၉. ပဉ္စဥပါသကဝတ္ထု

နတ္ထိ ရာဂသမော အဂ္ဂီတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ပဉ္စ ဥပါသကေ အာရဗ္ဘ ကထေသိ.

တေ ကိရ ဓမ္မံ သောတုကာမာ ဝိဟာရံ ဂန္တွာ သတ္ထာရံ ဝန္ဒိတွာ ဧကမန္တံ နိသီဒိံသု. ဗုဒ္ဓါနဉ္စ ‘‘အယံ ခတ္တိယော၊ အယံ ဗြာဟ္မဏော၊ အယံ အဍ္ဎော၊ အယံ ဒုဂ္ဂတော၊ ဣမဿ ဥဠာရံ ကတွာ ဓမ္မံ ဒေသေဿာမိ၊ ဣမဿ နော’’တိ စိတ္တံ န ဥပ္ပဇ္ဇတိ. ယံကိဉ္စိ အာရဗ္ဘ ဓမ္မံ ဒေသေန္တော ဓမ္မဂါရဝံ ပုရက္ခတွာ အာကာသဂင်္ဂံ ဩတာရေန္တော ဝိယ ဒေသေတိ. ဧဝံ ဒေသေန္တဿ ပန တထာဂတဿ သန္တိကေ နိသိန္နာနံ တေသံ ဧကော နိသိန္နကောဝ နိဒ္ဒါယိ၊ ဧကော အင်္ဂုလိယာ ဘူမိံ လိခန္တော နိသီဒိ၊ ဧကော ဧကံ ရုက္ခံ စာလေန္တော နိသီဒိ၊ ဧကော အာကာသံ ဥလ္လောကေန္တော နိသီဒိ၊ ဧကော ပန သက္ကစ္စံ ဓမ္မံ အဿောသိ.

အာနန္ဒတ္ထေရော သတ္ထာရံ ဗီဇယမာနော တေသံ အာကာရံ ဩလောကေန္တော သတ္ထာရံ အာဟ – ‘‘ဘန္တေ၊ တုမှေ ဣမေသံ မဟာမေဃဂဇ္ဇိတံ ဂဇ္ဇန္တာ ဝိယ ဓမ္မံ ဒေသေထ၊ ဧတေ ပန တုမှေသုပိ ဓမ္မံ ကထေန္တေသု ဣဒဉ္စိဒဉ္စ ကရောန္တာ နိသိန္နာ’’တိ. ‘‘အာနန္ဒ၊ တွံ ဧတေ န ဇာနာသီ’’တိ? ‘‘အာမ၊ န ဇာနာမိ၊ ဘန္တေ’’တိ. ဧတေသု ဟိ ယော ဧသ နိဒ္ဒါယန္တော နိသိန္နော၊ ဧသ ပဉ္စ ဇာတိသတာနိ သပ္ပယောနိယံ နိဗ္ဗတ္တိတွာ ဘောဂေသု သီသံ ဌပေတွာ နိဒ္ဒါယိ၊ ဣဒါနိပိဿ နိဒ္ဒါယ တိတ္တိ နတ္ထိ၊ နာဿ ကဏ္ဏံ မမ သဒ္ဒေါ ပဝိသတီတိ. ကိံ ပန၊ ဘန္တေ၊ ပဋိပါဋိယာ ကထေထ၊ ဥဒါဟု အန္တရန္တရာတိ. အာနန္ဒ၊ ဧတဿ ဟိ ကာလေန မနုဿတ္တံ၊ ကာလေန ဒေဝတ္တံ၊ ကာလေန နာဂတ္တန္တိ ဧဝံ အန္တရန္တရာ ဥပ္ပဇ္ဇန္တဿ ဥပပတ္တိယော သဗ္ဗညုတညာဏေနာပိ န သက္ကာ ပရိစ္ဆိန္ဒိတုံ. ပဋိပါဋိယာ ပနေသ ပဉ္စ ဇာတိသတာနိ နာဂယောနိယံ နိဗ္ဗတ္တိတွာ နိဒ္ဒါယန္တောပိ နိဒ္ဒါယ အတိတ္တောယေဝ. အင်္ဂုလိယာ ဘူမိံ လိခန္တော နိသိန္နပုရိသောပိ ပဉ္စ ဇာတိသတာနိ ဂဏ္ဍုပ္ပါဒယောနိယံ နိဗ္ဗတ္တိတွာ ဘူမိံ ခဏိ၊ ဣဒါနိပိ ဘူမိံ ခဏန္တောဝ မမ သဒ္ဒံ န သုဏာတိ. ဧသ ရုက္ခံ စာလေန္တော နိသိန္နပုရိသောပိ ပဋိပါဋိယာ ပဉ္စ ဇာတိသတာနိ မက္ကဋယောနိယံ နိဗ္ဗတ္တိ၊ ဣဒါနိပိ ပုဗ္ဗာစိဏ္ဏဝသေန ရုက္ခံ စာလေတိယေဝ၊ နာဿ ကဏ္ဏံ မမ သဒ္ဒေါ ပဝိသတိ. ဧသ အာကာသံ ဥလ္လောကေတွာ နိသိန္နပုရိသောပိ ပဉ္စ ဇာတိသတာနိ နက္ခတ္တပါဌကော ဟုတွာ နိဗ္ဗတ္တိ၊ ဣဒါနိ ပုဗ္ဗာစိဏ္ဏဝသေန အဇ္ဇာပိ အာကာသမေဝ ဥလ္လောကေတိ၊ နာဿ ကဏ္ဏံ မမ သဒ္ဒေါ ပဝိသတိ. ဧသ သက္ကစ္စံ ဓမ္မံ သုဏန္တော နိသိန္နပုရိသော ပန ပဋိပါဋိယာ ပဉ္စ ဇာတိသတာနိ တိဏ္ဏံ ဝေဒါနံ ပါရဂူ မန္တဇ္ဈာယကဗြာဟ္မဏော ဟုတွာ နိဗ္ဗတ္တိ၊ ဣဒါနိပိ မန္တံ သံသန္ဒန္တော ဝိယ သက္ကစ္စံ သုဏာတီတိ.

‘‘ဘန္တေ၊ တုမှာကံ ဓမ္မဒေသနာ ဆဝိအာဒီနိ ဆိန္ဒိတွာ အဋ္ဌိမိဉ္ဇံ အာဟစ္စ တိဋ္ဌတိ၊ ကသ္မာ ဣမေ တုမှေသုပိ ဓမ္မံ ဒေသေန္တေသု သက္ကစ္စံ န သုဏန္တီ’’တိ? ‘‘အာနန္ဒ၊ မမ ဓမ္မော သုဿဝနီယောတိ သညံ ကရောသိ မညေ’’တိ. ‘‘ကိံ ပန၊ ဘန္တေ၊ ဒုဿဝနီယော’’တိ? ‘‘အာမ၊ အာနန္ဒာ’’တိ. ‘‘ကသ္မာ၊ ဘန္တေ’’တိ? ‘‘အာနန္ဒ၊ ဗုဒ္ဓေါတိ ဝါ ဓမ္မောတိ ဝါ သံဃောတိ ဝါ ပဒံ ဣမေဟိ သတ္တေဟိ အနေကေသုပိ ကပ္ပကောဋိသတသဟဿေသု အသုတပုဗ္ဗံ. ယသ္မာ ဣမံ ဓမ္မံ သောတုံ န သက္ကောန္တာ အနမတဂ္ဂေ သံသာရေ ဣမေ သတ္တာ အနေကဝိဟိတံ တိရစ္ဆာနကထံယေဝ သုဏန္တာ အာဂတာ၊ တသ္မာ သုရာပါနကေဠိမဏ္ဍလာဒီသု ဂါယန္တာ နစ္စန္တာ ဝိစရန္တိ၊ ဓမ္မံ သောတုံ န သက္ကောန္တီ’’တိ. ‘‘ကိံ နိဿာယ ပနေတေ န သက္ကောန္တိ၊ ဘန္တေ’’တိ?

အထဿ သတ္ထာ၊ ‘‘အာနန္ဒ၊ ရာဂံ နိဿာယ ဒေါသံ နိဿာယ မောဟံ နိဿာယ တဏှံ နိဿာယ န သက္ကောန္တိ. ရာဂဂ္ဂိသဒိသော အဂ္ဂိ နာမ နတ္ထိ၊ သော ဆာရိကမ္ပိ အသေသေတွာ သတ္တေ ဒဟတိ. ကိဉ္စာပိ သတ္တသူရိယပါတုဘာဝံ နိဿာယ ဥပ္ပန္နော ကပ္ပဝိနာသကော အဂ္ဂိပိ ကိဉ္စိ အနဝသေသေတွာဝ လောကံ ဒဟတိ၊ သော ပန အဂ္ဂိ ကဒါစိယေဝ ဒဟတိ. ရာဂဂ္ဂိနော အဒဟနကာလော နာမ နတ္ထိ၊ တသ္မာ ရာဂသမော ဝါ အဂ္ဂိ ဒေါသသမော ဝါ ဂဟော မောဟသမံ ဝါ ဇာလံ တဏှာသမာ ဝါ နဒီ နာမ နတ္ထီ’’တိ ဝတွာ ဣမံ ဂါထမာဟ –

၂၅၁. ‘‘နတ္ထိ ရာဂသမော အဂ္ဂိ၊ နတ္ထိ ဒေါသသမော ဂဟော၊

နတ္ထိ မောဟသမံ ဇာလံ၊ နတ္ထိ တဏှာသမာ နဒီ’’တိ.

တတ္ထ ရာဂသမောတိ ဓူမာဒီသု ကိဉ္စိ အဒဿေတွာ အန္တောယေဝ ဥဋ္ဌာယ ဈာပနဝသေန ရာဂေန သမော အဂ္ဂိ နာမ နတ္ထိ. ဒေါသသမောတိ ယက္ခဂဟအဇဂရဂဟကုမ္ဘိလဂဟာဒယော ဧကသ္မိံယေဝ အတ္တဘာဝေ ဂဏှိတုံ သက္ကောန္တိ၊ ဒေါသဂဟော ပန သဗ္ဗတ္ထ ဧကန္တမေဝ ဂဏှာတီတိ ဒေါသေန သမော ဂဟော နာမ နတ္ထိ. မောဟသမန္တိ ဩနန္ဓနပရိယောနန္ဓနဋ္ဌေန ပန မောဟသမံ ဇာလံ နာမ နတ္ထိ. တဏှာသမာတိ ဂင်္ဂါဒီနံ နဒီနံ ပုဏ္ဏကာလောပိ ဦနကာလောပိ သုက္ခကာလောပိ ပညာယတိ၊ တဏှာယ ပန ပုဏ္ဏကာလော ဝါ သုက္ခကာလော ဝါ နတ္ထိ၊ နိစ္စံ ဦနာဝ ပညာယတီတိ ဒုပ္ပူရဏဋ္ဌေန တဏှာယ သမာ နဒီ နာမ နတ္ထီတိ အတ္ထော.

ဒေသနာဝသာနေ သက္ကစ္စံ ဓမ္မံ သုဏန္တော ဥပါသကော သောတာပတ္တိဖလေ ပတိဋ္ဌဟိ၊ သမ္ပတ္တာနမ္ပိ သာတ္ထိကာ ဓမ္မဒေသနာ အဟောသီတိ.

ပဉ္စဥပါသကဝတ္ထု နဝမံ.