၄. အနတ္တလက္ခဏဝတ္ထု
တတိယဂါထာယပိ ဧသေဝ နယော. ကေဝလဉှိ ဧတ္ထ ဘဂဝါ တေသံ ဘိက္ခူနံ ပုဗ္ဗေ အနတ္တလက္ခဏေ အနုယုတ္တဘာဝံ ဉတွာ၊ ‘‘ဘိက္ခဝေ၊ သဗ္ဗေပိ ခန္ဓာ အဝသဝတ္တနဋ္ဌေန အနတ္တာ ဧဝါ’’တိ ဝတွာ ဣမံ ဂါထမာဟ –
၂၇၉. ‘‘သဗ္ဗေ ဓမ္မာ အနတ္တာတိ၊ ယဒါ ပညာယ ပဿတိ၊
အထ နိဗ္ဗိန္ဒတိ ဒုက္ခေ၊ ဧသ မဂ္ဂေါ ဝိသုဒ္ဓိယာ’’တိ.
တတ္ထ သဗ္ဗေ ဓမ္မာတိ ပဉ္စက္ခန္ဓာ ဧဝ အဓိပ္ပေတာ. အနတ္တာတိ ‘‘မာ ဇီယန္တု မာ မီယန္တူ’’တိ ဝသေ ဝတ္တေတုံ န သက္ကာတိ အဝသဝတ္တနဋ္ဌေန အနတ္တာ အတ္တသုညာ အဿာမိကာ အနိဿရာတိ အတ္ထော. သေသံ ပုရိမသဒိသမေဝါတိ.
အနတ္တလက္ခဏဝတ္ထု စတုတ္ထံ.