၆. ဒုကဒုကပဋ္ဌာနဝဏ္ဏနာ

ဒုကဒုကပဋ္ဌာနေပိ ဟေတုသဟေတုကံ ဓမ္မံ ပဋိစ္စ ဟေတုသဟေတုကော ဓမ္မော ဥပ္ပဇ္ဇတိ ဟေတုပစ္စယာတိ ပဉှုဒ္ဓါရဝသေနေဝ သင်္ခေပတော ဒေသနာ ကတာ. တတ္ထ ဟေတုဒုကံ သဟေတုကဒုကာဒီဟိ၊ သဟေတုကဒုကာဒီနိ စ တေန သဒ္ဓိံ ယောဇိတာနိ. ဧကေကံ ပန ဒုကံ သေသေဟိ၊ သေသာ စ တေဟိ သဒ္ဓိံ ပဋိပါဋိယာ ယောဇေတဗ္ဗာ. ဣဒဉှိ ဒုကဒုကပဋ္ဌာနံ နာမ ‘ဒုကေသုယေဝ ဒုကေ ပက္ခိပိတွာ’ ဒေသိတံ. တေနေတ္ထ သဗ္ဗဒုကေဟိ သဒ္ဓိံ သဗ္ဗဒုကာနံ ယောဇနာ ဝေဒိတဗ္ဗာ. ပါဠိ ပန သင်္ခိတ္တာ. ယေန ယေန စ ပဒေန သဒ္ဓိံ ယံ ယံ ပဒံ ယောဇနံ န ဂစ္ဆတိ၊ တံ တံ ဟာပေတွာဝ ဒေသနာ ကတာတိ.

ဒုကဒုကပဋ္ဌာနဝဏ္ဏနာ.

ဧတ္တာဝတာ –

တိကဉ္စ ပဋ္ဌာနဝရံ ဒုကုတ္တမံ၊

ဒုကံ တိကဉ္စေဝ တိကံ ဒုကဉ္စ၊

တိကံ တိကဉ္စေဝ ဒုကံ ဒုကဉ္စ၊

ဆ အနုလောမမှိ နယာ သုဂမ္ဘီရာတိ. –

အဋ္ဌကထာယံ ဝုတ္တဂါထာယ ဒီပိတာ. ဓမ္မာနုလောမပဋ္ဌာနေ ဆ နယာ နိဒ္ဒိဋ္ဌာ ဟောန္တိ. ပစ္စယဝသေန ပနေတ္ထ ဧကေကသ္မိံ ပဋ္ဌာနေ အနုလောမာဒယော စတ္တာရော စတ္တာရော နယာတိ ဧကေန ပရိယာယေန စတုဝီသတိနယပဋိမဏ္ဍိတံ အနုလောမပဋ္ဌာနံယေဝ ဝေဒိတဗ္ဗံ.