၈. သမ္ဗဟုလဘိက္ခုဝတ္ထု

သုခေါ ဗုဒ္ဓါနန္တိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော သမ္ဗဟုလာနံ ဘိက္ခူနံ ကထံ အာရဗ္ဘ ကထေသိ.

ဧကဒိဝသဉှိ ပဉ္စသတဘိက္ခူ ဥပဋ္ဌာနသာလာယံ နိသိန္နာ၊ ‘‘အာဝုသော၊ ကိံ နု ခေါ ဣမသ္မိံ လောကေ သုခ’’န္တိ ကထံ သမုဋ္ဌာပေသုံ? တတ္ထ ကေစိ ‘‘ရဇ္ဇသုခသဒိသံ သုခံ နာမ နတ္ထီ’’တိ အာဟံသု. ကေစိ ကာမသုခသဒိသံ၊ ကေစိ ‘‘သာလိမံသဘောဇနာဒိသဒိသံ သုခံ နာမ နတ္ထီ’’တိ အာဟံသု. သတ္ထာ တေသံ နိသိန္နဋ္ဌာနံ ဂန္တွာ ‘‘ကာယ နုတ္ထ၊ ဘိက္ခဝေ၊ ဧတရဟိ ကထာယ သန္နိသိန္နာ’’တိ ပုစ္ဆိတွာ ‘‘ဣမာယ နာမာ’’တိ ဝုတ္တေ၊ ‘‘ဘိက္ခဝေ၊ ကိံ ကထေထ? ဣဒဉှိ သဗ္ဗမ္ပိ သုခံ ဝဋ္ဋဒုက္ခပရိယာပန္နမေဝ၊ ဣမသ္မိံ လောကေ ဗုဒ္ဓုပ္ပါဒေါ ဓမ္မဿဝနံ၊ သံဃသာမဂ္ဂီ၊ သမ္မောဒမာနဘာဝေါတိ ဣဒမေဝ သုခ’’န္တိ ဝတွာ ဣမံ ဂါထမာဟ –

၁၉၄. ‘‘သုခေါ ဗုဒ္ဓါနမုပ္ပါဒေါ၊ သုခါ သဒ္ဓမ္မဒေသနာ၊

သုခါ သံဃဿ သာမဂ္ဂီ၊ သမဂ္ဂါနံ တပေါ သုခေါ’’တိ.

တတ္ထ ဗုဒ္ဓါနမုပ္ပါဒေါတိ ယသ္မာ ဗုဒ္ဓါ ဥပ္ပဇ္ဇမာနာ မဟာဇနံ ရာဂကန္တာရာဒီဟိ တာရေန္တိ၊ တသ္မာ ဗုဒ္ဓါနံ ဥပ္ပါဒေါ သုခေါ ဥတ္တမော. ယသ္မာ သဒ္ဓမ္မဒေသနံ အာဂမ္မ ဇာတိအာဒိဓမ္မာ သတ္တာ ဇာတိအာဒီဟိ မုစ္စန္တိ၊ တသ္မာ သဒ္ဓမ္မဒေသနာ သုခါ. သာမဂ္ဂီတိ သမစိတ္တတာ၊ သာပိ သုခါ ဧဝ. သမဂ္ဂါနံ ပန ဧကစိတ္တာနံ ယသ္မာ ဗုဒ္ဓဝစနံ ဝါ ဥဂ္ဂဏှိတုံ ဓုတင်္ဂါနိ ဝါ ပရိဟရိတုံ သမဏဓမ္မံ ဝါ ကာတုံ သက္ကာ၊ တသ္မာ သမဂ္ဂါနံ တပေါ သုခေါတိ ဝုတ္တံ. တေနေဝါဟ – ‘‘ယာဝကီဝဉ္စ၊ ဘိက္ခဝေ၊ ဘိက္ခူ သမဂ္ဂါ သန္နိပတိဿန္တိ၊ သမ္မဂ္ဂါ ဝုဋ္ဌဟိဿန္တိ၊ သမဂ္ဂါ သံဃကရဏီယာနိ ကရိဿန္တိ၊ ဝုဒ္ဓိယေဝ၊ ဘိက္ခဝေ၊ ဘိက္ခူနံ ပါဋိကင်္ခါ၊ နော ပရိဟာနီ’’တိ (ဒီ. နိ. ၂.၁၃၆).

ဒေသနာဝသာနေ တေ ဘိက္ခူ အရဟတ္တေ ပတိဋ္ဌဟိံသု၊ မဟာဇနဿာပိ သာတ္ထိကာ ဓမ္မဒေသနာ အဟောသီတိ.

သမ္ဗဟုလဘိက္ခုဝတ္ထု အဋ္ဌမံ.