၂. အညတရဗြာဟ္မဏဝတ္ထု

အနုပုဗ္ဗေနာတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အညတရဗြာဟ္မဏံ အာရဗ္ဘ ကထေသိ.

သော ကိရ ဧကဒိဝသံ ပါတောဝ နိက္ခမိတွာ ဘိက္ခူနံ စီဝရပါရုပနဋ္ဌာနေ ဘိက္ခူ စီဝရံ ပါရုပန္တေ ဩလောကေန္တော အဋ္ဌာသိ. တံ ပန ဌာနံ ဝိရူဠှတိဏံ ဟောတိ. အထေကဿ ဘိက္ခုနော စီဝရံ ပါရုပန္တဿ စီဝရကဏ္ဏော တိဏေသု ပဝဋ္ဋေန္တော ဥဿာဝဗိန္ဒူဟိ တေမိ. ဗြာဟ္မဏော ‘‘ဣမံ ဌာနံ အပ္ပဟရိတံ ကာတုံ ဝဋ္ဋတီ’’တိ ပုနဒိဝသေ ကုဒ္ဒါလံ အာဒါယ ဂန္တွာ တံ ဌာနံ တစ္ဆေတွာ ခလမဏ္ဍလသဒိသံ အကာသိ. ပုနဒိဝသေပိ တံ ဌာနံ အာဂန္တွာ ဘိက္ခူသု စီဝရံ ပါရုပန္တေသု ဧကဿ စီဝရကဏ္ဏံ ဘူမိယံ ပတိတွာ ပံသုမှိ ပဝဋ္ဋမာနံ ဒိသွာ ‘‘ဣဓ ဝါလုကံ ဩကိရိတုံ ဝဋ္ဋတီ’’တိ စိန္တေတွာ ဝါလုကံ အာဟရိတွာ ဩကိရိ.

အထေကဒိဝသံ ပုရေဘတ္တံ စဏ္ဍော အာတပေါ အဟောသိ၊ တဒါပိ ဘိက္ခူနံ စီဝရံ ပါရုပန္တာနံ ဂတ္တတော သေဒေ မုစ္စန္တေ ဒိသွာ ‘‘ဣဓ မယာ မဏ္ဍပံ ကာရေတုံ ဝဋ္ဋတီ’’တိ စိန္တေတွာ မဏ္ဍပံ ကာရေသိ. ပုနဒိဝသေ ပါတောဝ ဝဿံ ဝဿိ၊ ဝဒ္ဒလိကံ အဟောသိ. တဒါပိ ဗြာဟ္မဏော ဘိက္ခူ ဩလောကေန္တောဝ ဌိတော တိန္တစီဝရကေ ဘိက္ခူ ဒိသွာ ‘‘ဧတ္ထ မယာ သာလံ ကာရေတုံ ဝဋ္ဋတီ’’တိ သာလံ ကာရေတွာ ‘‘ဣဒါနိ သာလမဟံ ကရိဿာမီ’’တိ စိန္တေတွာ ဗုဒ္ဓပ္ပမုခံ ဘိက္ခုသံဃံ နိမန္တေတွာ အန္တော စ ဗဟိ စ ဘိက္ခူ နိသီဒါပေတွာ ဘတ္တကိစ္စာဝသာနေ အနုမောဒနတ္ထာယ သတ္ထု ပတ္တံ ဂဟေတွာ၊ ‘‘ဘန္တေ၊ အဟံ ဘိက္ခူနံ စီဝရပါရုပနကာလေ ဣမသ္မိံ ဌာနေ ဩလောကေန္တော ဌိတော ဣဒဉ္စိဒဉ္စ ဒိသွာ ဣဒဉ္စိဒဉ္စ ကာရေသိ’’န္တိ အာဒိတော ပဋ္ဌာယ သဗ္ဗံ တံ ပဝတ္တိံ အာရောစေသိ. သတ္ထာ တဿ ဝစနံ သုတွာ၊ ‘‘ဗြာဟ္မဏ၊ ပဏ္ဍိတာ နာမ ခဏေ ခဏေ ထောကံ ကုသလံ ကရောန္တာ အနုပုဗ္ဗေန အတ္တနော အကုသလမလံ နီဟရန္တိယေဝါ’’တိ ဝတွာ ဣမံ ဂါထမာဟ –

၂၃၉. ‘‘အနုပုဗ္ဗေန မေဓာဝီ၊ ထောကံ ထောကံ ခဏေ ခဏေ၊

ကမ္မာရော ရဇတဿေဝ၊ နိဒ္ဓမေ မလမတ္တနော’’တိ.

တတ္ထ အနုပုဗ္ဗေနာတိ အနုပဋိပါဋိယာ. မေဓာဝီတိ ဓမ္မောဇပညာယ သမန္နာဂတော. ခဏေ ခဏေတိ ဩကာသေ ဩကာသေ ကုသလံ ကရောန္တော. ကမ္မာရော ရဇတဿေဝါတိ ယထာ သုဝဏ္ဏကာရော ဧကဝါရမေဝ သုဝဏ္ဏံ တာပေတွာ ကောဋ္ဋေတွာ မလံ နီဟရိတွာ ပိလန္ဓနဝိကတိံ ကာတုံ န သက္ကောတိ၊ ပုနပ္ပုနံ တာပေန္တော ကောဋ္ဋေန္တော ပန မလံ နီဟရတိ၊ တတော အနေကဝိဓံ ပိလန္ဓနဝိကတိံ ကရောတိ၊ ဧဝမေဝ ပုနပ္ပုနံ ကုသလံ ကရောန္တော ပဏ္ဍိတော အတ္တနော ရာဂါဒိမလံ နိဒ္ဓမေယျ၊ ဧဝံ နိဒ္ဓန္တမလော နိက္ကိလေသောဝ ဟောတီတိ အတ္ထော.

ဒေသနာဝသာနေ ဗြာဟ္မဏော သောတာပတ္တိဖလေ ပတိဋ္ဌတိ၊ မဟာဇနဿာပိ သာတ္ထိကာ ဓမ္မဒေသနာ အဟောသီတိ.

အညတရဗြာဟ္မဏဝတ္ထု ဒုတိယံ.