၇. သံဃဘေဒပရိသက္ကနဝတ္ထု

သုကရာနီတိ ဣမံ ဓမ္မဒေသနံ သတ္ထာ ဝေဠုဝနေ ဝိဟရန္တော သံဃဘေဒပရိသက္ကနံ အာရဗ္ဘ ကထေသိ.

ဧကဒိဝသဉှိ ဒေဝဒတ္တော သံဃဘေဒါယ ပရိသက္ကန္တော အာယသ္မန္တံ အာနန္ဒံ ပိဏ္ဍာယ စရန္တံ ဒိသွာ အတ္တနော အဓိပ္ပါယံ အာရောစေသိ. တံ သုတွာ ထေရော သတ္ထု သန္တိကံ ဂန္တွာ ဘဂဝန္တံ ဧတဒဝေါစ – ‘‘ဣဓာဟံ၊ ဘန္တေ၊ ပုဗ္ဗဏှသမယံ နိဝါသေတွာ ပတ္တစီဝရမာဒါယ ရာဇဂဟံ ပိဏ္ဍာယ ပါဝိသိံ. အဒ္ဒသာ ခေါ မံ၊ ဘန္တေ၊ ဒေဝဒတ္တော ရာဇဂဟေ ပိဏ္ဍာယ စရန္တံ. ဒိသွာ ယေနာဟံ တေနုပသင်္ကမိ၊ ဥပသင်္ကမိတွာ မံ ဧတဒဝေါစ – ‘အဇ္ဇတဂ္ဂေ ဒါနာဟံ၊ အာဝုသော အာနန္ဒ၊ အညတြေဝ ဘဂဝတာ အညတြ ဘိက္ခုသံဃေန ဥပေါသထံ ကရိဿာမိ သံဃကမ္မဉ္စာ’တိ. အဇ္ဇ ဘဂဝါ ဒေဝဒတ္တော သံဃံ ဘိန္ဒိဿတိ၊ ဥပေါသထဉ္စ ကရိဿတိ သံဃကမ္မာနိ စာ’’တိ. ဧဝံ ဝုတ္တေ သတ္ထာ –

‘‘သုကရံ သာဓုနာ သာဓု၊ သာဓု ပါပေန ဒုက္ကရံ၊

ပါပံ ပါပေန သုကရံ၊ ပါပမရိယေဟိ ဒုက္ကရ’’န္တိ. (ဥဒါ. ၄၈) –

ဣမံ ဥဒါနံ ဥဒါနေတွာ၊ ‘‘အာနန္ဒ၊ အတ္တနော အဟိတကမ္မံ နာမ သုကရံ၊ ဟိတကမ္မမေဝ ဒုက္ကရ’’န္တိ ဝတွာ ဣမံ ဂါထမာဟ –

၁၆၃. ‘‘သုကရာနိ အသာဓူနိ၊ အတ္တနော အဟိတာနိ စ၊

ယံ ဝေ ဟိတဉ္စ သာဓုဉ္စ၊ တံ ဝေ ပရမဒုက္ကရ’’န္တိ.

တဿတ္ထော – ယာနိ ကမ္မာနိ အသာဓူနိ သာဝဇ္ဇာနိ အပါယသံဝတ္တနိကတ္တာယေဝ အတ္တနော အဟိတာနိ စ ဟောန္တိ၊ တာနိ သုကရာနိ. ယံ ပန သုဂတိသံဝတ္တနိကတ္တာ အတ္တနော ဟိတဉ္စ အနဝဇ္ဇတ္ထေန သာဓုဉ္စ သုဂတိသံဝတ္တနိကဉ္စေဝ နိဗ္ဗာနသံဝတ္တနိကဉ္စ ကမ္မံ၊ တံ ပါစီနနိန္နာယ ဂင်္ဂါယ ဥဗ္ဗတ္တေတွာ ပစ္ဆာမုခကရဏံ ဝိယ အတိဒုက္ကရန္တိ.

ဒေသနာဝသာနေ ဗဟူ သောတာပတ္တိဖလာဒီနိ ပါပုဏိံသူတိ.

သံဃဘေဒပရိသက္ကနဝတ္ထု သတ္တမံ.