မဟာဘူမိစာလဝဏ္ဏနာ

၁၇၁. ယံ မဟာဝါတာတိ ယေန သမယေန ယသ္မိံ ဝါ သမယေ မဟာဝါတာ ဝါယန္တိ၊ မဟာဝါတာ ဝါယန္တာပိ ဥက္ခေပကဝါတာ နာမ ဥဋ္ဌဟန္တိ၊ တေ ဝါယန္တာ သဋ္ဌိသဟဿာဓိကနဝယောဇနသတသဟဿဗဟလံ ဥဒကသန္ဓာရကံ ဝါတံ ဥပစ္ဆိန္ဒန္တိ၊ တတော အာကာသေ ဥဒကံ ဘဿတိ၊ တသ္မိံ ဘဿန္တေ ပထဝီ ဘဿတိ. ပုန ဝါတော အတ္တနော ဗလေန အန္တောဓမကရဏေ ဝိယ ဥဒကံ အာဗန္ဓိတွာ ဂဏှာတိ၊ တတော ဥဒကံ ဥဂ္ဂစ္ဆတိ၊ တသ္မိံ ဥဂ္ဂစ္ဆန္တေ ပထဝီ ဥဂ္ဂစ္ဆတိ. ဧဝံ ဥဒကံ ကမ္ပိတံ ပထဝိံ ကမ္ပေတိ. ဧတဉ္စ ကမ္ပနံ ယာဝ အဇ္ဇကာလာပိ ဟောတိယေဝ၊ ဗဟလဘာဝေန ပန န ဩဂစ္ဆနုဂ္ဂစ္ဆနံ ပညာယတိ.

မဟိဒ္ဓိကော မဟာနုဘာဝေါတိ ဣဇ္ဈနဿ မဟန္တတာယ မဟိဒ္ဓိကော၊ အနုဘဝိတဗ္ဗဿ မဟန္တတာယ မဟာနုဘာဝေါ. ပရိတ္တာတိ ဒုဗ္ဗလာ. အပ္ပမာဏာတိ ဗလဝါ. သော ဣမံ ပထဝိံ ကမ္ပေတီတိ သော ဣဒ္ဓိံ နိဗ္ဗတ္တေတွာ သံဝေဇေန္တော မဟာမောဂ္ဂလ္လာနော ဝိယ၊ ဝီမံသန္တော ဝါ မဟာနာဂတ္ထေရဿ ဘာဂိနေယျော သင်္ဃရက္ခိတသာမဏေရော ဝိယ ပထဝိံ ကမ္ပေတိ. သော ကိရာယသ္မာ ခုရဂ္ဂေယေဝ အရဟတ္တံ ပတွာ စိန္တေသိ – ‘‘အတ္ထိ နု ခေါ ကောစိ ဘိက္ခု၊ ယေန ပဗ္ဗဇိတဒိဝသေယေဝ အရဟတ္တံ ပတွာ ဝေဇယန္တော ပါသာဒေါ ကမ္ပိတပုဗ္ဗော’’တိ? တတော – ‘‘နတ္ထိ ကောစီ’’တိ ဉတွာ – ‘‘အဟံ ကမ္ပေဿာမီ’’တိ အဘိညာဗလေန ဝေဇယန္တမတ္ထကေ ဌတွာ ပါဒေန ပဟရိတွာ ကမ္ပေတုံ နာသက္ခိ. အထ နံ သက္ကဿ နာဋကိတ္ထိယော အာဟံသု – ‘‘ပုတ္တ သင်္ဃရက္ခိတ၊ တွံ ပူတိဂန္ဓေနေဝ သီသေန ဝေဇယန္တံ ကမ္ပေတုံ ဣစ္ဆသိ၊ သုပ္ပတိဋ္ဌိတော တာတ ပါသာဒေါ၊ ကထံ ကမ္ပေတုံ သက္ခိဿသီ’’တိ?

သာမဏေရော – ‘‘ဣမာ ဒေဝတာ မယာ သဒ္ဓိံ ကေဠိံ ကရောန္တိ၊ အဟံ ခေါ ပန အာစရိယံ နာလတ္ထံ၊ ကဟံ နု ခေါ မေ အာစရိယော သာမုဒ္ဒိကမဟာနာဂတ္ထေရော’’တိ အာဝဇ္ဇေန္တော မဟာသမုဒ္ဒေ ဥဒကလေဏံ မာပေတွာ ဒိဝါဝိဟာရံ နိသိန္နောတိ ဉတွာ တတ္ထ ဂန္တွာ ထေရံ ဝန္ဒိတွာ အဋ္ဌာသိ. တတော နံ ထေရော – ‘‘ကိံ၊ တာတ သင်္ဃရက္ခိတ၊ အသိက္ခိတွာဝ ယုဒ္ဓံ ပဝိဋ္ဌောသီ’’တိ ဝတွာ ‘‘နာသက္ခိ၊ တာတ၊ ဝေဇယန္တံ ကမ္ပေတု’’န္တိ ပုစ္ဆိ. အာစရိယံ၊ ဘန္တေ၊ နာလတ္ထန္တိ. အထ နံ ထေရော – ‘‘တာတ တုမှာဒိသေ အကမ္ပေန္တေ ကော အညော ကမ္ပေဿတိ. ဒိဋ္ဌပုဗ္ဗံ တေ၊ တာတ၊ ဥဒကပိဋ္ဌေ ဂေါမယခဏ္ဍံ ပိလဝန္တံ၊ တာတ၊ ကပလ္လကပူဝံ ပစန္တာ အန္တန္တေန ပရိစ္ဆိန္ဒန္တိ၊ ဣမိနာ ဩပမ္မေန ဇာနာဟီ’’တိ အာဟ. သော – ‘‘ဝဋ္ဋိဿတိ၊ ဘန္တေ၊ ဧတ္တကေနာ’’တိ ဝတွာ ပါသာဒေန ပတိဋ္ဌိတောကာသံ ဥဒကံ ဟောတူတိ အဓိဋ္ဌာယ ဝေဇယန္တာဘိမုခေါ အဂမာသိ.

ဒေဝဓီတရော တံ ဒိသွာ – ‘‘ဧကဝါရံ လဇ္ဇိတွာ ဂတော၊ ပုနပိ သာမဏေရော ဧတိ၊ ပုနပိ ဧတီ’’တိ ဝဒိံသု. သက္ကော ဒေဝရာဇာ – ‘‘မာ မယှံ ပုတ္တေန သဒ္ဓိံ ကထယိတ္ထ၊ ဣဒါနိ တေန အာစရိယော လဒ္ဓေါ၊ ခဏေန ပါသာဒံ ကမ္ပေဿတီ’’တိ အာဟ. သာမဏေရောပိ ပါဒင်္ဂုဋ္ဌေန ပါသာဒထူပိကံ ပဟရိ. ပါသာဒေါ စတူဟိ ဒိသာဟိ ဩဏမတိ. ဒေဝတာ – ‘‘ပတိဋ္ဌာတုံ ဒေဟိ၊ တာတ၊ ပါသာဒဿ ပတိဋ္ဌာတုံ ဒေဟိ၊ တာတ၊ ပါသာဒဿာ’’တိ ဝိရဝိံသု. သာမဏေရော ပါသာဒံ ယထာဌာနေ ဌပေတွာ ပါသာဒမတ္ထကေ ဌတွာ ဥဒါနံ ဥဒါနေသိ –

‘‘အဇ္ဇေဝါဟံ ပဗ္ဗဇိတော၊ အဇ္ဇ ပတ္တာသဝက္ခယံ၊

အဇ္ဇ ကမ္ပေမိ ပါသာဒံ၊ အဟော ဗုဒ္ဓဿုဠာရတာ.

အဇ္ဇေဝါဟံ ပဗ္ဗဇိတော။ပေ။ အဟော ဓမ္မဿုဠာရတာ.

အဇ္ဇေဝါဟံ ပဗ္ဗဇိတော။ပေ။ အဟော သံဃဿုဠာရတာတိ.

ဣတော ပရေသု ဆသု ပထဝီကမ္ပေသု ယံ ဝတ္တဗ္ဗံ၊ တံ မဟာပဒါနေ ဝုတ္တမေဝ.

ဣတိ ဣမေသု အဋ္ဌသု ပထဝီကမ္ပေသု ပဌမော ဓာတုကောပေန၊ ဒုတိယော ဣဒ္ဓါနုဘာဝေန၊ တတိယစတုတ္ထာ ပုညတေဇေန၊ ပဉ္စမော ဉာဏတေဇေန၊ ဆဋ္ဌော သာဓုကာရဒါနဝသေန၊ သတ္တမော ကာရုညဘာဝေန၊ အဋ္ဌမော အာရောဒနေန. မာတုကုစ္ဆိံ ဩက္ကမန္တေ စ တတော နိက္ခမန္တေ စ မဟာသတ္တေ တဿ ပုညတေဇေန ပထဝီ အကမ္ပိတ္ထ. အဘိသမ္ဗောဓိယံ ဉာဏတေဇေန အဘိဟတာ ဟုတွာ အကမ္ပိတ္ထ. ဓမ္မစက္ကပ္ပဝတ္တနေ သာဓုကာရဘာဝသဏ္ဌိတာ သာဓုကာရံ ဒဒမာနာ အကမ္ပိတ္ထ. အာယုသင်္ခါရောဿဇ္ဇနေ ကာရုညသဘာဝသဏ္ဌိတာ စိတ္တသင်္ခေါဘံ အသဟမာနာ အကမ္ပိတ္ထ. ပရိနိဗ္ဗာနေ အာရောဒနဝေဂတုန္နာ ဟုတွာ အကမ္ပိတ္ထ. အယံ ပနတ္ထော ပထဝီဒေဝတာယ ဝသေန ဝေဒိတဗ္ဗော၊ မဟာဘူတပထဝိယာ ပနေတံ နတ္ထိ အစေတနတ္တာတိ.

ဣမေ ခေါ၊ အာနန္ဒ၊ အဋ္ဌ ဟေတူတိ ဧတ္ထ ဣမေတိ နိဒ္ဒိဋ္ဌနိဒဿနံ. ဧတ္တာဝတာ စ ပနာယသ္မာ အာနန္ဒော – ‘‘အဒ္ဓါ အဇ္ဇ ဘဂဝတာ အာယုသင်္ခါရော ဩဿဋ္ဌော’’တိ သလ္လက္ခေသိ. ဘဂဝါ ပန သလ္လက္ခိတဘာဝံ ဇာနန္တောပိ ဩကာသံ အဒတွာဝ အညာနိပိ အဋ္ဌကာနိ သမ္ပိဏ္ဍေန္တော – ‘‘အဋ္ဌ ခေါ ဣမာ’’တိအာဒိမာဟ.