အာနန္ဒပုစ္ဆာကထာဝဏ္ဏနာ

၂၀၃. အဒဿနံ၊ အာနန္ဒာတိ ယဒေတံ မာတုဂါမဿ အဒဿနံ၊ အယမေတ္ထ ဥတ္တမာ ပဋိပတ္တီတိ ဒဿေတိ. ဒွါရံ ပိဒဟိတွာ သေနာသနေ နိသိန္နော ဟိ ဘိက္ခု အာဂန္တွာ ဒွါရေ ဌိတမ္ပိ မာတုဂါမံ ယာဝ န ပဿတိ၊ တာဝဿ ဧကံသေနေဝ န လောဘော ဥပ္ပဇ္ဇတိ၊ န စိတ္တံ စလတိ. ဒဿနေ ပန သတိယေဝ တဒုဘယမ္ပိ အဿ. တေနာဟ – ‘‘အဒဿနံ အာနန္ဒာ’’တိ. ဒဿနေ ဘဂဝါ သတိ ကထန္တိ ဘိက္ခံ ဂဟေတွာ ဥပဂတဋ္ဌာနာဒီသု ဒဿနေ သတိ ကထံ ပဋိပဇ္ဇိတဗ္ဗန္တိ ပုစ္ဆတိ. အထ ဘဂဝါ ယသ္မာ ခဂ္ဂံ ဂဟေတွာ – ‘‘သစေ မယာ သဒ္ဓိံ အာလပသိ၊ ဧတ္ထေဝ တေ သီသံ ပါတေဿာမီ’’တိ ဌိတပုရိသေန ဝါ၊ ‘‘သစေ မယာ သဒ္ဓိံ အာလပသိ၊ ဧတ္ထေဝ တေ မံသံ မုရုမုရာပေတွာ ခါဒိဿာမီ’’တိ ဌိတယက္ခိနိယာ ဝါ အာလပိတုံ ဝရံ. ဧကဿေဝ ဟိ အတ္တဘာဝဿ တပ္ပစ္စယာ ဝိနာသော ဟောတိ၊ န အပါယေသု အပရိစ္ဆိန္နဒုက္ခာနုဘဝနံ. မာတုဂါမေန ပန အာလာပသလ္လာပေ သတိ ဝိဿာသော ဟောတိ၊ ဝိဿာသေ သတိ ဩတာရော ဟောတိ၊ ဩတိဏ္ဏစိတ္တော သီလဗျသနံ ပတွာ အပါယပူရကော ဟောတိ၊ တသ္မာ အနာလာပေါတိ အာဟ. ဝုတ္တမ္ပိ စေတံ –

‘‘သလ္လပေ အသိဟတ္ထေန၊ ပိသာစေနာပိ သလ္လပေ၊

အာသီဝိသမ္ပိ အာသီဒေ၊ ယေန ဒဋ္ဌော န ဇီဝတိ၊

န တွေဝ ဧကော ဧကာယ၊ မာတုဂါမေန သလ္လပေ’’တိ. (အ. နိ. ၅.၅၅)၊

အာလပန္တေန ပနာတိ သစေ မာတုဂါမော ဒိဝသံ ဝါ ပုစ္ဆတိ၊ သီလံ ဝါ ယာစတိ၊ ဓမ္မံ ဝါ သောတုကာမော ဟောတိ၊ ပဉှံ ဝါ ပုစ္ဆတိ၊ တထာရူပံ ဝါ ပနဿ ပဗ္ဗဇိတေဟိ ကတ္တဗ္ဗကမ္မံ ဟောတိ၊ ဧဝရူပေ ကာလေ အနာလပန္တံ ‘‘မူဂေါ အယံ၊ ဗဓိရော အယံ၊ ဘုတွာဝ ဗဒ္ဓမုခေါ နိသီဒတီ’’တိ ဝဒတိ၊ တသ္မာ အဝဿံ အာလပိတဗ္ဗံ ဟောတိ. ဧဝံ အာလပန္တေန ပန ကထံ ပဋိပဇ္ဇိတဗ္ဗန္တိ ပုစ္ဆတိ. အထ ဘဂဝါ – ‘‘ဧထ တုမှေ၊ ဘိက္ခဝေ၊ မာတုမတ္တီသု မာတုစိတ္တံ ဥပဋ္ဌပေထ၊ ဘဂိနိမတ္တီသု ဘဂိနိစိတ္တံ ဥပဋ္ဌပေထ၊ ဓီတုမတ္တီသု ဓီတုစိတ္တံ ဥပဋ္ဌပေထာ’’တိ (သံ. နိ. ၄.၁၂၇) ဣမံ ဩဝါဒံ သန္ဓာယ သတိ၊ အာနန္ဒ၊ ဥပဋ္ဌပေတဗ္ဗာတိ အာဟ.

၂၀၄. အဗျာဝဋာတိ အတန္တိဗဒ္ဓါ နိရုဿုက္ကာ ဟောထ. သာရတ္ထေ ဃဋထာတိ ဥတ္တမတ္ထေ အရဟတ္တေ ဃဋေထ. အနုယုဉ္ဇထာတိ တဒဓိဂမာယ အနုယောဂံ ကရောထ. အပ္ပမတ္တာတိ တတ္ထ အဝိပ္ပမုဋ္ဌသတီ. ဝီရိယာတာပယောဂေန အာတာပိနော. ကာယေ စ ဇီဝိတေ စ နိရပေက္ခတာယ ပဟိတတ္တာ ပေသိတစိတ္တာ ဝိဟရထ.

၂၀၅. ကထံ ပန၊ ဘန္တေတိ တေဟိ ခတ္တိယပဏ္ဍိတာဒီဟိ ကထံ ပဋိပဇ္ဇိတဗ္ဗံ. အဒ္ဓါ မံ တေ ပဋိပုစ္ဆိဿန္တိ – ‘‘ကထံ၊ ဘန္တေ၊ အာနန္ဒ တထာဂတဿ သရီရေ ပဋိပဇ္ဇိတဗ္ဗ’’န္တိ၊ ‘‘တေသာဟံ ကထံ ပဋိဝစနံ ဒေမီ’’တိ ပုစ္ဆတိ. အဟတေန ဝတ္ထေနာတိ နဝေန ကာသိကဝတ္ထေန. ဝိဟတေန ကပ္ပါသေနာတိ သုပေါထိတေန ကပ္ပါသေန. ကာသိကဝတ္ထဉှိ သုခုမတ္တာ တေလံ န ဂဏှာတိ၊ ကပ္ပါသော ပန ဂဏှာတိ. တသ္မာ ‘‘ဝိဟတေန ကပ္ပါသေနာ’’တိ အာဟ. အာယသာယာတိ သောဝဏ္ဏာယ. သောဝဏ္ဏဉှိ ဣဓ ‘‘အယသ’’န္တိ အဓိပ္ပေတံ.