ဓာတုထူပပူဇာဝဏ္ဏနာ

၂၃၉. ရာဇဂဟေ ဘဂဝတော သရီရာနံ ထူပဉ္စ မဟဉ္စ အကာသီတိ ကထံ အကာသိ? ကုသိနာရတော ယာဝ ရာဇဂဟံ ပဉ္စဝီသတိ ယောဇနာနိ၊ ဧတ္ထန္တရေ အဋ္ဌဥသဘဝိတ္ထတံ သမတလံ မဂ္ဂံ ကာရေတွာ ယာဒိသံ မလ္လရာဇာနော မကုဋဗန္ဓနဿ စ သန္ထာဂါရဿ စ အန္တရေ ပူဇံ ကာရေသုံ. တာဒိသံ ပဉ္စဝီသတိယောဇနေပိ မဂ္ဂေ ပူဇံ ကာရေတွာ လောကဿ အနုက္ကဏ္ဌနတ္ထံ သဗ္ဗတ္ထ အန္တရာပဏေ ပသာရေတွာ သုဝဏ္ဏဒေါဏိယံ ပက္ခိတ္တဓာတုယော သတ္တိပဉ္ဇရေန ပရိက္ခိပါပေတွာ အတ္တနော ဝိဇိတေ ပဉ္စယောဇနသတပရိမဏ္ဍလေ မနုဿေ သန္နိပါတာပေသိ. တေ ဓာတုယော ဂဟေတွာ ကုသိနာရတော သာဓုကီဠိတံ ကီဠန္တာ နိက္ခမိတွာ ယတ္ထ ယတ္ထ သုဝဏ္ဏဝဏ္ဏာနိ ပုပ္ဖါနိ ပဿန္တိ၊ တတ္ထ တတ္ထ ဓာတုယော သတ္တိအန္တရေ ဌပေတွာ ပူဇံ အကံသု. တေသံ ပုပ္ဖါနံ ခီဏကာလေ ဂစ္ဆန္တိ၊ ရထဿ ဓုရဋ္ဌာနံ ပစ္ဆိမဋ္ဌာနေ သမ္ပတ္တေ သတ္တ ဒိဝသေ သာဓုကီဠိတံ ကီဠန္တိ. ဧဝံ ဓာတုယော ဂဟေတွာ အာဂစ္ဆန္တာနံ သတ္တ ဝဿာနိ သတ္တ မာသာနိ သတ္တ ဒိဝသာနိ ဝီတိဝတ္တာနိ.

မိစ္ဆာဒိဋ္ဌိကာ – ‘‘သမဏဿ ဂေါတမဿ ပရိနိဗ္ဗုတကာလတော ပဋ္ဌာယ ဗလက္ကာရေန သာဓုကီဠိတာယ ဥပဒ္ဒုတမှ သဗ္ဗေ နော ကမ္မန္တာ နဋ္ဌာ’’တိ ဥဇ္ဈာယန္တာ မနံ ပဒေါသေတွာ ဆဠာသီတိသဟဿမတ္တာ အပါယေ နိဗ္ဗတ္တာ. ခီဏာသဝါ အာဝဇ္ဇိတွာ ‘‘မဟာဇနော မနံ ပဒေါသေတွာ အပါယေ နိဗ္ဗတ္တီ’’တိ ဒိသွာ – ‘‘သက္ကံ ဒေဝရာဇာနံ ဓာတုအာဟရဏူပါယံ ကာရေဿာမာ’’တိ တဿ သန္တိကံ ဂန္တွာ တမတ္ထံ အာရောစေတွာ – ‘‘ဓာတုအာဟရဏူပါယံ ကရောဟိ မဟာရာဇာ’’တိ အာဟံသု. သက္ကော အာဟ – ‘‘ဘန္တေ၊ ပုထုဇ္ဇနော နာမ အဇာတသတ္တုနာ သမော သဒ္ဓေါ နတ္ထိ၊ န သော မမ ဝစနံ ကရိဿတိ၊ အပိစ ခေါ မာရဝိဘိံသကသဒိသံ ဝိဘိံသကံ ဒဿေဿာမိ၊ မဟာသဒ္ဒံ သာဝေဿာမိ၊ ယက္ခဂါဟကခိပိတကအရောစကေ ကရိဿာမိ၊ တုမှေ ‘အမနုဿာ မဟာရာဇ ကုပိတာ ဓာတုယော အာဟရာပေထာ’တိ ဝဒေယျာထ၊ ဧဝံ သော အာဟရာပေဿတီ’’တိ. အထ ခေါ သက္ကော တံ သဗ္ဗံ အကာသိ.

ထေရာပိ ရာဇာနံ ဥပသင်္ကမိတွာ – ‘‘မဟာရာဇ၊ အမနုဿာ ကုပိတာ၊ ဓာတုယော အာဟရာပေဟီ’’တိ ဘဏိံသု. ရာဇာ – ‘‘န တာဝ၊ ဘန္တေ၊ မယှံ စိတ္တံ တုဿတိ၊ ဧဝံ သန္တေပိ အာဟရန္တူ’’တိ အာဟ. သတ္တမဒိဝသေ ဓာတုယော အာဟရိံသု. ဧဝံ အာဟတာ ဓာတုယော ဂဟေတွာ ရာဇဂဟေ ထူပဉ္စ မဟဉ္စ အကာသိ. ဣတရေပိ အတ္တနော အတ္တနော ဗလာနုရူပေန အာဟရိတွာ သကသကဋ္ဌာနေသု ထူပဉ္စ မဟဉ္စ အကံသု.

၂၄၀. ဧဝမေတံ ဘူတပုဗ္ဗန္တိ ဧဝံ ဧတံ ဓာတုဘာဇနဉ္စေဝ ဒသထူပကရဏဉ္စ ဇမ္ဗုဒီပေ ဘူတပုဗ္ဗန္တိ ပစ္ဆာ သင်္ဂီတိကာရကာ အာဟံသု. ဧဝံ ပတိဋ္ဌိတေသု ပန ထူပေသု မဟာကဿပတ္ထေရော ဓာတူနံ အန္တရာယံ ဒိသွာ ရာဇာနံ အဇာတသတ္တုံ ဥပသင်္ကမိတွာ ‘‘မဟာရာဇ၊ ဧကံ ဓာတုနိဓာနံ ကာတုံ ဝဋ္ဋတီ’’တိ အာဟ. သာဓု၊ ဘန္တေ၊ နိဓာနကမ္မံ တာဝ မမ ဟောတု၊ သေသဓာတုယော ပန ကထံ အာဟရာမီတိ? န၊ မဟာရာဇ၊ ဓာတုအာဟရဏံ တုယှံ ဘာရော၊ အမှာကံ ဘာရောတိ. သာဓု၊ ဘန္တေ၊ တုမှေ ဓာတုယော အာဟရထ၊ အဟံ ဓာတုနိဓာနံ ကရိဿာမီတိ. ထေရော တေသံ တေသံ ရာဇကုလာနံ ပရိစရဏမတ္တမေဝ ဌပေတွာ သေသဓာတုယော အာဟရိ. ရာမဂါမေ ပန ဓာတုယော နာဂါ ပရိဂ္ဂဏှိံသု၊ တာသံ အန္တရာယော နတ္ထိ. ‘‘အနာဂတေ လင်္ကာဒီပေ မဟာဝိဟာရေ မဟာစေတိယမှိ နိဒဟိဿန္တီ’’တိ တာ န အာဟရိတွာ သေသေဟိ သတ္တဟိ နဂရေဟိ အာဟရိတွာ ရာဇဂဟဿ ပါစီနဒက္ခိဏဒိသာဘာဂေ ဌတွာ – ‘‘ဣမသ္မိံ ဌာနေ ယော ပါသာဏော အတ္ထိ၊ သော အန္တရဓာယတု၊ ပံသု သုဝိသုဒ္ဓါ ဟောတု၊ ဥဒကံ မာ ဥဋ္ဌဟတူ’’တိ အဓိဋ္ဌာသိ.

ရာဇာ တံ ဌာနံ ခဏာပေတွာ တတော ဥဒ္ဓတပံသုနာ ဣဋ္ဌကာ ကာရေတွာ အသီတိမဟာသာဝကာနံ စေတိယာနိ ကာရေတိ. ‘‘ဣဓ ရာဇာ ကိံ ကာရေတီ’’တိ ပုစ္ဆန္တာနမ္ပိ ‘‘မဟာသာဝကာနံ စေတိယာနီ’’တိ ဝဒန္တိ၊ န ကောစိ ဓာတုနိဓာနဘာဝံ ဇာနာတိ. အသီတိဟတ္ထဂမ္ဘီရေ ပန တသ္မိံ ပဒေသေ ဇာတေ ဟေဋ္ဌာ လောဟသန္ထာရံ သန္ထရာပေတွာ တတ္ထ ထူပါရာမေ စေတိယဃရပ္ပမာဏံ တမ္ဗလောဟမယံ ဂေဟံ ကာရာပေတွာ အဋ္ဌ အဋ္ဌ ဟရိစန္ဒနာဒိမယေ ကရဏ္ဍေ စ ထူပေ စ ကာရာပေသိ. အထ ဘဂဝတော ဓာတုယော ဟရိစန္ဒနကရဏ္ဍေ ပက္ခိပိတွာ တံ ဟရိစန္ဒနကရဏ္ဍကမ္ပိ အညသ္မိံ ဟရိစန္ဒနကရဏ္ဍကေ၊ တမ္ပိ အညသ္မိန္တိ ဧဝံ အဋ္ဌ ဟရိစန္ဒနကရဏ္ဍေ ဧကတော ကတွာ ဧတေနေဝ ဥပါယေန တေ အဋ္ဌ ကရဏ္ဍေ အဋ္ဌသု ဟရိစန္ဒနထူပေသု၊ အဋ္ဌ ဟရိစန္ဒနထူပေ အဋ္ဌသု လောဟိတစန္ဒနကရဏ္ဍေသု၊ အဋ္ဌ လောဟိတစန္ဒနကရဏ္ဍေ အဋ္ဌသု လောဟိတစန္ဒနထူပေသု၊ အဋ္ဌ လောဟိတစန္ဒနထူပေ အဋ္ဌသု ဒန္တကရဏ္ဍေသု၊ အဋ္ဌ ဒန္တကရဏ္ဍေ အဋ္ဌသု ဒန္တထူပေသု၊ အဋ္ဌ ဒန္တထူပေ အဋ္ဌသု သဗ္ဗရတနကရဏ္ဍေသု၊ အဋ္ဌ သဗ္ဗရတနကရဏ္ဍေ အဋ္ဌသု သဗ္ဗရတနထူပေသု၊ အဋ္ဌ သဗ္ဗရတနထူပေ အဋ္ဌသု သုဝဏ္ဏကရဏ္ဍေသု၊ အဋ္ဌ သုဝဏ္ဏကရဏ္ဍေ၊ အဋ္ဌသု သုဝဏ္ဏထူပေသု၊ အဋ္ဌ သုဝဏ္ဏထူပေ အဋ္ဌသု ရဇတကရဏ္ဍေသု၊ အဋ္ဌ ရဇတကရဏ္ဍေ အဋ္ဌသု ရဇတထူပေသု၊ အဋ္ဌ ရဇတထူပေ၊ အဋ္ဌသု မဏိကရဏ္ဍေသု၊ အဋ္ဌ မဏိကရဏ္ဍေ အဋ္ဌသု မဏိထူပေသု၊ အဋ္ဌ မဏိထူပေ အဋ္ဌသု လောဟိတင်္ကကရဏ္ဍေသု၊ အဋ္ဌ လောဟိတင်္ကကရဏ္ဍေ အဋ္ဌသု လောဟိတင်္ကထူပေသု၊ အဋ္ဌ လောဟိတင်္ကထူပေ အဋ္ဌသု မသာရဂလ္လကရဏ္ဍေသု၊ အဋ္ဌ မသာရဂလ္လကရဏ္ဍေ အဋ္ဌသု မသာရဂလ္လထူပေသု၊ အဋ္ဌ မသာရဂလ္လထူပေ အဋ္ဌသု ဖလိကကရဏ္ဍေသု၊ အဋ္ဌ ဖလိကကရဏ္ဍေ အဋ္ဌသု ဖလိကမယထူပေသု ပက္ခိပိ.

သဗ္ဗေသံ ဥပရိမံ ဖလိကစေတိယံ ထူပါရာမစေတိယပ္ပမာဏံ အဟောသိ၊ တဿ ဥပရိ သဗ္ဗရတနမယံ ဂေဟံ ကာရေသိ၊ တဿ ဥပရိ သုဝဏ္ဏမယံ၊ တဿ ဥပရိ ရဇတမယံ၊ တဿ ဥပရိ တမ္ဗလောဟမယံ ဂေဟံ. တတ္ထ သဗ္ဗရတနမယံ ဝါလိကံ ဩကိရိတွာ ဇလဇထလဇပုပ္ဖါနံ သဟဿာနိ ဝိပ္ပကိရိတွာ အဍ္ဎဆဋ္ဌာနိ ဇာတကသတာနိ အသီတိမဟာထေရေ သုဒ္ဓေါဒနမဟာရာဇာနံ မဟာမာယာဒေဝိံ သတ္တ သဟဇာတေတိ သဗ္ဗာနေတာနိ သုဝဏ္ဏမယာနေဝ ကာရေသိ. ပဉ္စပဉ္စသတေ သုဝဏ္ဏရဇတမယေ ပုဏ္ဏဃဋေ ဌပါပေသိ၊ ပဉ္စ သုဝဏ္ဏဒ္ဓဇသတေ ဥဿာပေသိ. ပဉ္စသတေ သုဝဏ္ဏဒီပေ၊ ပဉ္စသတေ ရဇတဒီပေ ကာရာပေတွာ သုဂန္ဓတေလဿ ပူရေတွာ တေသု ဒုကူလဝဋ္ဋိယော ဌပေသိ.

အထာယသ္မာ မဟာကဿပေါ – ‘‘မာလာ မာ မိလာယန္တု၊ ဂန္ဓာ မာ ဝိနဿန္တု၊ ဒီပါ မာ ဝိဇ္ဈာယန္တူ’’တိ အဓိဋ္ဌဟိတွာ သုဝဏ္ဏပဋ္ဋေ အက္ခရာနိ ဆိန္ဒာပေသိ –

‘‘အနာဂတေ ပိယဒါသော နာမ ကုမာရော ဆတ္တံ ဥဿာပေတွာ အသောကော ဓမ္မရာဇာ ဘဝိဿတိ. သော ဣမာ ဓာတုယော ဝိတ္ထာရိကာ ကရိဿတီ’’တိ.

ရာဇာ သဗ္ဗပသာဓနေဟိ ပူဇေတွာ အာဒိတော ပဋ္ဌာယ ဒွါရံ ပိဒဟန္တော နိက္ခမိ၊ သော တမ္ဗလောဟဒွါရံ ပိဒဟိတွာ အာဝိဉ္ဆနရဇ္ဇုယံ ကုဉ္စိကမုဒ္ဒိကံ ဗန္ဓိတွာ တတ္ထေဝ မဟန္တံ မဏိက္ခန္ဓံ ဌပေတွာ – ‘‘အနာဂတေ ဒလိဒ္ဒရာဇာ ဣမံ မဏိံ ဂဟေတွာ ဓာတူနံ သက္ကာရံ ကရောတူ’’တိ အက္ခရံ ဆိန္ဒာပေသိ.

သက္ကော ဒေဝရာဇာ ဝိဿကမ္မံ အာမန္တေတွာ – ‘‘တာတ၊ အဇာတသတ္တုနာ ဓာတုနိဓာနံ ကတံ၊ ဧတ္ထ အာရက္ခံ ပဋ္ဌပေဟီ’’တိ ပဟိဏိ. သော အာဂန္တွာ ဝါဠသင်္ဃာဋယန္တံ ယောဇေသိ၊ ကဋ္ဌရူပကာနိ တသ္မိံ ဓာတုဂဗ္ဘေ ဖလိကဝဏ္ဏခဂ္ဂေ ဂါဟေတွာ ဝါတသဒိသေန ဝေဂေန အနုပရိယာယန္တံ ယန္တံ ယောဇေတွာ ဧကာယ ဧဝ အာဏိယာ ဗန္ဓိတွာ သမန္တတော ဂိဉ္ဇကာဝသထာကာရေန သိလာပရိက္ခေပံ ကတွာ ဥပရိ ဧကာယ ပိဒဟိတွာ ပံသုံ ပက္ခိပိတွာ ဘူမိံ သမံ ကတွာ တဿ ဥပရိ ပါသာဏထူပံ ပတိဋ္ဌပေသိ. ဧဝံ နိဋ္ဌိတေ ဓာတုနိဓာနေ ယာဝတာယုကံ ဌတွာ ထေရောပိ ပရိနိဗ္ဗုတော၊ ရာဇာပိ ယထာကမ္မံ ဂတော၊ တေပိ မနုဿာ ကာလင်္ကတာ.

အပရဘာဂေ ပိယဒါသော နာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဟုတွာ တာ ဓာတုယော ဂဟေတွာ ဇမ္ဗုဒီပေ ဝိတ္ထာရိကာ အကာသိ. ကထံ? သော နိဂြောဓသာမဏေရံ နိဿာယ သာသနေ လဒ္ဓပ္ပသာဒေါ စတုရာသီတိ ဝိဟာရသဟဿာနိ ကာရေတွာ ဘိက္ခုသံဃံ ပုစ္ဆိ – ‘‘ဘန္တေ၊ မယာ စတုရာသီတိ ဝိဟာရသဟဿာနိ ကာရိတာနိ၊ ဓာတုယော ကုတော လဘိဿာမီ’’တိ? မဟာရာဇ၊ – ‘‘ဓာတုနိဓာနံ နာမ အတ္ထီ’’တိ သုဏောမ၊ န ပန ပညာယတိ – ‘‘အသုကသ္မိံ ဌာနေ’’တိ. ရာဇာ ရာဇဂဟေ စေတိယံ ဘိန္ဒာပေတွာ ဓာတုံ အပဿန္တော ပဋိပါကတိကံ ကာရေတွာ ဘိက္ခုဘိက္ခုနိယော ဥပါသကဥပါသိကာယောတိ စတဿော ပရိသာ ဂဟေတွာ ဝေသာလိံ ဂတော. တတြာပိ အလဘိတွာ ကပိလဝတ္ထုံ. တတြာပိ အလဘိတွာ ရာမဂါမံ ဂတော. ရာမဂါမေ နာဂါ စေတိယံ ဘိန္ဒိတုံ န အဒံသု၊ စေတိယေ နိပတိတကုဒါလော ခဏ္ဍာခဏ္ဍံ ဟောတိ. ဧဝံ တတြာပိ အလဘိတွာ အလ္လကပ္ပံ ဝေဌဒီပံ ပါဝံ ကုသိနာရန္တိ သဗ္ဗတ္ထ စေတိယာနိ ဘိန္ဒိတွာ ဓာတုံ အလဘိတွာဝ ပဋိပါကတိကာနိ ကတွာ ပုန ရာဇဂဟံ ဂန္တွာ စတဿော ပရိသာ သန္နိပါတာပေတွာ – ‘‘အတ္ထိ ကေနစိ သုတပုဗ္ဗံ ‘အသုကဋ္ဌာနေ နာမ ဓာတုနိဓာန’န္တိ’’ ပုစ္ဆိ.

တတြေကော ဝီသဝဿသတိကော ထေရော – ‘‘အသုကဋ္ဌာနေ ဓာတုနိဓာန’’န္တိ န ဇာနာမိ၊ မယှံ ပန ပိတာ မဟာထေရော မံ သတ္တဝဿကာလေ မာလာစင်္ကောဋကံ ဂါဟာပေတွာ – ‘‘ဧဟိ သာမဏေရ၊ အသုကဂစ္ဆန္တရေ ပါသာဏထူပေါ အတ္ထိ၊ တတ္ထ ဂစ္ဆာမာ’’တိ ဂန္တွာ ပူဇေတွာ – ‘‘ဣမံ ဌာနံ ဥပဓာရေတုံ ဝဋ္ဋတိ သာမဏေရာ’’တိ အာဟ. အဟံ ဧတ္တကံ ဇာနာမိ မဟာရာဇာတိ အာဟ. ရာဇာ ‘‘ဧတဒေဝ ဌာန’’န္တိ ဝတွာ ဂစ္ဆေ ဟာရေတွာ ပါသာဏထူပဉ္စ ပံသုဉ္စ အပနေတွာ ဟေဋ္ဌာ သုဓာဘူမိံ အဒ္ဒသ. တတော သုဓဉ္စ ဣဋ္ဌကာယော စ ဟာရေတွာ အနုပုဗ္ဗေန ပရိဝေဏံ ဩရုယှ သတ္တရတနဝါလုကံ အသိဟတ္ထာနိ စ ကဋ္ဌရူပကာနိ သမ္ပရိဝတ္တကာနိ အဒ္ဒသ. သော ယက္ခဒါသကေ ပက္ကောသာပေတွာ ဗလိကမ္မံ ကာရေတွာပိ နေဝ အန္တံ န ကောဋိံ ပဿန္တော ဒေဝတာနံ နမဿမာနော – ‘‘အဟံ ဣမာ ဓာတုယော ဂဟေတွာ စတုရာသီတိယာ ဝိဟာရသဟဿေသု နိဒဟိတွာ သက္ကာရံ ကရောမိ၊ မာ မေ ဒေဝတာ အန္တရာယံ ကရောန္တူ’’တိ အာဟ.

သက္ကော ဒေဝရာဇာ စာရိကံ စရန္တော တံ ဒိသွာ ဝိဿကမ္မံ အာမန္တေသိ – ‘‘တာတ၊ အသောကော ဓမ္မရာဇာ ‘ဓာတုယော နီဟရိဿာမီ’တိ ပရိဝေဏံ ဩတိဏ္ဏော၊ ဂန္တွာ ကဋ္ဌရူပကာနိ ဟာရေဟီ’’တိ. သော ပဉ္စစူဠဂါမဒါရကဝေသေန ဂန္တွာ ရညော ပုရတော ဓနုဟတ္ထော ဌတွာ – ‘‘ဟရာမိ မဟာရာဇာ’’တိ အာဟ. ‘‘ဟရ၊ တာတာ’’တိ သရံ ဂဟေတွာ သန္ဓိမှိယေဝ ဝိဇ္ဈိ၊ သဗ္ဗံ ဝိပ္ပကိရိယိတ္ထ. အထ ရာဇာ အာဝိဉ္ဆနေ ဗန္ဓံ ကုဉ္စိကမုဒ္ဒိကံ ဂဏှိ၊ မဏိက္ခန္ဓံ ပဿိ. ‘‘အနာဂတေ ဒလိဒ္ဒရာဇာ ဣမံ မဏိံ ဂဟေတွာ ဓာတူနံ သက္ကာရံ ကရောတူ’’တိ ပုန အက္ခရာနိ ဒိသွာ ကုဇ္ဈိတွာ – ‘‘မာဒိသံ နာမ ရာဇာနံ ဒလိဒ္ဒရာဇာတိ ဝတ္တုံ အယုတ္တ’’န္တိ ပုနပ္ပုနံ ဃဋေတွာ ဒွါရံ ဝိဝရာပေတွာ အန္တောဂေဟံ ပဝိဋ္ဌော.

အဋ္ဌာရသဝဿာဓိကာနံ ဒွိန္နံ ဝဿသတာနံ ဥပရိ အာရောပိတဒီပါ တထေဝ ပဇ္ဇလန္တိ. နီလုပ္ပလပုပ္ဖါနိ တင်္ခဏံ အာဟရိတွာ အာရောပိတာနိ ဝိယ၊ ပုပ္ဖသန္ထာရော တင်္ခဏံ သန္ထတော ဝိယ၊ ဂန္ဓာ တံ မုဟုတ္တံ ပိသိတွာ ဌပိတာ ဝိယ ရာဇာ သုဝဏ္ဏပဋ္ဋံ ဂဟေတွာ – ‘‘အနာဂတေ ပိယဒါသော နာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဘဝိဿတိ သော ဣမာ ဓာတုယော ဝိတ္ထာရိကာ ကရိဿတီ’’တိ ဝါစေတွာ – ‘‘ဒိဋ္ဌော ဘော၊ အဟံ အယျေန မဟာကဿပတ္ထေရေနာ’’တိ ဝတွာ ဝါမဟတ္ထံ အာဘုဇိတွာ ဒက္ခိဏေန ဟတ္ထေန အပ္ဖေါဋေသိ. သော တသ္မိံ ဌာနေ ပရိစရဏဓာတုမတ္တမေဝ ဌပေတွာ သေသာ ဓာတုယော ဂဟေတွာ ဓာတုဂေဟံ ပုဗ္ဗေ ပိဟိတနယေနေဝ ပိဒဟိတွာ သဗ္ဗံ ယထာပကတိယာဝ ကတွာ ဥပရိ ပါသာဏစေတိယံ ပတိဋ္ဌာပေတွာ စတုရာသီတိယာ ဝိဟာရသဟဿေသု ဓာတုယော ပတိဋ္ဌာပေတွာ မဟာထေရေ ဝန္ဒိတွာ ပုစ္ဆိ – ‘‘ဒါယာဒေါမှိ၊ ဘန္တေ၊ ဗုဒ္ဓသာသနေ’’တိ. ကိဿ ဒါယာဒေါ တွံ၊ မဟာရာဇ၊ ဗာဟိရကော တွံ သာသနဿာတိ. ဘန္တေ၊ ဆန္နဝုတိကောဋိဓနံ ဝိဿဇ္ဇေတွာ စတုရာသီတိ ဝိဟာရသဟဿာနိ ကာရေတွာ အဟံ န ဒါယာဒေါ၊ အညော ကော ဒါယာဒေါတိ? ပစ္စယဒါယကော နာမ တွံ မဟာရာဇ၊ ယော ပန အတ္တနော ပုတ္တဉ္စ ဓီတရဉ္စ ပဗ္ဗာဇေတိ၊ အယံ သာသနေ ဒါယာဒေါ နာမာတိ. သော ပုတ္တဉ္စ ဓီတရဉ္စ ပဗ္ဗာဇေသိ. အထ နံ ထေရာ အာဟံသု – ‘‘ဣဒါနိ၊ မဟာရာဇ၊ သာသနေ ဒါယာဒေါသီ’’တိ.

ဧဝမေတံ ဘူတပုဗ္ဗန္တိ ဧဝံ ဧတံ အတီတေ ဓာတုနိဓာနမ္ပိ ဇမ္ဗုဒီပတလေ ဘူတပုဗ္ဗန္တိ. တတိယသင်္ဂီတိကာရာပိ ဣမံ ပဒံ ဌပယိံသု.

အဋ္ဌဒေါဏံ စက္ခုမတော သရီရန္တိအာဒိဂါထာယော ပန တမ္ဗပဏ္ဏိဒီပေ ထေရေဟိ ဝုတ္တာတိ.

ဣတိ သုမင်္ဂလဝိလာသိနိယာ ဒီဃနိကာယဋ္ဌကထာယံ

မဟာပရိနိဗ္ဗာနသုတ္တဝဏ္ဏနာ နိဋ္ဌိတာ.