(၃.) တိကနိဒ္ဒေသဝဏ္ဏနာ

၉၀၉. တိကနိဒ္ဒေသေ တီဟိ အကုသလမူလေဟိ ဝဋ္ဋမူလသမုဒါစာရော ကထိတော. အကုသလဝိတက္ကာဒီသု ဝိတက္ကနဝသေန ဝိတက္ကော၊ သဉ္ဇာနနဝသေန သညာ၊ သဘာဝဋ္ဌေန ဓာတူတိ ဝေဒိတဗ္ဗာ. ဒုစ္စရိတနိဒ္ဒေသေ ပဌမနယော ကမ္မပထဝသေန ဝိဘတ္တော၊ ဒုတိယော သဗ္ဗသင်္ဂါဟိကကမ္မဝသေန၊ တတိယော နိဗ္ဗတ္တိတစေတနာဝသေနေဝ.

၉၁၄. အာသဝနိဒ္ဒေသေ သုတ္တန္တပရိယာယေန တယောဝ အာသဝါ ကထိတာ.

၉၁၉. ဧသနာနိဒ္ဒေသေ သင်္ခေပတော တတ္ထ ကတမာ ကာမေသနာတိ အာဒိနာ နယေန ဝုတ္တော ကာမဂဝေသနရာဂေါ ကာမေသနာ. ယော ဘဝေသု ဘဝစ္ဆန္ဒောတိအာဒိနာ နယေန ဝုတ္တော ဘဝဂဝေသနရာဂေါ ဘဝေသနာ. သဿတော လောကောတိအာဒိနာ နယေန ဝုတ္တာ ဒိဋ္ဌိဂတိကသမ္မတဿ ဗြဟ္မစရိယဿ ဂဝေသနာ ဒိဋ္ဌိ ဗြဟ္မစရိယေသနာတိ ဝေဒိတဗ္ဗာ. ယသ္မာ စ န ကေဝလံ ရာဂဒိဋ္ဌိယော ဧဝ ဧသနာ၊ တဒေကဋ္ဌံ ပန ကမ္မမ္ပိ ဧသနာ ဧဝ၊ တသ္မာ တံ ဒဿေတုံ ဒုတိယနယော ဝိဘတ္တော. တတ္ထ တဒေကဋ္ဌန္တိ သမ္ပယုတ္တေကဋ္ဌံ ဝေဒိတဗ္ဗံ. တတ္ထ ကာမရာဂေကဋ္ဌံ ကာမာဝစရသတ္တာနမေဝ ပဝတ္တတိ၊ ဘဝရာဂေကဋ္ဌံ ပန မဟာဗြဟ္မာနံ. သမာပတ္တိတော ဝုဋ္ဌာယ စင်္ကမန္တာနံ ဈာနင်္ဂါနံ အဿာဒနကာလေ အကုသလကာယကမ္မံ ဟောတိ၊ ‘အဟော သုခံ အဟော သုခ’န္တိ ဝါစံ ဘိန္ဒိတွာ အဿာဒနကာလေ ဝစီကမ္မံ၊ ကာယင်္ဂဝါစင်္ဂါနိ အစောပေတွာ မနသာဝ အဿာဒနကာလေ မနောကမ္မံ. အန္တဂ္ဂါဟိကဒိဋ္ဌိဝသေန သဗ္ဗေသမ္ပိ ဒိဋ္ဌိဂတိကာနံ စင်္ကမနာဒိဝသေန တာနိ ဟောန္တိယေဝ.

၉၂၀. ဝိဓာနိဒ္ဒေသေ ‘‘ကထံဝိဓံ သီလဝန္တံ ဝဒန္တိ၊ ကထံဝိဓံ ပညဝန္တံ ဝဒန္တီ’’တိအာဒီသု (သံ. နိ. ၁.၉၅) အာကာရသဏ္ဌာနံ ဝိဓာ နာမ. ‘‘ဧကဝိဓေန ဉာဏဝတ္ထူ’’တိအာဒီသု (ဝိဘ. ၇၅၁) ကောဋ္ဌာသော. ‘‘ဝိဓာသု န ဝိကမ္ပတီ’’တိအာဒီသု (ထေရဂါ. ၁၀၇၉) မာနော. ဣဓာပိ မာနောဝ ဝိဓာ နာမ. သော ဟိ သေယျာဒိဝသေန ဝိဒဟနတော ဝိဓာတိ ဝုစ္စတိ. ဌပနဋ္ဌေန ဝါ ဝိဓာ. တသ္မာ ‘သေယျောဟမသ္မီ’တိ ဧဝံ ဥပ္ပန္နာ မာနဝိဓာ မာနဌပနာ သေယျောဟမသ္မီတိ ဝိဓာတိ ဝေဒိတဗ္ဗာ. သေသပဒဒွယေသုပိ ဧသေဝ နယော.

၉၂၁. ဘယနိဒ္ဒေသေ ဇာတိံ ပဋိစ္စ ဘယန္တိ ဇာတိပစ္စယာ ဥပ္ပန္နဘယံ. ဘယာနကန္တိ အာကာရနိဒ္ဒေသော. ဆမ္ဘိတတ္တန္တိ ဘယဝသေန ဂတ္တစလနံ. လောမဟံသောတိ လောမာနံ ဟံသနံ၊ ဥဒ္ဓဂ္ဂဘာဝေါ. ဣမိနာ ပဒဒွယေန ကိစ္စတော ဘယံ ဒဿေတွာ ပုန စေတသော ဥတြာသောတိ သဘာဝတော ဒဿိတံ.

၉၂၂. တမနိဒ္ဒေသေ ဝိစိကိစ္ဆာသီသေန အဝိဇ္ဇာ ကထိတာ. ‘‘တမန္ဓကာရော သမ္မောဟော၊ အဝိဇ္ဇောဃော မဟဗ္ဘယော’’တိ ဝစနတော ဟိ အဝိဇ္ဇာ တမော နာမ. တိဏ္ဏံ ပန အဒ္ဓါနံ ဝသေန ဒေသနာသုခတာယ ဝိစိကိစ္ဆာသီသေန ဒေသနာ ကတာ. တတ္ထ ‘ကိံ နု ခေါ အဟံ အတီတေ ခတ္တိယော အဟောသိံ ဥဒါဟု ဗြာဟ္မဏော ဝေဿော သုဒ္ဒေါ ကာဠော ဩဒါတော ရဿော ဒီဃော’တိ ကင်္ခန္တော အတီတံ အဒ္ဓါနံ အာရဗ္ဘ ကင်္ခတိ နာမ. ‘ကိံ နု ခေါ အဟံ အနာဂတေ ခတ္တိယော ဘဝိဿာမိ ဥဒါဟု ဗြာဟ္မဏော ဝေဿော။ပေ။ ဒီဃော’တိ ကင်္ခန္တော အနာဂတံ အဒ္ဓါနံ အာရဗ္ဘ ကင်္ခတိ နာမ. ‘ကိံ နု ခေါ အဟံ ဧတရဟိ ခတ္တိယော ဥဒါဟု ဗြာဟ္မဏော ဝေဿော သုဒ္ဒေါ၊ ကိံ ဝါ အဟံ ရူပံ ဥဒါဟု ဝေဒနာ သညာ သင်္ခါရာ ဝိညာဏ’န္တိ ကင်္ခန္တော ပစ္စုပ္ပန္နံ အဒ္ဓါနံ အာရဗ္ဘ ကင်္ခတိ နာမ.

တတ္ထ ကိဉ္စာပိ ခတ္တိယော ဝါ အတ္တနော ခတ္တိယဘာဝံ၊ ဗြာဟ္မဏော ဝါ ဗြာဟ္မဏဘာဝံ၊ ဝေဿော ဝါ ဝေဿဘာဝံ၊ သုဒ္ဒေါ ဝါ သုဒ္ဒဘာဝံ အဇာနနကော နာမ နတ္ထိ၊ ဇီဝလဒ္ဓိကော ပန သတ္တော ခတ္တိယဇီဝါဒီနံ ဝဏ္ဏာဒိဘေဒံ သုတွာ ‘ကီဒိသော နု ခေါ အမှာကံ အဗ္ဘန္တရေ ဇီဝေါ – ကိံ နု ခေါ နီလကော ဥဒါဟု ပီတကော လောဟိတကော ဩဒါတော စတုရံသော ဆဠံသော အဋ္ဌံသော’တိ ကင်္ခန္တော ဧဝံ ကင်္ခတိ နာမ.

၉၂၃. တိတ္ထာယတနာနီတိ တိတ္ထဘူတာနိ အာယတနာနိ၊ တိတ္ထိယာနံ ဝါ အာယတနာနိ. တတ္ထ တိတ္ထံ နာမ ဒွါသဋ္ဌိ ဒိဋ္ဌိယော. တိတ္ထိယာ နာမ ယေသံ တာ ဒိဋ္ဌိယော ရုစ္စန္တိ ခမန္တိ. အာယတနဋ္ဌော ဟေဋ္ဌာ ဝုတ္တောယေဝ. တတ္ထ ယသ္မာ သဗ္ဗေပိ ဒိဋ္ဌိဂတိကာ သဉ္ဇာယမာနာ ဣမေသုယေဝ တီသု ဌာနေသု သဉ္ဇာယန္တိ၊ သမောသရမာနာပိ ဧတေသုယေဝ သမောသရန္တိ သန္နိပတန္တိ၊ ဒိဋ္ဌိဂတိကဘာဝေ စ နေသံ ဧတာနိယေဝ ကာရဏာနိ၊ တသ္မာ တိတ္ထာနိ စ တာနိ သဉ္ဇာတာနီတိအာဒိနာ အတ္ထေန အာယတနာနိ စာတိ တိတ္ထာယတနာနိ၊ တေနေဝတ္ထေန တိတ္ထိယာနံ အာယတနာနီတိပိ တိတ္ထာယတနာနိ. ပုရိသပုဂ္ဂလောတိ သတ္တော. ကာမဉ္စ ပုရိသောတိပိ ပုဂ္ဂလောတိပိ ဝုတ္တေ သတ္တောယေဝ ဝုတ္တော၊ အယံ ပန သမ္မုတိကထာ နာမ ယော ယထာ ဇာနာတိ တဿ တထာ ဝုစ္စတိ. ပဋိသံဝေဒေတီတိ အတ္တနော သန္တာနေ ဥပ္ပန္နံ ဇာနာတိ၊ ပဋိသံဝိဒိတံ ကရောတိ အနုဘဝတိ ဝါ. ပုဗ္ဗေကတဟေတူတိ ပုဗ္ဗေ ကတကာရဏာ၊ ပုဗ္ဗေ ကတကမ္မပစ္စယေနေဝ ပဋိသံဝေဒေတီတိ အတ္ထော. အယံ နိဂဏ္ဌသမယော. ဧဝံဝါဒိနော ပန တေ ကမ္မဝေဒနဉ္စ ကိရိယဝေဒနဉ္စ ပဋိက္ခိပိတွာ ဧကံ ဝိပါကဝေဒနမေဝ သမ္ပဋိစ္ဆန္တိ. ပိတ္တသမုဋ္ဌာနာဒီသု (မဟာနိ. ၅) စ အဋ္ဌသု အာဗာဓေသု သတ္တ ပဋိက္ခိပိတွာ အဋ္ဌမံယေဝ သမ္ပဋိစ္ဆန္တိ၊ ဒိဋ္ဌဓမ္မဝေဒနီယာဒီသု စ တီသု ကမ္မေသု ဒွေ ပဋိက္ခိပိတွာ ဧကံ အပရာပရိယဝေဒနီယမေဝ သမ္ပဋိစ္ဆန္တိ၊ ကုသလာကုသလဝိပါကကိရိယသင်္ခါတာသု စ စတူသု စေတနာသု ဝိပါကစေတနံယေဝ သမ္ပဋိစ္ဆန္တိ.

ဣဿရနိမ္မာနဟေတူတိ ဣဿရနိမ္မာနကာရဏာ၊ ဗြဟ္မုနာ ဝါ ပဇာပတိနာ ဝါ ဣဿရေန နိမ္မိတတ္တာ ပဋိသံဝေဒေတီတိ အတ္ထော. အယံ ဗြာဟ္မဏသမယော. အယဉှိ နေသံ အဓိပ္ပါယော – ဣမာ တိဿော ဝေဒနာ ပစ္စုပ္ပန္နေ အတ္တနာ ကတမူလကေန ဝါ အာဏတ္တိမူလကေန ဝါ ပုဗ္ဗေ ကတေန ဝါ အဟေတုအပ္ပစ္စယာ ဝါ ပဋိသံဝေဒေတုံ နာမ န သက္ကာ၊ ဣဿရနိမ္မာနကာရဏာ ဧဝ ပန ဣမာ ပဋိသံဝေဒေတီတိ. ဧဝံဝါဒိနော ပနေတေ ဟေဋ္ဌာ ဝုတ္တေသု အဋ္ဌသု အာဗာဓေသု ဧကမ္ပိ အသမ္ပဋိစ္ဆိတွာ သဗ္ဗံ ပဋိဗာဟန္တိ. တထာ ဒိဋ္ဌဓမ္မဝေဒနီယာဒီသုပိ သဗ္ဗကောဋ္ဌာသေသု ဧကမ္ပိ အသမ္ပဋိစ္ဆိတွာ သဗ္ဗံ ပဋိဗာဟန္တိ.

အဟေတု အပ္ပစ္စယာတိ ဟေတုဉ္စ ပစ္စယဉ္စ ဝိနာ အကာရဏေနေဝ ပဋိသံဝေဒေတီတိ အတ္ထော. အယံ အာဇီဝကသမယော. ဧဝံ ဝါဒိနော ဧတေပိ ဟေဋ္ဌာ ဝုတ္တေသု ကာရဏေသု စ ဗျာဓီသု စ ဧကမ္ပိ အသမ္ပဋိစ္ဆိတွာ သဗ္ဗံ ပဋိက္ခိပန္တိ.

၉၂၄. ကိဉ္စနာတိ ပလိဗောဓာ. ရာဂေါ ကိဉ္စနန္တိ ရာဂေါ ဥပ္ပဇ္ဇမာနော သတ္တေ ဗန္ဓတိ ပလိဗုန္ဓေတိ၊ တသ္မာ ကိဉ္စနန္တိ ဝုစ္စတိ. ဒေါသမောဟေသုပိ ဧသေဝ နယော. အင်္ဂဏာနီတိ ‘‘ဥဒင်္ဂဏေ တတ္ထ ပပံ အဝိန္ဒု’’န္တိ (ဇာ. ၁.၁.၂) အာဂတဋ္ဌာနေ ဘူမိပ္ပဒေသော အင်္ဂဏံ. ‘‘တဿေဝ ရဇဿ ဝါ အင်္ဂဏဿ ဝါ ပဟာနာယ ဝါယမတီ’’တိ (မ. နိ. ၁.၁၈၄၊ အ. နိ. ၁၀.၅၁) အာဂတဋ္ဌာနေ ယံ ကိဉ္စိ မလံ ဝါ ပင်္ကော ဝါ. ‘‘သာင်္ဂဏောဝ သမာနော’’တိ (မ. နိ. ၁.၅၇) အာဂတဋ္ဌာနေ နာနပ္ပကာရော တိဗ္ဗကိလေသော. ဣဓာပိ တဒေဝ ကိလေသင်္ဂဏံ အဓိပ္ပေတံ. တေနေဝ ရာဂေါ အင်္ဂဏန္တိအာဒိမာဟ.

မလာနီတိ မလိနဘာဝကရဏာနိ. ရာဂေါ မလန္တိ ရာဂေါ ဥပ္ပဇ္ဇမာနော စိတ္တံ မလိနံ ကရောတိ၊ မလံ ဂါဟာပေတိ၊ တသ္မာ မလန္တိ ဝုစ္စတိ. ဣတရေသုပိ ဒွီသု ဧသေဝ နယော.

ဝိသမနိဒ္ဒေသေ ယသ္မာ ရာဂါဒီသု စေဝ ကာယဒုစ္စရိတာဒီသု စ သတ္တာ ပက္ခလန္တိ၊ ပက္ခလိတာ စ ပန သာသနတောပိ သုဂတိတောပိ ပတန္တိ၊ တသ္မာ ပက္ခလနပါတဟေတုတော ရာဂေါ ဝိသမန္တိအာဒိ ဝုတ္တံ.

အဂ္ဂီတိ အနုဒဟနဋ္ဌေန အဂ္ဂိ. ရာဂဂ္ဂီတိ ရာဂေါ ဥပ္ပဇ္ဇမာနော သတ္တေ အနုဒဟတိ ဈာပေတိ၊ တသ္မာ အဂ္ဂီတိ ဝုစ္စတိ. ဒေါသမောဟေသုပိ ဧသေဝ နယော. တတ္ထ ဝတ္ထူနိ – ဧကာ ကိရ ဒဟရဘိက္ခုနီ စိတ္တလပဗ္ဗတဝိဟာရေ ဥပေါသထာဂါရံ ဂန္တွာ ဒွါရပါလကရူပံ ဩလောကယမာနာ ဌိတာ. အထဿာ အန္တော ရာဂေါ ဥပ္ပန္နော. သာ တေနေဝ ဈာယိတွာ ကာလမကာသိ. ဘိက္ခုနိယော ဂစ္ဆမာနာ ‘အယံ ဒဟရာ ဌိတာ၊ ပက္ကောသထ န’န္တိ အာဟံသု. ဧကာ ဂန္တွာ ‘ကသ္မာ ဌိတာသီ’တိ ဟတ္ထေ ဂဏှိ. ဂဟိတမတ္တာ ပရိဝတ္တိတွာ ပတိတာ. ဣဒံ တာဝ ရာဂဿ အနုဒဟနတာယ ဝတ္ထု. ဒေါသဿ ပန အနုဒဟနတာယ မနောပဒေါသိကာ ဒေဝါ ဒဋ္ဌဗ္ဗာ. မောဟဿ အနုဒဟနတာယ ခိဍ္ဍာပဒေါသိကာ ဒေဝါ ဒဋ္ဌဗ္ဗာ. မောဟနဝသေန ဟိ တေသံ သတိသမ္မောသော ဟောတိ. တသ္မာ ခိဍ္ဍာဝသေန အာဟာရကာလံ အတိဝတ္တိတွာ ကာလံ ကရောန္တိ. ကသာဝါတိ ကသဋာ နိရောဇာ. ရာဂါဒီသု စ ကာယဒုစ္စရိတာဒီသု စ ဧကမ္ပိ ပဏီတံ ဩဇဝန္တံ နတ္ထိ၊ တသ္မာ ရာဂေါ ကသာဝေါတိအာဒိ ဝုတ္တံ.

၉၂၅. အဿာဒဒိဋ္ဌီတိ အဿာဒသမ္ပယုတ္တာ ဒိဋ္ဌိ. နတ္ထိ ကာမေသု ဒေါသောတိ ကိလေသကာမေန ဝတ္ထုကာမပဋိသေဝနဒေါသော နတ္ထီတိ ဝဒတိ. ပါတဗျတန္တိ ပါတဗ္ဗဘာဝံ ပရိဘုဉ္ဇနံ အဇ္ဈောဟရဏံ. ဧဝံဝါဒီ ဟိ သော ဝတ္ထုကာမေသု ကိလေသကာမံ ပိဝန္တော ဝိယ အဇ္ဈောဟရန္တော ဝိယ ပရိဘုဉ္ဇတိ. အတ္တာနုဒိဋ္ဌီတိ အတ္တာနံ အနုဂတာ ဒိဋ္ဌိ. မိစ္ဆာဒိဋ္ဌီတိ လာမကာ ဒိဋ္ဌိ. ဣဒါနိ ယသ္မာ ဧတ္ထ ပဌမာ သဿတဒိဋ္ဌိ ဟောတိ၊ ဒုတိယာ သက္ကာယဒိဋ္ဌိ၊ တတိယာ ဥစ္ဆေဒဒိဋ္ဌိ၊ တသ္မာ တမတ္ထံ ဒဿေတုံ သဿတဒိဋ္ဌိ အဿာဒဒိဋ္ဌီတိအာဒိမာဟ.

၉၂၆. အရတိနိဒ္ဒေသော စ ဝိဟေသာနိဒ္ဒေသော စ ဝုတ္တတ္ထောယေဝ. အဓမ္မဿ စရိယာ အဓမ္မစရိယာ၊ အဓမ္မကရဏန္တိ အတ္ထော. ဝိသမာ စရိယာ၊ ဝိသမဿ ဝါ ကမ္မဿ စရိယာတိ ဝိသမစရိယာ. ဒေါဝစဿတာပါပမိတ္တတာ နိဒ္ဒေသာ ဝုတ္တတ္ထာ ဧဝ. ပုထုနိမိတ္တာရမ္မဏေသု ပဝတ္တိတော နာနတ္တေသု သညာ နာနတ္တသညာ. ယသ္မာ ဝါ အညာဝ ကာမသညာ၊ အညာ ဗျာပါဒါဒိသညာ၊ တသ္မာ နာနတ္တာ သညာတိပိ နာနတ္တသညာ. ကောသဇ္ဇပမာဒနိဒ္ဒေသေသု ပဉ္စသု ကာမဂုဏေသု ဝိဿဋ္ဌစိတ္တဿ ကုသလဓမ္မဘာဝနာယ အနနုယောဂဝသေန လီနဝုတ္တိတာ ကောသဇ္ဇံ၊ ပမဇ္ဇနဝသေန ပမတ္တဘာဝေါ ပမာဒေါတိ ဝေဒိတဗ္ဗော. အသန္တုဋ္ဌိတာဒိနိဒ္ဒေသာ ဝုတ္တတ္ထာ ဧဝ.

၉၃၁. အနာဒရိယနိဒ္ဒေသေ ဩဝါဒဿ အနာဒိယနဝသေန အနာဒရဘာဝေါ အနာဒရိယံ. အနာဒရိယနာကာရော အနာဒရတာ. သဂရုဝါသံ အဝသနဋ္ဌေန အဂါရဝဘာဝေါ အဂါရဝတာ. သဇေဋ္ဌကဝါသံ အဝသနဋ္ဌေန အပ္ပတိဿဝတာ. အနဒ္ဒါတိ အနာဒိယနာ. အနဒ္ဒါယနာတိ အနာဒိယနာကာရော. အနဒ္ဒါယ အယိတဿ ဘာဝေါ အနဒ္ဒါယိတတ္တံ. အသီလဿ ဘာဝေါ အသီလျံ. အစိတ္တီကာရောတိ ဂရုစိတ္တီကာရဿ အကရဏံ.

၉၃၂. အဿဒ္ဓဘာဝေါ အဿဒ္ဓိယံ. အသဒ္ဒဟနာကာရော အသဒ္ဒဟနာ. ဩကပ္ပေတွာ အနုပဝိသိတွာ အဂ္ဂဟဏံ အနောကပ္ပနာ. အပ္ပသီဒနဋ္ဌေန အနဘိပ္ပသာဒေါ.

အဝဒညုတာတိ ထဒ္ဓမစ္ဆရိယဝသေန ‘ဒေဟိ၊ ကရောဟီ’တိ ဝစနဿ အဇာနတာ.

၉၃၄. ဗုဒ္ဓါ စ ဗုဒ္ဓသာဝကာ စာတိ ဧတ္ထ ဗုဒ္ဓဂ္ဂဟဏေန ပစ္စေကဗုဒ္ဓါပိ ဂဟိတာဝ. အသမေတုကမျတာတိ တေသံ သမီပံ အဂန္တုကာမတာ. သဒ္ဓမ္မံ အသောတုကမျတာတိ သတ္တတိံသ ဗောဓိပက္ခိယဓမ္မာ သဒ္ဓမ္မော နာမ၊ တံ အသုဏိတုကာမတာ. အနုဂ္ဂဟေတုကမျတာတိ န ဥဂ္ဂဟေတုကာမတာ.

ဥပါရမ္ဘစိတ္တတာတိ ဥပါရမ္ဘစိတ္တဘာဝေါ. ယသ္မာ ပန သော အတ္ထတော ဥပါရမ္ဘောဝ ဟောတိ၊ တသ္မာ တံ ဒဿေတုံ တတ္ထ ကတမော ဥပါရမ္ဘောတိအာဒိ ဝုတ္တံ. တတ္ထ ဥပါရမ္ဘနဝသေန ဥပါရမ္ဘော. ပုနပ္ပုနံ ဥပါရမ္ဘော အနုပါရမ္ဘော ဥပါရမ္ဘနာကာရော ဥပါရမ္ဘနာ. ပုနပ္ပုနံ ဥပါရမ္ဘနာ အနုပါရမ္ဘနာ. အနုပါရမ္ဘိတဿ ဘာဝေါ အနုပါရမ္ဘိတတ္တံ. ဥညာတိ ဟေဋ္ဌာ ကတွာ ဇာနနာ. အဝညာတိ အဝဇာနနာ. ပရိဘဝနံ ပရိဘဝေါ. ရန္ဓဿ ဂဝေသိတာ ရန္ဓဂဝေသိတာ. ရန္ဓံ ဝါ ဂဝေသတီတိ ရန္ဓဂဝေသီ၊ တဿ ဘာဝေါ ရန္ဓဂဝေသိတာ. အယံ ဝုစ္စတီတိ အယံ ပရဝဇ္ဇာနုပဿနလက္ခဏော ဥပါရမ္ဘော နာမ ဝုစ္စတိ၊ ယေန သမန္နာဂတော ပုဂ္ဂလော၊ ယထာ နာမ တုန္နကာရော သာဋကံ ပသာရေတွာ ဆိဒ္ဒမေဝ ဩလောကေတိ၊ ဧဝမေဝ ပရဿ သဗ္ဗေပိ ဂုဏေ မက္ခေတွာ အဂုဏေသုယေဝ ပတိဋ္ဌာတိ.

၉၃၆. အယောနိသော မနသိကာရောတိ အနုပါယမနသိကာရော. အနိစ္စေ နိစ္စန္တိ အနိစ္စေယေဝ ဝတ္ထုသ္မိံ ‘ဣဒံ နိစ္စ’န္တိ ဧဝံ ပဝတ္တော. ဒုက္ခေ သုခန္တိအာဒီသုပိ ဧသေဝ နယော. သစ္စဝိပ္ပဋိကုလေန စာတိ စတုန္နံ သစ္စာနံ အနနုလောမဝသေန. စိတ္တဿ အာဝဋ္ဋနာတိအာဒီနိ သဗ္ဗာနိပိ အာဝဇ္ဇနဿေဝ ဝေဝစနာနေဝ. အာဝဇ္ဇနဉှိ ဘဝင်္ဂစိတ္တံ အာဝဋ္ဋေတီတိ စိတ္တဿ အာဝဋ္ဋနာ. အနုအနု အာဝဋ္ဋေတီတိ အနာဝဋ္ဋနာ. အာဘုဇတီတိ အာဘောဂေါ. ဘဝင်္ဂါရမ္မဏတော အညံ အာရမ္မဏံ သမန္နာဟရတီတိ သမန္နာဟာရော. တဒေဝါရမ္မဏံ အတ္တာနံ အနုဗန္ဓိတွာ ဥပ္ပဇ္ဇမာနေ မနသိကရောတီတိ မနသိကာရော. ကရောတီတိ ဌပေတိ. အယံ ဝုစ္စတီတိ အယံ အနုပါယမနသိကာရော ဥပ္ပထမနသိကာရလက္ခဏော အယောနိသောမနသိကာရော နာမ ဝုစ္စတိ. တဿ ဝသေန ပုဂ္ဂလော ဒုက္ခာဒီနိ သစ္စာနိ ယာထာဝတော အာဝဇ္ဇိတုံ န သက္ကောတိ.

ကုမ္မဂ္ဂသေဝနာနိဒ္ဒေသေ ယံ ကုမ္မဂ္ဂံ သေဝတော သေဝနာ ကုမ္မဂ္ဂသေဝနာတိ ဝုစ္စတိ၊ တံ ဒဿေတုံ တတ္ထ ကတမော ကုမ္မဂ္ဂေါတိ ဒုတိယပုစ္ဆာ ကတာ. သေသံ သဗ္ဗတ္ထ ဥတ္တာနမေဝါတိ.

တိကနိဒ္ဒေသဝဏ္ဏနာ နိဋ္ဌိတာ.