အာနန္ဒအစ္ဆရိယဓမ္မဝဏ္ဏနာ

၂၀၇. ဝိဟာရန္တိ ဣဓ မဏ္ဍလမာလော ဝိဟာရောတိ အဓိပ္ပေတော၊ တံ ပဝိသိတွာ. ကပိသီသန္တိ ဒွါရဗာဟကောဋိယံ ဌိတံ အဂ္ဂဠရုက္ခံ. ရောဒမာနော အဋ္ဌာသီတိ သော ကိရာယသ္မာ စိန္တေသိ – ‘‘သတ္ထာရာ မမ သံဝေဂဇနကံ ဝသနဋ္ဌာနံ ကထိတံ၊ စေတိယစာရိကာယ သာတ္ထကဘာဝေါ ကထိတော၊ မာတုဂါမေ ပဋိပဇ္ဇိတဗ္ဗပဉှော ဝိဿဇ္ဇိတော၊ အတ္တနော သရီရေ ပဋိပတ္တိ အက္ခာတာ၊ စတ္တာရော ထူပါရဟာ ကထိတာ၊ ဓုဝံ အဇ္ဇ ဘဂဝါ ပရိနိဗ္ဗာယိဿတီ’’တိ၊ တဿေဝံ စိန္တယတော ဗလဝဒေါမနဿံ ဥပ္ပဇ္ဇိ. အထဿ ဧတဒဟောသိ – ‘‘ဘဂဝတော သန္တိကေ ရောဒနံ နာမ အဖာသုကံ၊ ဧကမန္တံ ဂန္တွာ သောကံ တနုကံ ကရိဿာမီ’’တိ၊ သော တထာ အကာသိ. တေန ဝုတ္တံ – ‘‘ရောဒမာနော အဋ္ဌာသီ’’တိ.

အဟဉ္စ ဝတမှီတိ အဟဉ္စ ဝတ အမှိ၊ အဟံ ဝတမှီတိပိ ပါဌော. ယော မမ အနုကမ္ပကောတိ ယော မံ အနုကမ္ပတိ အနုသာသတိ၊ သွေ ဒါနိ ပဋ္ဌာယ ကဿ မုခဓောဝနံ ဒဿာမိ၊ ကဿ ပါဒေ ဓောဝိဿာမိ၊ ကဿ သေနာသနံ ပဋိဇဂ္ဂိဿာမိ၊ ကဿ ပတ္တစီဝရံ ဂဟေတွာ ဝိစရိဿာမီတိ ဗဟုံ ဝိလပိ. အာမန္တေသီတိ ဘိက္ခုသံဃဿ အန္တရေ ထေရံ အဒိသွာ အာမန္တေသိ.

မေတ္တေန ကာယကမ္မေနာတိ မေတ္တစိတ္တဝသေန ပဝတ္တိတေန မုခဓောဝနဒါနာဒိကာယကမ္မေန. ဟိတေနာတိ ဟိတဝုဒ္ဓိယာ ကတေန. သုခေနာတိ သုခသောမနဿေနေဝ ကတေန၊ န ဒုက္ခိနာ ဒုမ္မနေန ဟုတွာတိ အတ္ထော. အဒွယေနာတိ ဒွေ ကောဋ္ဌာသေ ကတွာ အကတေန. ယထာ ဟိ ဧကော သမ္မုခါဝ ကရောတိ န ပရမ္မုခါ၊ ဧကော ပရမ္မုခါဝ ကရောတိ န သမ္မုခါ ဧဝံ ဝိဘာဂံ အကတွာ ကတေနာတိ ဝုတ္တံ ဟောတိ. အပ္ပမာဏေနာတိ ပမာဏဝိရဟိတေန. စက္ကဝါဠမ္ပိ ဟိ အတိသမ္ဗာဓံ၊ ဘဝဂ္ဂမ္ပိ အတိနီစံ၊ တယာ ကတံ ကာယကမ္မမေဝ ဗဟုန္တိ ဒဿေတိ.

မေတ္တေန ဝစီကမ္မေနာတိ မေတ္တစိတ္တဝသေန ပဝတ္တိတေန မုခဓောဝနကာလာရောစနာဒိနာ ဝစီကမ္မေန. အပိ စ ဩဝါဒံ သုတွာ – ‘‘သာဓု၊ ဘန္တေ’’တိ ဝစနမ္ပိ မေတ္တံ ဝစီကမ္မမေဝ. မေတ္တေန မနောကမ္မေနာတိ ကာလဿေဝ သရီရပဋိဇဂ္ဂနံ ကတွာ ဝိဝိတ္တာသနေ နိသီဒိတွာ – ‘‘သတ္ထာ အရောဂေါ ဟောတု၊ အဗျာပဇ္ဇော သုခီ’’တိ ဧဝံ ပဝတ္တိတေန မနောကမ္မေန. ကတပုညောသီတိ ကပ္ပသတသဟဿံ အဘိနီဟာရသမ္ပန္နောသီတိ ဒဿေတိ. ကတပုညောသီတိ စ ဧတ္တာဝတာ ဝိဿတ္ထော မာ ပမာဒမာပဇ္ဇိ၊ အထ ခေါ ပဓာနမနုယုဉ္ဇ. ဧဝဉှိ အနုယုတ္တော ခိပ္ပံ ဟောဟိသိ အနာသဝေါ၊ ဓမ္မသင်္ဂီတိကာလေ အရဟတ္တံ ပါပုဏိဿသိ. န ဟိ မာဒိသဿ ကတပါရိစရိယာ နိပ္ဖလာ နာမ ဟောတီတိ ဒဿေတိ.

၂၀၈. ဧဝဉ္စ ပန ဝတွာ မဟာပထဝိံ ပတ္ထရန္တော ဝိယ အာကာသံ ဝိတ္ထာရေန္တော ဝိယ စက္ကဝါဠဂိရိံ ဩသာရေန္တော ဝိယ သိနေရုံ ဥက္ခိပေန္တော ဝိယ မဟာဇမ္ဗုံ ခန္ဓေ ဂဟေတွာ စာလေန္တော ဝိယ အာယသ္မတော အာနန္ဒဿ ဂုဏကထံ အာရဘန္တော အထ ခေါ ဘဂဝါ ဘိက္ခူ အာမန္တေသိ. တတ္ထ ‘‘ယေပိ တေ၊ ဘိက္ခဝေ၊ ဧတရဟီ’’တိ ကသ္မာ န ဝုတ္တံ? အညဿ ဗုဒ္ဓဿ နတ္ထိတာယ. ဧတေနေဝ စေတံ ဝေဒိတဗ္ဗံ – ‘‘ယထာ စက္ကဝါဠန္တရေပိ အညော ဗုဒ္ဓေါ နတ္ထီ’’တိ. ပဏ္ဍိတောတိ ဗျတ္တော. မေဓာဝီတိ ခန္ဓဓာတုအာယတနာဒီသု ကုသလော.

၂၀၉. ဘိက္ခုပရိသာ အာနန္ဒံ ဒဿနာယာတိ ယေ ဘဂဝန္တံ ပဿိတုကာမာ ထေရံ ဥပသင်္ကမန္တိ၊ ယေ စ ‘‘အာယသ္မာ ကိရာနန္ဒော သမန္တပါသာဒိကော အဘိရူပေါ ဒဿနီယော ဗဟုဿုတော သံဃသောဘနော’’တိ ထေရဿ ဂုဏေ သုတွာ အာဂစ္ဆန္တိ၊ တေ သန္ဓာယ ‘‘ဘိက္ခုပရိသာ အာနန္ဒံ ဒဿနာယ ဥပသင်္ကမန္တီ’’တိ ဝုတ္တံ. ဧသ နယော သဗ္ဗတ္ထ. အတ္တမနာတိ သဝနေန နော ဒဿနံ သမေတီတိ သကမနာ တုဋ္ဌစိတ္တာ. ဓမ္မန္တိ ‘‘ကစ္စိ၊ အာဝုသော၊ ခမနီယံ၊ ကစ္စိ ယာပနီယံ၊ ကစ္စိ ယောနိသော မနသိကာရေန ကမ္မံ ကရောထ၊ အာစရိယုပဇ္ဈာယေ ဝတ္တံ ပူရေထာ’’တိ ဧဝရူပံ ပဋိသန္ထာရဓမ္မံ. တတ္ထ ဘိက္ခုနီသု – ‘‘ကစ္စိ၊ ဘဂိနိယော၊ အဋ္ဌ ဂရုဓမ္မေ သမာဒါယ ဝတ္တထာ’’တိ ဣဒမ္ပိ နာနာကရဏံ ဟောတိ. ဥပါသကေသု အာဂတေသု ‘‘ဥပါသက၊ န တေ ကစ္စိ သီသံ ဝါ အင်္ဂံ ဝါ ရုဇ္ဇတိ၊ အရောဂါ တေ ပုတ္တဘာတရော’’တိ န ဧဝံ ပဋိသန္ထာရံ ကရောတိ. ဧဝံ ပန ကရောတိ – ‘‘ကထံ ဥပါသကာ တီဏိ သရဏာနိ ပဉ္စ သီလာနိ ရက္ခထ၊ မာသဿ အဋ္ဌ ဥပေါသထေ ကရောထ၊ မာတာပိတူနံ ဥပဋ္ဌာနဝတ္တံ ပူရေထ၊ ဓမ္မိကသမဏဗြာဟ္မဏေ ပဋိဇဂ္ဂထာ’’တိ. ဥပါသိကာသုပိ ဧသေဝ နယော.

ဣဒါနိ အာနန္ဒတ္ထေရဿ စက္ကဝတ္တိနာ သဒ္ဓိံ ဥပမံ ကရောန္တော စတ္တာရောမေ ဘိက္ခဝေတိအာဒိမာဟ. တတ္ထ ခတ္တိယာတိ အဘိသိတ္တာ စ အနဘိသိတ္တာ စ ခတ္တိယဇာတိကာ. တေ ကိရ – ‘‘ရာဇာ စက္ကဝတ္တီ နာမ အဘိရူပေါ ဒဿနီယော ပါသာဒိကော အာကာသေန ဝိစရန္တော ရဇ္ဇံ အနုသာသတိ ဓမ္မိကော ဓမ္မရာဇာ’’တိ တဿ ဂုဏကထံ သုတွာ ‘‘သဝနေန ဒဿနမ္ပိ သမ’’န္တိ အတ္တမနာ ဟောန္တိ. ဘာသတီတိ ကထေန္တော – ‘‘ကထံ၊ တာတာ၊ ရာဇဓမ္မံ ပူရေထ၊ ပဝေဏိံ ရက္ခထာ’’တိ ပဋိသန္ထာရံ ကရောတိ. ဗြာဟ္မဏေသု ပန – ‘‘ကထံ အာစရိယာ မန္တေ ဝါစေထ၊ ကထံ အန္တေဝါသိကာ မန္တေ ဂဏှန္တိ၊ ဒက္ခိဏံ ဝါ ဝတ္ထာနိ ဝါ ကပိလံ ဝါ အလတ္ထာ’’တိ ပဋိသန္ထာရံ ကရောတိ. ဂဟပတီသု – ‘‘ကထံ တာတာ၊ န ဝေါ ရာဇကုလတော ဒဏ္ဍေန ဝါ ဗလိနာ ဝါ ပီဠာ အတ္ထိ၊ သမ္မာ ဒေဝေါ ဓာရံ အနုပဝေစ္ဆတိ၊ သဿာနိ သမ္ပဇ္ဇန္တီ’’တိ ဧဝံ ပဋိသန္ထာရံ ကရောတိ. သမဏေသု – ‘‘ကထံ၊ ဘန္တေ၊ ပဗ္ဗဇိတပရိက္ခာရာ သုလဘာ၊ သမဏဓမ္မေ န ပမဇ္ဇထာ’’တိ ဧဝံ ပဋိသန္ထာရံ ကရောတိ.