၄. သင်္ခါရက္ခန္ဓနိဒ္ဒေသော

၂၀. သင်္ခါရက္ခန္ဓနိဒ္ဒေသေ ယေ ကေစိ သင်္ခါရာတိ စတုဘူမိကသင်္ခါရေ ပရိယာဒိယတိ. စက္ခုသမ္ဖဿဇာ စေတနာတိအာဒီနိ အတီတာဒိဝသေန နိဒ္ဒိဋ္ဌသင်္ခါရေ သဘာဝတော ဒဿေတုံ ဝုတ္တာနိ. စက္ခုသမ္ဖဿဇာတိအာဒီနိ ဝုတ္တတ္ထာနေဝ. စေတနာတိ ဟေဋ္ဌိမကောဋိယာ ပဓာနသင်္ခါရဝသေန ဝုတ္တံ. ဟေဋ္ဌိမကောဋိယာ ဟိ အန္တမသော စက္ခုဝိညာဏေန သဒ္ဓိံ ပါဠိယံ အာဂတာ စတ္တာရော သင်္ခါရာ ဥပ္ပဇ္ဇန္တိ. တေသု စေတနာ ပဓာနာ အာယူဟနဋ္ဌေန ပါကဋတ္တာ. တသ္မာ အယမေဝ ဂဟိတာ. တံသမ္ပယုတ္တသင်္ခါရာ ပန တာယ ဂဟိတာယ ဂဟိတာဝ ဟောန္တိ. ဣဓာပိ ပုရိမာ ပဉ္စ စက္ခုပသာဒါဒိဝတ္ထုကာဝ. မနောသမ္ဖဿဇာ ဟဒယဝတ္ထုကာပိ အဝတ္ထုကာပိ. သဗ္ဗာ စတုဘူမိကစေတနာ. သေသံ ဝေဒနာက္ခန္ဓသဒိသမေဝါတိ.

အယံ သင်္ခါရက္ခန္ဓနိဒ္ဒေသော.