၃. တိဿတ္ထေရဝတ္ထု

အယသာဝ မလန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော တိဿတ္ထေရံ နာမ ဘိက္ခုံ အာရဗ္ဘ ကထေသိ.

ဧကော ကိရ သာဝတ္ထိဝါသီ ကုလပုတ္တော ပဗ္ဗဇိတွာ လဒ္ဓူပသမ္ပဒေါ တိဿတ္ထေရောတိ ပညာယိ. သော အပရဘာဂေ ဇနပဒဝိဟာရေ ဝဿူပဂတော အဋ္ဌဟတ္ထကံ ထူလသာဋကံ လဘိတွာ ဝုတ္ထဝဿော ပဝါရေတွာ တံ အာဒါယ ဂန္တွာ ဘဂိနိယာ ဟတ္ထေ ဌပေသိ. သာ ‘‘န မေ ဧသော သာဋကော ဘာတု အနုစ္ဆဝိကော’’တိ တံ တိခိဏာယ ဝါသိယာ ဆိန္ဒိတွာ ဟီရဟီရံ ကတွာ ဥဒုက္ခလေ ကောဋ္ဋေတွာ ပဝိသေတွာ ပေါထေတွာ ဝဋ္ဋေတွာ သုခုမသုတ္တံ ကန္တိတွာ သာဋကံ ဝါယာပေသိ. ထေရောပိ သုတ္တဉ္စေဝ သူစိယော စ သံဝိဒဟိတွာ စီဝရကာရကေ ဒဟရသာမဏေရေ သန္နိပါတေတွာ ဘဂိနိယာ သန္တိကံ ဂန္တွာ ‘‘တံ မေ သာဋကံ ဒေထ၊ စီဝရံ ကာရေဿာမီ’’တိ အာဟ. သာ နဝဟတ္ထံ သာဋကံ နီဟရိတွာ ကနိဋ္ဌဘာတိကဿ ဟတ္ထေ ဌပေသိ. သော တံ ဂဟေတွာ ဝိတ္ထာရေတွာ ဩလောကေတွာ ‘‘မမ သာဋကော ထူလော အဋ္ဌဟတ္ထော၊ အယံ သုခုမော နဝဟတ္ထော. နာယံ မမ သာဋကော၊ တုမှာကံ ဧသ၊ န မေ ဣမိနာ အတ္ထော၊ တမေဝ မေ ဒေထာ’’တိ အာဟ. ‘‘ဘန္တေ၊ တုမှာကမေဝ ဧသော၊ ဂဏှထ န’’န္တိ? သော နေဝ ဣစ္ဆိ. အထဿ အတ္တနာ ကတကိစ္စံ သဗ္ဗံ အာရောစေတွာ၊ ‘‘ဘန္တေ၊ တုမှာကမေဝေသ၊ ဂဏှထ န’’န္တိ အဒါသိ. သော တံ အာဒါယ ဝိဟာရံ ဂန္တွာ စီဝရကမ္မံ ပဋ္ဌပေသိ.

အထဿ ဘဂိနီ စီဝရကာရာနံ အတ္ထာယ ယာဂုဘတ္တာဒီနိ သမ္ပာဒေသိ. စီဝရဿ နိဋ္ဌိတဒိဝသေ ပန အတိရေကသက္ကာရံ ကာရေသိ. သော စီဝရံ ဩလောကေတွာ တသ္မိံ ဥပ္ပန္နသိနေဟော ‘‘သွေ ဒါနိ နံ ပါရုပိဿာမီ’’တိ သံဟရိတွာ စီဝရဝံသေ ဌပေတွာ တံ ရတ္တိံ ဘုတ္တာဟာရံ ဇိရာပေတုံ အသက္ကောန္တော ကာလံ ကတွာ တသ္မိံယေဝ စီဝရေ ဦကာ ဟုတွာ နိဗ္ဗတ္တိ. ဘဂိနီပိဿ ကာလကိရိယံ သုတွာ ဘိက္ခူနံ ပါဒေသု ပဝတ္တမာနာ ရောဒိ. ဘိက္ခူ တဿ သရီရကိစ္စံ ကတွာ ဂိလာနုပဋ္ဌာကဿ အဘာဝေန သံဃဿေဝ တံ ပါပုဏာတိ. ‘‘ဘာဇေဿာမ န’’န္တိ တံ စီဝရံ နီဟရာပေသုံ. သာ ဦကာ ‘‘ဣမေ မမ သန္တကံ ဝိလုမ္ပန္တီ’’တိ ဝိရဝန္တီ ဣတော စိတော စ သန္ဓာဝိ. သတ္ထာ ဂန္ဓကုဋိယံ နိသိန္နောဝ ဒိဗ္ဗာယ သောတဓာတုယာ တံ သဒ္ဒံ သုတွာ၊ ‘‘အာနန္ဒ၊ တိဿဿ စီဝရံ အဘာဇေတွာ သတ္တာဟံ နိက္ခိပိတုံ ဝဒေဟီ’’တိ အာဟ. ထေရော တထာ ကာရေသိ. သာပိ သတ္တမေ ဒိဝသေ ကာလံ ကတွာ တုသိတဝိမာနေ နိဗ္ဗတ္တိ. သတ္ထာ ‘‘အဋ္ဌမေ ဒိဝသေ တိဿဿ စီဝရံ ဘာဇေတွာ ဂဏှထာ’’တိ အာဏာပေသိ. ဘိက္ခူ တထာ ကရိံသု.

ဘိက္ခူ ဓမ္မသဘာယံ ကထံ သမုဋ္ဌာပေသုံ ‘‘ကသ္မာ နု ခေါ သတ္ထာ တိဿဿ စီဝရံ သတ္တ ဒိဝသေ ဌပါပေတွာ အဋ္ဌမေ ဒိဝသေ ဂဏှိတုံ အနုဇာနီ’’တိ. သတ္ထာ အာဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ၊ ‘‘ဘိက္ခဝေ၊ တိဿော အတ္တနော စီဝရေ ဦကာ ဟုတွာ နိဗ္ဗတ္တော၊ တုမှေဟိ တသ္မိံ ဘာဇိယမာနေ ‘ဣမေ မမ သန္တကံ ဝိလုမ္ပန္တီ’တိ ဝိရဝန္တီ ဣတော စိတော စ ဓာဝိ. သာ တုမှေဟိ စီဝရေ ဂယှမာနေ တုမှေသု မနံ ပဒုဿိတွာ နိရယေ နိဗ္ဗတ္တေယျ၊ တေန စာဟံ စီဝရံ နိက္ခိပါပေသိံ. ဣဒါနိ ပန သာ တုသိတဝိမာနေ နိဗ္ဗတ္တာ၊ တေန ဝေါ မယာ စီဝရဂဟဏံ အနုညာတ’’န္တိ ဝတွာ ပုန တေဟိ ‘‘ဘာရိယာ ဝတ အယံ၊ ဘန္တေ၊ တဏှာ နာမာ’’တိ ဝုတ္တေ ‘‘အာမ၊ ဘိက္ခဝေ၊ ဣမေသံ သတ္တာနံ တဏှာ နာမ ဘာရိယာ. ယထာ အယတော မလံ ဥဋ္ဌဟိတွာ အယမေဝ ခါဒတိ ဝိနာသေတိ အပရိဘောဂံ ကရောတိ၊ ဧဝမေဝါယံ တဏှာ ဣမေသံ သတ္တာနံ အဗ္ဘန္တရေ ဥပ္ပဇ္ဇိတွာ တေ သတ္တေ နိရယာဒီသု နိဗ္ဗတ္တာပေတိ၊ ဝိနာသံ ပါပေတီ’’တိ ဝတွာ ဣမံ ဂါထမာဟ –

၂၄၀. ‘‘အယသာဝ မလံ သမုဋ္ဌိတံ၊

တတုဋ္ဌာယ တမေဝ ခါဒတိ၊

ဧဝံ အတိဓောနစာရိနံ၊

သာနိ ကမ္မာနိ နယန္တိ ဒုဂ္ဂတိ’’န္တိ.

တတ္ထ အယသာဝါတိ အယတော သမုဋ္ဌိတံ. တတုဋ္ဌာယာတိ တတော ဥဋ္ဌာယ. အတိဓောနစာရိနန္တိ ဓောနာ ဝုစ္စတိ စတ္တာရော ပစ္စယေ ‘‘ဣဒမတ္ထံ ဧတေ’’တိ ပစ္စဝေက္ခိတွာ ပရိဘုဉ္ဇနပညာ၊ တံ အတိက္ကမိတွာ စရန္တော အတိဓောနစာရီ နာမ. ဣဒံ ဝုတ္တံ ဟောတိ – ယထာ အယတော မလံ သမုဋ္ဌာယ တတော သမုဋ္ဌိတံ တမေဝ ခါဒတိ၊ ဧဝမေဝံ စတုပစ္စယေ အပစ္စဝေက္ခိတွာ ပရိဘုဉ္ဇန္တံ အတိဓောနစာရိနံ သာနိ ကမ္မာနိ အတ္တနိ ဌိတတ္တာ အတ္တနော သန္တကာနေဝ တာနိ ကမ္မာနိ ဒုဂ္ဂတိံ နယန္တီတိ.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

တိဿတ္ထေရဝတ္ထု တတိယံ.