၄. လိစ္ဆဝီဝတ္ထု

ရတိယာ ဇာယတီတိ ဣမံ ဓမ္မဒေသနံ သတ္ထာ ဝေသာလိံ နိဿာယ ကူဋာဂါရသာလာယံ ဝိဟရန္တော လိစ္ဆဝီ အာရဗ္ဘ ကထေသိ.

တေ ကိရ ဧကသ္မိံ ဆဏဒိဝသေ အညမညံ အသဒိသေဟိ အလင်္ကာရေဟိ အလင်္ကရိတွာ ဥယျာနဂမနတ္ထာယ နဂရာ နိက္ခမိံသု. သတ္ထာ ပိဏ္ဍာယ ပဝိသန္တော တေ ဒိသွာ ဘိက္ခူ အာမန္တေသိ – ‘‘ပဿထ၊ ဘိက္ခဝေ၊ လိစ္ဆဝယော၊ ယေဟိ ဒေဝါ တာဝတိံသာ န ဒိဋ္ဌပုဗ္ဗာ၊ တေ ဣမေ ဩလောကေန္တူ’’တိ ဝတွာ နဂရံ ပါဝိသိ. တေပိ ဥယျာနံ ဂစ္ဆန္တာ ဧကံ နဂရသောဘိနိံ ဣတ္ထိံ အာဒါယ ဂန္တွာ တံ နိဿာယ ဣဿာဘိဘူတာ အညမညံ ပဟရိတွာ လောဟိတံ နဒိံ ဝိယ ပဝတ္တယိံသု. အထ နေ မဉ္စေနာဒါယ ဥက္ခိပိတွာ အာဂမံသု. သတ္ထာပိ ကတဘတ္တကိစ္စော နဂရာ နိက္ခမိ. ဘိက္ခူပိ လိစ္ဆဝယော တထာ နီယမာနေ ဒိသွာ သတ္ထာရံ အာဟံသု – ‘‘ဘန္တေ၊ လိစ္ဆဝိရာဇာနော ပါတောဝ အလင်္ကတပဋိယတ္တာ ဒေဝါ ဝိယ နဂရာ နိက္ခမိတွာ ဣဒါနိ ဧကံ ဣတ္ထိံ နိဿာယ ဣမံ ဗျသနံ ပတ္တာ’’တိ. သတ္ထာ၊ ‘‘ဘိက္ခဝေ၊ သောကော ဝါ ဘယံ ဝါ ဥပ္ပဇ္ဇမာနံ ရတိံ နိဿာယ ဥပ္ပဇ္ဇတိယေဝါ’’တိ ဝတွာ ဣမံ ဂါထမာဟ –

၂၁၄. ‘‘ရတိယာ ဇာယတီ သောကော၊ ရတိယာ ဇာယတီ ဘယံ၊

ရတိယာ ဝိပ္ပမုတ္တဿ၊ နတ္ထိ သောကော ကုတော ဘယ’’န္တိ.

တတ္ထ ရတိယာတိ ပဉ္စကာမဂုဏရတိတော၊ တံ နိဿာယာတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

လိစ္ဆဝီဝတ္ထု စတုတ္ထံ.