၄. ဓမ္မဒဿနဝါရဝဏ္ဏနာ

၁၀၀၇. စတုတ္ထဝါရေ ဧကာဒသာယတနာနီတိ သဒ္ဒါယတနဝဇ္ဇာနိ. တဉှိ ဧကန္တေန ပဋိသန္ဓိယံ နုပ္ပဇ္ဇတိ. ဣမိနာ နယေန သဗ္ဗတ္ထ အတ္ထော ဝေဒိတဗ္ဗော. သတ္တကေ ‘‘ဒေဝါနံ အသုရာန’’န္တိ ဂတိဝသေန အဝတွာ အဝိသေသေန ဂဗ္ဘသေယျကာနန္တိ ဝုတ္တံ. တသ္မာ ယတ္ထ ယတ္ထ ဂဗ္ဘသေယျကာ သမ္ဘဝန္တိ တတ္ထ တတ္ထ တေသံ သတ္တာယတနာနိ ဝေဒိတဗ္ဗာနိ. တထာ ဓာတုယော. သေသမေတ္ထ ဥတ္တာနတ္ထမေဝ. ပဉ္စမဝါရေ ယံ ဝတ္တဗ္ဗံ တံ ဓမ္မသင်္ဂဟဋ္ဌကထာယံ ဝုတ္တမေဝ.