ’’တိ သတ္ထာရံ ဥပသင်္ကမိတွာ တမတ္ထံ ပုစ္ဆိ. အထ နံ သတ္ထာ ‘‘နာဟံ၊ ဗြာဟ္မဏ၊ ဗြာဟ္မဏယောနိယံ နိဗ္ဗတ္တမတ္တေနေဝံ ဝဒါမိ၊ ယော ပန အကိဉ္စနော အဂဟဏော၊ တမဟံ ဗြာဟ္မဏံ ဝဒါမီ’’တိ ဝတွာ ဣမံ ဂါထမာဟ –

၃၉၆. ‘‘န စာဟံ ဗြာဟ္မဏံ ဗြူမိ၊ ယောနိဇံ မတ္တိသမ္ဘဝံ၊

ဘောဝါဒိ နာမ သော ဟောတိ၊ သစေ ဟောတိ သကိဉ္စနော၊

အကိဉ္စနံ အနာဒါနံ၊ တမဟံ ဗြူမိ ဗြာဟ္မဏ’’န္တိ.

တတ္ထ ယောနိဇန္တိ ယောနိယံ ဇာတံ. မတ္တိသမ္ဘဝန္တိ ဗြာဟ္မဏိယာ မာတု သန္တကေ ဥဒရသ္မိံ သမ္ဘူတံ. ဘောဝါဒီတိ သော ပန အာမန္တနာဒီသု ‘‘ဘော၊ ဘော’’တိ ဝတွာ ဝိစရန္တော ဘောဝါဒိ နာမ ဟောတိ၊ သစေ ရာဂါဒီဟိ ကိဉ္စနေဟိ သကိဉ္စနော. အဟံ ပန ရာဂါဒီဟိ အကိဉ္စနံ စတူဟိ ဥပါဒါနေဟိ အနာဒါနံ ဗြာဟ္မဏံ ဝဒါမီတိ အတ္ထော.

ဒေသနာဝသာနေ သော ဗြာဟ္မဏော သောတာပတ္တိဖလေ ပတိဋ္ဌဟိ၊ သမ္ပတ္တာနမ္ပိ သာတ္ထိကာ ဓမ္မဒေသနာ အဟောသီတိ.

ဧကဗြာဟ္မဏဝတ္ထု တေရသမံ.