၄. လာလုဒါယိတ္ထေရဝတ္ထု

အသဇ္ဈာယမလာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော လာလုဒါယိတ္ထေရံ အာရဗ္ဘ ကထေသိ.

သာဝတ္ထိယံ ကိရ ပဉ္စကောဋိမတ္တာ အရိယသာဝကာ ဝသန္တိ၊ ဒွေ ကောဋိမတ္တာ ပုထုဇ္ဇနာ ဝသန္တိ. တေသု အရိယသာဝကာ ပုရေဘတ္တံ ဒါနံ ဒတွာ ပစ္ဆာဘတ္တံ သပ္ပိတေလမဓုဖာဏိတဝတ္ထာဒီနိ ဂဟေတွာ ဝိဟာရံ ဂန္တွာ ဓမ္မကထံ သုဏန္တိ. ဓမ္မံ သုတွာ ဂမနကာလေ စ သာရိပုတ္တမောဂ္ဂလ္လာနာနံ ဂုဏကထံ ကထေန္တိ. ဥဒါယိတ္ထေရော တေသံ ကထံ သုတွာ ‘‘ဧတေသံ တာဝ ဓမ္မံ သုတွာ တုမှေ ဧဝံ ကထေထ၊ မမ ဓမ္မကထံ သုတွာ ကိံ နု ခေါ န ကထေဿထာ’’တိ ဝဒတိ. မနုဿာ တဿ ကထံ သုတွာ ‘‘အယံ ဧကော ဓမ္မကထိကော ဘဝိဿတိ၊ ဣမဿပိ အမှေဟိ ဓမ္မကထံ သောတုံ ဝဋ္ဋတီ’’တိ တေ ဧကဒိဝသံ ထေရံ ယာစိတွာ၊ ‘‘ဘန္တေ၊ အဇ္ဇ အမှာကံ ဓမ္မဿဝနဒိဝသော’’တိ သံဃဿ ဒါနံ ဒတွာ၊ ‘‘ဘန္တေ၊ တုမှေ အမှာကံ ဒိဝါ ဓမ္မကထံ ကထေယျာထာ’’တိ အာဟံသု. သောပိ တေသံ အဓိဝါသေသိ.

တေဟိ ဓမ္မဿဝနဝေလာယ အာဂန္တွာ၊ ‘‘ဘန္တေ၊ နော ဓမ္မံ ကထေထာ’’တိ ဝုတ္တေ လာလုဒါယိတ္ထေရော အာသနေ နိသီဒိတွာ စိတ္တဗီဇနိံ ဂဟေတွာ စာလေန္တော ဧကမ္ပိ ဓမ္မပဒံ အဒိသွာ ‘‘အဟံ သရဘညံ ဘဏိဿာမိ၊ အညော ဓမ္မကထံ ကထေတူ’’တိ ဝတွာ ဩတရိ. တေ အညေန ဓမ္မကထံ ကထာပေတွာ သရဘာဏတ္ထာယ ပုန တံ အာသနံ အာရောပယိံသု. သော ပုနပိ ကိဉ္စိ အဒိသွာ ‘‘အဟံ ရတ္တိံ ကထေဿာမိ၊ အညော သရဘညံ ဘဏတူ’’တိ ဝတွာ အာသနာ ဩတရိ. တေ အညေန သရဘညံ ဘဏာပေတွာ ပုန ရတ္တိံ ထေရံ အာနယိံသု. သော ရတ္တိမ္ပိ ကိဉ္စိ အဒိသွာ ‘‘အဟံ ပစ္စူသကာလေ ကထေဿာမိ၊ ရတ္တိံ အညော ကထေတူ’’တိ ဝတွာ ဩတရိ. တေ အညေန ရတ္တိံ ကထာပေတွာ ပုန ပစ္စူသေ တံ အာနယိံသု. သော ပုနပိ ကိဉ္စိ နာဒ္ဒသ. မဟာဇနော လေဍ္ဍုဒဏ္ဍာဒီနိ ဂဟေတွာ၊ ‘‘အန္ဓဗာလ၊ တွံ သာရိပုတ္တမောဂ္ဂလ္လာနာနံ ဝဏ္ဏေ ကထိယမာနေ ဧဝဉ္စေဝဉ္စ ဝဒေသိ၊ ဣဒါနိ ကသ္မာ န ကထေသီ’’တိ သန္တဇ္ဇေတွာ ပလာယန္တံ အနုဗန္ဓိ. သော ပလာယန္တော ဧကိဿာ ဝစ္စကုဋိယာ ပတိ.

မဟာဇနော ကထံ သမုဋ္ဌာပေသိ – ‘‘အဇ္ဇ လာလုဒါယီ သာရိပုတ္တမောဂ္ဂလ္လာနာနံ ဂုဏကထာယ ပဝတ္တမာနာယ ဥဿူယန္တော အတ္တနော ဓမ္မကထိကဘာဝံ ပကာသေတွာ မနုဿေဟိ သက္ကာရံ ကတွာ ‘ဓမ္မံ သုဏောမာ’တိ ဝုတ္တေ စတုက္ခတ္တုံ အာသနေ နိသီဒိတွာ ကထေတဗ္ဗယုတ္တကံ ကိဉ္စိ အပဿန္တော ‘တွံ အမှာကံ အယျေဟိ သာရိပုတ္တမောဂ္ဂလ္လာနတ္ထေရေဟိ သဒ္ဓိံ ယုဂဂ္ဂါဟံ ဂဏှာသီ’တိ လေဍ္ဍုဒဏ္ဍာဒီနိ ဂဟေတွာ သန္တဇ္ဇေတွာ ပလာပိယမာနော ဝစ္စကုဋိယာ ပတိတော’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ ‘‘န၊ ဘိက္ခဝေ၊ ဣဒါနေဝ၊ ပုဗ္ဗေပိ ဧသော ဂူထကူပေ နိမုဂ္ဂေါယေဝါ’’တိ ဝတွာ အတီတံ အာဟရိတွာ –

‘‘စတုပ္ပဒေါ အဟံ သမ္မ၊ တွမ္ပိ သမ္မ စတုပ္ပဒေါ၊

ဧဟိ သမ္မ နိဝတ္တဿု၊ ကိံ နု ဘီတော ပလာယသိ.

‘‘အသုစိပူတိလောမောသိ၊ ဒုဂ္ဂန္ဓော ဝါသိ သူကရ၊

သစေ ယုဇ္ဈိတုကာမောသိ၊ ဇယံ သမ္မ ဒဒါမိ တေ’’တိ. (ဇာ. ၁.၂.၅-၆) –

ဣမံ ဇာတကံ ဝိတ္ထာရေတွာ ကထေသိ. တဒါ သီဟော သာရိပုတ္တော အဟောသိ၊ သူကရော လာလုဒါယီတိ. သတ္ထာ ဣမံ ဓမ္မဒေသနံ အာဟရိတွာ၊ ‘‘ဘိက္ခဝေ၊ လာလုဒါယိနာ အပ္ပမတ္တကောဝ ဓမ္မော ဥဂ္ဂဟိတော၊ သဇ္ဈာယံ ပန နေဝ အကာသိ၊ ကိဉ္စိ ပရိယတ္တိံ ဥဂ္ဂဟေတွာ တဿာ အသဇ္ဈာယကရဏံ မလမေဝါ’’တိ ဝတွာ ဣမံ ဂါထမာဟ –

၂၄၁. ‘‘အသဇ္ဈာယမလာ မန္တာ၊ အနုဋ္ဌာနမလာ ဃရာ၊

မလံ ဝဏ္ဏဿ ကောသဇ္ဇံ၊ ပမာဒေါ ရက္ခတော မလ’’န္တိ.

တတ္ထ အသဇ္ဈာယမလာတိ ယာကာစိ ပရိယတ္တိ ဝါ သိပ္ပံ ဝါ ယသ္မာ အသဇ္ဈာယန္တဿ အနနုယုဉ္ဇန္တဿ ဝိနဿတိ ဝါ နိရန္တရံ ဝါ န ဥပဋ္ဌာတိ၊ တသ္မာ ‘‘အသဇ္ဈာယမလာ မန္တာ’’တိ ဝုတ္တံ. ယသ္မာ ပန ဃရာဝါသံ ဝသန္တဿ ဥဋ္ဌာယုဋ္ဌာယ ဇိဏ္ဏပဋိသင်္ခရဏာဒီနိ အကရောန္တဿ ဃရံ နာမ ဝိနဿတိ၊ တသ္မာ ‘‘အနုဋ္ဌာနမလာ ဃရာ’’တိ ဝုတ္တံ. ယသ္မာ ဂိဟိဿ ဝါ ပဗ္ဗဇိတဿ ဝါ ကောသဇ္ဇဝသေန သရီရပဋိဇဂ္ဂနံ ဝါ ပရိက္ခာရပဋိဇဂ္ဂနံ ဝါ အကရောန္တဿ ကာယော ဒုဗ္ဗဏ္ဏော ဟောတိ၊ တသ္မာ ‘‘မလံ ဝဏ္ဏဿ ကောသဇ္ဇ’’န္တိ ဝုတ္တံ. ယသ္မာ ဂါဝေါ ရက္ခန္တဿ ပမာဒဝသေန နိဒ္ဒါယန္တဿ ဝါ ကီဠန္တဿ ဝါ တာ ဂါဝေါ အတိတ္ထပက္ခန္ဒနာဒိနာ ဝါ ဝါဠမိဂစောရာဒိဥပဒ္ဒဝေန ဝါ ပရေသံ သာလိခေတ္တာဒီနိ ဩတရိတွာ ခါဒနဝသေန ဝိနာသံ အာပဇ္ဇန္တိ၊ သယမ္ပိ ဒဏ္ဍံ ဝါ ပရိဘာသံ ဝါ ပါပုဏာတိ၊ ပဗ္ဗဇိတံ ဝါ ပန ဆ ဒွါရာနိ အရက္ခန္တံ ပမာဒဝသေန ကိလေသာ ဩတရိတွာ သာသနာ စာဝေန္တိ၊ တသ္မာ ‘‘ပမာဒေါ ရက္ခတော မလ’’န္တိ ဝုတ္တံ. သော ဟိဿ ဝိနာသာဝဟနေန မလဋ္ဌာနိယတ္တာ မလန္တိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

လာလုဒါယိတ္ထေရဝတ္ထု စတုတ္ထံ.