၇. အာနန္ဒတ္ထေရပဉှဝတ္ထု

ဒုလ္လဘောတိ ဣမံ ဓမ္မဒေသနံ သတ္ထာ ဇေတဝနေ ဝိဟရန္တော အာနန္ဒတ္ထေရဿ ပဉှံ အာရဗ္ဘ ကထေသိ.

ထေရော ဟိ ဧကဒိဝသံ ဒိဝါဋ္ဌာနေ နိသိန္နော စိန္တေသိ – ‘‘ဟတ္ထာဇာနီယော ဆဒ္ဒန္တကုလေ ဝါ ဥပေါသထကုလေ ဝါ ဥပ္ပဇ္ဇတိ၊ အဿာဇာနီယော သိန္ဓဝကုလေ ဝါ ဝလာဟကဿရာဇကုလေ ဝါ၊ ဥသဘော ဂေါအာဇနီယော ဒက္ခိဏပထေတိအာဒီနိ ဝဒန္တေန သတ္ထာရာ ဟတ္ထိအာဇာနီယာဒီနံ ဥပ္ပတ္တိဋ္ဌာနာဒီနိ ကထိတာနိ၊ ပုရိသာဇာနီယော ပန ကဟံ နု ခေါ ဥပ္ပဇ္ဇတီ’’တိ. သော သတ္ထာရံ ဥပသင်္ကမိတွာ ဝန္ဒိတွာ ဧကမန္တံ နိသီဒိတွာ ဧတမတ္ထံ ပုစ္ဆိ. သတ္ထာ၊ ‘‘အာနန္ဒ၊ ပုရိသာဇာနီယော နာမ သဗ္ဗတ္ထ နုပ္ပဇ္ဇတိ၊ ဥဇုကတော ပန တိယောဇနသတာယာမေ ဝိတ္ထာရတော အဍ္ဎတေယျသတေ အာဝဋ္ဋတော နဝယောဇနသတပ္ပမာဏေ မဇ္ဈိမပဒေသဋ္ဌာနေ ဥပ္ပဇ္ဇတိ. ဥပ္ပဇ္ဇန္တော စ ပန န ယသ္မိံ ဝါ တသ္မိံ ဝါ ကုလေ ဥပ္ပဇ္ဇတိ၊ ခတ္တိယမဟာသာလဗြာဟ္မဏမဟာသာလကုလာနံ ပန အညတရသ္မိံယေဝ ဥပ္ပဇ္ဇတီ’’တိ ဝတွာ ဣမံ ဂါထမာဟ –

၁၉၃. ‘‘ဒုလ္လဘော ပုရိသာဇညော၊ န သော သဗ္ဗတ္ထ ဇာယတိ၊

ယတ္ထ သော ဇာယတီ ဓီရော၊ တံ ကုလံ သုခမေဓတီ’’တိ.

တတ္ထ ဒုလ္လဘောတိ ပုရိသာဇညော ဟိ ဒုလ္လဘော၊ န ဟတ္ထိအာဇာနီယာဒယော ဝိယ သုလဘော၊ သော သဗ္ဗတ္ထ ပစ္စန္တဒေသေ ဝါ နီစကုလေ ဝါ န ဇာယတိ၊ မဇ္ဈိမဒေသေပိ မဟာဇနဿ အဘိဝါဒနာဒိသက္ကာရကရဏဋ္ဌာနေ ခတ္တိယဗြာဟ္မဏကုလာနံ အညတရသ္မိံ ကုလေ ဇာယတိ. ဧဝံ ဇာယမာနော ယတ္ထ သော ဇာယတိ ဓီရော ဥတ္တမပညော သမ္မာသမ္ဗုဒ္ဓေါ၊ တံ ကုလံ သုခမေဓတီတိ သုခပ္ပတ္တမေဝ ဟောတီတိ အတ္ထော.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

အာနန္ဒတ္ထေရပဉှဝတ္ထု သတ္တမံ.