၃. ဝိသာခါဝတ္ထု

ပေမတော ဇာယတီတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော ဝိသာခံ ဥပါသိကံ အာရဗ္ဘ ကထေသိ.

သာ ကိရ ပုတ္တဿ ဓီတရံ သုဒတ္တံ နာမ ကုမာရိကံ အတ္တနော ဌာနေ ဌပေတွာ ဂေဟေ ဘိက္ခုသံဃဿ ဝေယျာဝစ္စံ ကာရေသိ. သာ အပရေန သမယေန ကာလမကာသိ. သာ တဿာ သရီရနိက္ခေပံ ကာရေတွာ သောကံ သန္ဓာရေတုံ အသက္ကောန္တီ ဒုက္ခိနီ ဒုမ္မနာ သတ္ထု သန္တိကံ ဂန္တွာ ဝန္ဒိတွာ ဧကမန္တံ နိသီဒိ. အထ နံ သတ္ထာ ‘‘ကိံ နု ခေါ တွံ၊ ဝိသာခေ၊ ဒုက္ခိနီ ဒုမ္မနာ အဿုမုခါ ရောဒမာနာ နိသိန္နာ’’တိ အာဟ. သာ တမတ္ထံ အာရောစေတွာ ‘‘ပိယာ မေ၊ ဘန္တေ၊ သာ ကုမာရိကာ ဝတ္တသမ္ပန္နာ၊ ဣဒါနိ တထာရူပံ န ပဿာမီ’’တိ အာဟ. ‘‘ကိတ္တကာ ပန၊ ဝိသာခေ၊ သာဝတ္ထိယံ မနုဿာ’’တိ? ‘‘ဘန္တေ၊ တုမှေဟိယေဝ မေ ကထိတံ သတ္တ ဇနကောဋိယော’’တိ. ‘‘သစေ ပနာယံ ဧတ္တကော ဇနော တဝ နတ္တာယ သဒိသော ဘဝေယျ၊ ဣစ္ဆေယျာသိ န’’န္တိ? ‘‘အာမ၊ ဘန္တေ’’တိ. ‘‘ကတိ ပန ဇနာ သာဝတ္ထိယံ ဒေဝသိကံ ကာလံ ကရောန္တီ’’တိ? ‘‘ဗဟူ၊ ဘန္တေ’’တိ. ‘‘နနု ဧဝံ၊ ဘန္တေ၊ တဝ အသောစနကာလော န ဘဝေယျ၊ ရတ္တိန္ဒိဝံ ရောဒန္တီယေဝ ဝိစရေယျာသီ’’တိ. ‘‘ဟောတု၊ ဘန္တေ၊ ဉာတံ မယာ’’တိ. အထ နံ သတ္ထာ ‘‘တေန ဟိ မာ သောစိ၊ သောကော ဝါ ဘယံ ဝါ ပေမတောဝ ဇာယတီ’’တိ ဝတွာ ဣမံ ဂါထမာဟ –

၂၁၃. ‘‘ပေမတော ဇာယတီ သောကော၊ ပေမတော ဇာယတီ ဘယံ၊

ပေမတော ဝိပ္ပမုတ္တဿ၊ နတ္ထိ သောကော ကုတော ဘယ’’န္တိ.

တတ္ထ ပေမတောတိ ပုတ္တဓီတာဒီသု ကတံ ပေမမေဝ နိဿာယ သောကော ဇာယတီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

ဝိသာခါဝတ္ထု တတိယံ.