(၂.) ဒုကနိဒ္ဒေသဝဏ္ဏနာ

၈၉၁. ဒုကေသု ကောဓနိဒ္ဒေသာဒယော ဟေဋ္ဌာ ဝုတ္တနယေနေဝ ဝေဒိတဗ္ဗာ. ဟေဋ္ဌာ အနာဂတေသု ပန ဥပနာဟနိဒ္ဒေသာဒီသု ပုဗ္ဗကာလံ ကောဓံ ဥပနယှတီတိ အပရကာလကောဓော ဥပနာဟော နာမ. ဥပနယှနာကာရော ဥပနယှနာ. ဥပနယှိတဿ ဘာဝေါ ဥပနယှိတတ္တံ. အဋ္ဌပနာတိ ပဌမုပ္ပန္နဿ အနန္တရဋ္ဌပနာ မရိယာဒဋ္ဌပနာ ဝါ. ဌပနာတိ ပကတိဌပနာ. သဏ္ဌပနာတိ သဗ္ဗတောဘာဂေန ပုနပ္ပုနံ အာဃာတဋ္ဌပနာ. အနုသံသန္ဒနာတိ ပဌမုပ္ပန္နေန ကောဓေန သဒ္ဓိံ အန္တရံ အဒဿေတွာ ဧကီဘာဝကရဏာ. အနုပ္ပဗန္ဓနာတိ ပုရိမေန သဒ္ဓိံ ပစ္ဆိမဿ ဃဋနာ. ဒဠှီကမ္မန္တိ ထိရကရဏံ. အယံ ဝုစ္စတီတိ အယံ ဥပနန္ဓနလက္ခဏော ဝေရံ အပ္ပဋိနိဿဇ္ဇနရသော ဥပနာဟောတိ ဝုစ္စတိ၊ ယေန သမန္နာဂတော ပုဂ္ဂလော ဝေရံ နိဿဇ္ဇိတုံ န သက္ကောတိ၊ ‘ဧဝံ နာမ မံ ဧသ ဝတ္တုံ အနနုစ္ဆဝိကော’တိ အပရာပရံ အနုဗန္ဓတိ၊ အာဒိတ္တပူတိအလာတံ ဝိယ ဇလတေဝ၊ ဓောဝိယမာနံ အစ္ဆစမ္မံ ဝိယ၊ ဝသာတေလမက္ခိတပိလောတိကာ ဝိယ စ န ပရိသုဇ္ဈတိ.

၈၉၂. မက္ခနဘာဝဝသေန မက္ခော၊ ပရဂုဏမက္ခနာယ ပဝတ္တေန္တောပိ အတ္တနော ကာရဏံ၊ ဂူထပဟရဏကံ ဂူထော ဝိယ၊ ပဌမတရံ မက္ခေတီတိ အတ္ထော. တတော ပရာ ဒွေ အာကာရဘာဝနိဒ္ဒေသာ. နိဋ္ဌုရဘာဝေါ နိဋ္ဌုရိယံ၊ ‘တံ နိဿာယ ဧတ္တကမ္ပိ နတ္ထီ’တိ ခေဠပါတနန္တိ အတ္ထော. နိဋ္ဌုရိယကမ္မန္တိ နိဋ္ဌုရိယကရဏံ. ဂဟဋ္ဌော ဝါ ဟိ ဂဟဋ္ဌံ၊ ဘိက္ခု ဝါ ဘိက္ခုံ နိဿာယ ဝသန္တော အပ္ပမတ္တကေနေဝ ကုဇ္ဈိတွာ ‘တံ နိဿာယ ဧတ္တကမ္ပိ နတ္ထီ’တိ ခေဠံ ပါတေတွာ ပါဒေန မဒ္ဒန္တော ဝိယ နိဋ္ဌုရိယံ နာမ ကရောတိ. တဿ တံ ကမ္မံ နိဋ္ဌုရိယကမ္မန္တိ ဝုစ္စတိ. လက္ခဏာဒိတော ပနေသ ပရဂုဏမက္ခနလက္ခဏော မက္ခော၊ တေသံ ဝိနာသနရသော၊ ပရေန သုကတာနံ ကိရိယာနံ အဝစ္ဆာဒနပစ္စုပဋ္ဌာနော.

ပဠာသတီတိ ပဠာသော၊ ပရဿ ဂုဏေ ဒဿေတွာ အတ္တနော ဂုဏေဟိ သမံ ကရောတီတိ အတ္ထော. ပဠာသဿ အာယနာ ပဠာသာယနာ. ပဠာသော စ သော အတ္တနော ဇယာဟရဏတော အာဟာရော စာတိ ပဠာသာဟာရော. ဝိဝါဒဋ္ဌာနန္တိ ဝိဝါဒကာရဏံ. ယုဂဂ္ဂါဟောတိ သမဓုရဂ္ဂဟဏံ. အပ္ပဋိနိဿဂ္ဂေါတိ အတ္တနာ ဂဟိတဿ အပ္ပဋိနိဿဇ္ဇနံ. လက္ခဏာဒိတော ပနေသ ယုဂဂ္ဂါဟလက္ခဏော ပဠာသော၊ ပရဂုဏေဟိ အတ္တနော ဂုဏာနံ သမကရဏရသော၊ ပရေသံ ဂုဏပ္ပမာဏေန ဥပဋ္ဌာနပစ္စုပဋ္ဌာနော. ပဠာသီ ဟိ ပုဂ္ဂလော ဒုတိယဿ ဓုရံ န ဒေတိ၊ သမံ ပသာရေတွာ တိဋ္ဌတိ၊ သာကစ္ဆမဏ္ဍလေ အညေန ဘိက္ခုနာ ဗဟူသု သုတ္တေသု စ ကာရဏေသု စ အာဘတေသုပိ ‘တဝ စ မမ စ ဝါဒေ ကိံ နာမ နာနာကရဏံ? နနု မဇ္ဈေ ဘိန္နသုဝဏ္ဏံ ဝိယ ဧကသဒိသမေဝ အမှာကံ ဝစန’န္တိ ဝဒတိ. ဣဿာမစ္ဆရိယနိဒ္ဒေသာ ဝုတ္တတ္ထာ ဧဝ.

၈၉၄. မာယာနိဒ္ဒေသေ ဝါစံ ဘာသတီတိ ဇာနံယေဝ ‘ပဏ္ဏတ္တိံ ဝီတိက္ကမန္တာ ဘိက္ခူ ဘာရိယံ ကရောန္တိ၊ အမှာကံ ပန ဝီတိက္ကမဋ္ဌာနံ နာမ နတ္ထီ’တိ ဥပသန္တော ဝိယ ဘာသတိ. ကာယေန ပရက္ကမတီတိ ‘မယာ ကတံ ဣဒံ ပါပကမ္မံ မာ ကေစိ ဇာနိံသူ’တိ ကာယေန ဝတ္တံ ကရောတိ. ဝိဇ္ဇမာနဒေါသပဋိစ္ဆာဒနတော စက္ခုမောဟနမာယာ ဝိယာတိ မာယာ. မာယာဝိနော ဘာဝေါ မာယာဝိတာ. ကတွာ ပါပံ ပုန ပဋိစ္ဆာဒနတော အတိစ္စ အာသရန္တိ ဧတာယ သတ္တာတိ အစ္စာသရာ. ကာယဝါစာကိရိယာဟိ အညထာ ဒဿနတော ဝဉ္စေတီတိ ဝဉ္စနာ. ဧတာယ သတ္တာ နိကရောန္တီတိ နိကတိ၊ မိစ္ဆာကရောန္တီတိ အတ္ထော. ‘နာဟံ ဧဝံ ကရောမီ’တိ ပါပါနံ ဝိက္ခိပနတော ဝိကိရဏာ. ‘နာဟံ ဧဝံ ကရောမီ’တိ ပရိဝဇ္ဇနတော ပရိဟရဏာ. ကာယာဒီဟိ သံဝရဏတော ဂူဟနာ. သဗ္ဗတောဘာဂေန ဂူဟနာ ပရိဂူဟနာ. တိဏပဏ္ဏေဟိ ဝိယ ဂူထံ ကာယဝစီကမ္မေဟိ ပါပံ ဆာဒေတီတိ ဆာဒနာ. သဗ္ဗတောဘာဂေန ဆာဒနာ ပဋိစ္ဆာဒနာ. န ဥတ္တာနံ ကတွာ ဒဿေတီတိ အနုတ္တာနီကမ္မံ. န ပါကဋံ ကတွာ ဒဿေတီတိ အနာဝိကမ္မံ. သုဋ္ဌု ဆာဒနာ ဝေါစ္ဆာဒနာ. ကတပဋိစ္ဆာဒနဝသေန ပုနပိ ပါပဿ ကရဏတော ပါပကိရိယာ. အယံ ဝုစ္စတီတိ အယံ ကတပဋိစ္ဆာဒနလက္ခဏာ မာယာ နာမ ဝုစ္စတိ၊ ယာယ သမန္နာဂတော ပုဂ္ဂလော ဘသ္မာပဋိစ္ဆန္နော ဝိယ အင်္ဂါရော၊ ဥဒကပဋိစ္ဆန္နော ဝိယ ခါဏု၊ ပိလောတိကာပလိဝေဌိတံ ဝိယ စ သတ္ထံ ဟောတိ.

သာဌေယျနိဒ္ဒေသေ သဌောတိ အသန္တဂုဏပရိဒီပနတော န သမ္မာ ဘာသိတာ. သဗ္ဗတောဘာဂေန သဌော ပရိသဌော. ယံ တတ္ထာတိ ယံ တသ္မိံ ပုဂ္ဂလေ. သဌန္တိ အသန္တဂုဏဒီပနံ ကေရာဋိယံ. သဌတာတိ သဌာကာရော. ကက္ကရတာတိ ပဒုမနာလိဿ ဝိယ အပရာမသနက္ခမော ခရဖရုသဘာဝေါ. ကက္ကရိယန္တိပိ တဿေဝ ဝေဝစနံ. ပရိက္ခတ္တတာ ပါရိက္ခတ္တိယန္တိ ပဒဒွယေန နိခဏိတွာ ဌပိတံ ဝိယ ဒဠှကေရာဋိယံ ဝုတ္တံ. ဣဒံ ဝုစ္စတီတိ ဣဒံ အတ္တနော အဝိဇ္ဇမာနဂုဏပ္ပကာသနလက္ခဏံ သာဌေယျံ နာမ ဝုစ္စတိ၊ ယေန သမန္နာဂတဿ ပုဂ္ဂလဿ ကုစ္ဆိံ ဝါ ပိဋ္ဌိံ ဝါ ဇာနိတုံ န သက္ကာ.

ဝါမေန သူကရော ဟောတိ၊ ဒက္ခိဏေန အဇာမိဂေါ၊

သရေန နေလကော ဟောတိ၊ ဝိသာဏေန ဇရဂ္ဂဝေါတိ.

ဧဝံ ဝုတ္တယက္ခသူကရသဒိသော ဟောတိ. အဝိဇ္ဇာဒိနိဒ္ဒေသာ ဝုတ္တတ္ထာ ဧဝ.

၉၀၂. အနဇ္ဇဝနိဒ္ဒေသေ အနဇ္ဇဝေါတိ အနုဇုတာကာရော. အနဇ္ဇဝဘာဝေါ အနဇ္ဇဝတာ. ဇိမှတာတိ စန္ဒဝင်္ကတာ. ဝင်္ကတာတိ ဂေါမုတ္တဝင်္ကတာ. ကုဋိလတာတိ နင်္ဂလကောဋိဝင်္ကတာ. သဗ္ဗေဟိပိ ဣမေဟိ ပဒေဟိ ကာယဝစီစိတ္တဝင်္ကတာဝ ကထိတာ.

အမဒ္ဒဝနိဒ္ဒေသေ န မုဒုဘာဝေါ အမုဒုတာ. အမဒ္ဒဝါကာရော အမဒ္ဒဝတာ. ကက္ခဠဘာဝေါ ကက္ခဠိယံ. မဒ္ဒဝကရဿ သိနေဟဿ အဘာဝတော ဖရုသဘာဝေါ ဖာရုသိယံ. အနီစဝုတ္တိတာယ ဥဇုကမေဝ ဌိတစိတ္တဘာဝေါ ဥဇုစိတ္တတာ. ပုန အမုဒုတာဂဟဏံ တဿာ ဝိသေသနတ္ထံ ‘အမုဒုတာသင်္ခါတာ ဥဇုစိတ္တတာ၊ န အဇ္ဇဝသင်္ခါတာ ဥဇုစိတ္တတာ’တိ.

၉၀၃. အက္ခန္တိနိဒ္ဒေသာဒယော ခန္တိနိဒ္ဒေသာဒိပဋိပက္ခတော ဝေဒိတဗ္ဗာ.

၉၀၈. သံယောဇနနိဒ္ဒေသေ အဇ္ဈတ္တန္တိ ကာမဘဝေါ. ဗဟိဒ္ဓါတိ ရူပါရူပဘဝေါ. ကိဉ္စာပိ ဟိ သတ္တာ ကာမဘဝေ အပ္ပံ ကာလံ ဝသန္တိ ကပ္ပဿ စတုတ္ထမေဝ ကောဋ္ဌာသံ၊ ဣတရေသု တီသု ကောဋ္ဌာသေသု ကာမဘဝေါ သုညော ဟောတိ တုစ္ဆော၊ ရူပါရူပဘဝေ ဗဟုံ ကာလံ ဝသန္တိ၊ တထာပိ နေသံ ယသ္မာ ကာမဘဝေ စုတိပဋိသန္ဓိယော ဗဟုကာ ဟောန္တိ၊ အပ္ပါ ရူပါရူပဘဝေသု၊ ယတ္ထ စ စုတိပဋိသန္ဓိယော ဗဟုကာ တတ္ထ အာလယောပိ ပတ္ထနာပိ အဘိလာသောပိ ဗဟု ဟောတိ၊ ယတ္ထ အပ္ပါ တတ္ထ အပ္ပေါ၊ တသ္မာ ကာမဘဝေါ အဇ္ဈတ္တံ နာမ ဇာတော၊ ရူပါရူပဘဝါ ဗဟိဒ္ဓါ နာမ. ဣတိ အဇ္ဈတ္တသင်္ခါတေ ကာမဘဝေ ဗန္ဓနံ အဇ္ဈတ္တသံယောဇနံ နာမ၊ ဗဟိဒ္ဓါသင်္ခါတေသု ရူပါရူပဘဝေသု ဗန္ဓနံ ဗဟိဒ္ဓါသံယောဇနံ နာမ. တတ္ထ ဧကေကံ ပဉ္စပဉ္စဝိဓံ ဟောတိ. တေန ဝုတ္တံ ‘‘ပဉ္စောရမ္ဘာဂိယာနိ ပဉ္စုဒ္ဓမ္ဘာဂိယာနီ’’တိ. တတြာယံ ဝစနတ္ထော – ဩရံ ဝုစ္စတိ ကာမဓာတု၊ တတ္ထ ဥပပတ္တိနိပ္ဖါဒနတော တံ ဩရံ ဘဇန္တီတိ ဩရမ္ဘာဂိယာနိ. ဥဒ္ဓံ ဝုစ္စတိ ရူပါရူပဓာတု၊ တတ္ထ ဥပပတ္တိနိပ္ဖါဒနတော တံ ဥဒ္ဓံ ဘဇန္တီတိ ဥဒ္ဓမ္ဘာဂိယာနီတိ.

ဒုကနိဒ္ဒေသဝဏ္ဏနာ.