မဟာဝါရော

၁. အနုသယဝါရဝဏ္ဏနာ

၃. သတ္တန္နံ ပန မဟာဝါရာနံ ပဌမေ အနုသယဝါရေ ယဿ ကာမရာဂါနုသယော အနုသေတိ၊ တဿ ပဋိဃာနုသယော အနုသေတီတိ ဧတ္ထ ယဒေတံ ‘‘အာမန္တာ’’တိ ပဋိဝစနံ ဒိန္နံ၊ တံ ဒုဒ္ဒိန္နံ ဝိယ ခါယတိ. ကသ္မာ? ကာမရာဂပဋိဃာနံ ဧကက္ခဏေ အနုပ္ပတ္တိတော. ယထာ ဟိ ‘‘ယဿ မနာယတနံ ဥပ္ပဇ္ဇတိ၊ တဿ ဓမ္မာယတနံ ဥပ္ပဇ္ဇတီတိ ‘အာမန္တာ’၊ အဿာသပဿာသာနံ ဥပ္ပါဒက္ခဏေ တေသံ ကာယသင်္ခါရော စ ဥပ္ပဇ္ဇတိ၊ ဝစီသင်္ခါရော စ ဥပ္ပဇ္ဇတီ’’တိအာဒီသု မနာယတနဓမ္မာယတနာနိ ကာယသင်္ခါရဝစီသင်္ခါရာ စ ဧကက္ခဏေ ဥပ္ပဇ္ဇန္တိ၊ န တထာ ကာမရာဂပဋိဃာ. ကာမရာဂေါ ဟိ အဋ္ဌသု လောဘသဟဂတစိတ္တုပ္ပါဒေသု ဥပ္ပဇ္ဇတိ. ပဋိဃော ဒွီသု ဒေါမနဿသဟဂတေသူတိ၊ နတ္ထိ နေသံ ဧကက္ခဏေ ဥပ္ပတ္တိ၊ တသ္မာ ဧတ္ထ ‘နော’တိ ပဋိသေဓော ကတ္တဗ္ဗော သိယာ. တံ အကတွာ ပန ‘အာမန္တာ’တိ ပဋိဝစနဿ ဒိန္နတ္တာ ဟေဋ္ဌာယမကေသု ဝိယ ဧတ္ထ ခဏပစ္စုပ္ပန္နဝသေန ဝတ္တမာနဝေါဟာရံ အဂ္ဂဟေတွာ အညထာ ဂဟေတဗ္ဗော.

ကထံ? အပ္ပဟီနဝသေန. အပ္ပဟီနတဉှိ သန္ဓာယ အယံ ‘‘အနုသေတီ’’တိ ဝတ္တမာနဝေါဟာရော ဝုတ္တော၊ န ခဏပစ္စုပ္ပန္နတံ. ယသ္မာ စ အပ္ပဟီနတံ သန္ဓာယ ဝုတ္တော၊ တသ္မာ ‘‘ယဿ ကာမရာဂါနုသယော အနုသေတိ၊ တဿ ပဋိဃာနုသယော အနုသေတီ’’တိ ပုစ္ဆာယ ယဿ ကာမရာဂါနုသယော အပ္ပဟီနော၊ န အနုပ္ပတ္တိဓမ္မတံ အာပါဒိတော၊ တဿ ပဋိဃာနုသယောပိ အပ္ပဟီနောတိ ဧဝမတ္ထော ဒဋ္ဌဗ္ဗော. ယသ္မာ စ တေသု ယဿေကော အပ္ပဟီနော၊ တဿ ဣတရောပိ အပ္ပဟီနောဝ ဟောတိ၊ တသ္မာ ‘‘အာမန္တာ’’တိ ဝုတ္တံ. ယဒိ ဧဝံ၊ ယံ ဥပရိ ဥပ္ပဇ္ဇနဝါရေ ‘ယဿ ကာမရာဂါနုသယော ဥပ္ပဇ္ဇတိ၊ တဿ ပဋိဃာနုသယော ဥပ္ပဇ္ဇတီ’တိ ပုစ္ဆိတွာ ‘အာမန္တာ’တိ ဝုတ္တံ၊ တတ္ထ ကထံ အတ္ထော ဂဟေတဗ္ဗောတိ? တတ္ထာပိ အပ္ပဟီနဝသေနေဝ ဥပ္ပတ္တိပစ္စယေ သတိ ဥပ္ပတ္တိယာ အနိဝါရိတဝသေန ဝါ. ယထာ ဟိ စိတ္တကမ္မာဒီနိ အာရဘိတွာ အပရိနိဋ္ဌိတကမ္မန္တာ စိတ္တကာရာဒယော တေသံ ကမ္မန္တာနံ အကရဏက္ခဏေပိ မိတ္တသုဟဇ္ဇာဒီဟိ ဒိဋ္ဌဒိဋ္ဌဋ္ဌာနေ ‘‘ဣမေသု ဒိဝသေသု ကိံ ကရောထာ’’တိ ဝုတ္တာ၊ ‘‘စိတ္တကမ္မံ ကရောမ၊ ကဋ္ဌကမ္မံ ကရောမာ’’တိ ဝဒန္တိ. တေ ကိဉ္စာပိ တသ္မိံ ခဏေ န ကရောန္တိ အဝိစ္ဆိန္နကမ္မန္တတ္တာ ပန ကတခဏဉ္စ ကတ္တဗ္ဗခဏဉ္စ ဥပါဒါယ ကရောန္တိယေဝ နာမ ဟောန္တိ. ဧဝမေဝ ယမှိ သန္တာနေ အနုသယာ အပ္ပဟီနာ၊ ယမှိ ဝါ ပန နေသံ သန္တာနေ ဥပ္ပတ္တိပစ္စယေ သတိ ဥပ္ပတ္တိ အနိဝါရိတာ၊ တတ္ထ အနုပ္ပဇ္ဇနက္ခဏေပိ ဥပ္ပန္နပုဗ္ဗဉ္စေဝ ကာလန္တရေ ဥပ္ပဇ္ဇနကဉ္စ ဥပါဒါယ ယဿ ကာမရာဂါနုသယော ဥပ္ပဇ္ဇတိ၊ တဿ ပဋိဃာနုသယော ဥပ္ပဇ္ဇတိယေဝ နာမာတိ ဧဝမတ္ထော ဝေဒိတဗ္ဗော. ဣတော ပရေသုပိ ဧဝရူပေသု ဝိဿဇ္ဇနေသု ဧသေဝ နယော. နော စ တဿာတိ ဣဒံ အနာဂါမိဿ ကာမရာဂဗျာပါဒါနံ အနဝသေသတော ပဟီနတ္တာ ဝုတ္တံ. တိဏ္ဏံ ပုဂ္ဂလာနန္တိ ပုထုဇ္ဇနသောတာပန္နသကဒါဂါမီနံ. ဒွိန္နံ ပုဂ္ဂလာနန္တိ သောတာပန္နသကဒါဂါမီနံ. ပရတောပိ ဧဝရူပေသု ဌာနေသု ဧသေဝ နယော.

၁၄. ဩကာသဝါရဿ ပဌမဒုတိယပုစ္ဆာသု ယသ္မာ ကာမရာဂါနုသယော ကာမဓာတုယာ ဒွီသု ဝေဒနာသု အနုသေတိ၊ ပဋိဃာနုသယော ဒုက္ခဝေဒနာယ၊ တသ္မာ ‘နော’တိ ပဋိသေဓော ကတော. တတိယပုစ္ဆာယံ ဥဘိန္နမ္ပိ ကာမဓာတုယာ ဒွီသု ဝေဒနာသု အနုသယနတော ‘အာမန္တာ’တိ ပဋိဝစနံ ဒိန္နံ. ရူပဓာတုအရူပဓာတုယာ ပန မာနာနုသယဿ ကာမရာဂါနုသယေန သဒ္ဓိံ အသာဓာရဏံ ဥပ္ပတ္တိဋ္ဌာနံ. တသ္မာ နော စ တတ္ထ ကာမရာဂါနုသယောတိ ဝုတ္တံ. ဣမိနာ နယေန သဗ္ဗေသံ ဥပ္ပတ္တိဋ္ဌာနဝါရံ ဩလောကေတွာ သာဓာရဏာသာဓာရဏံ ဥပ္ပတ္တိဋ္ဌာနံ ဝေဒိတဗ္ဗံ.

၂၀. ဒုကမူလကပုစ္ဆာယံ ယသ္မာ ကာမရာဂပဋိဃာနုသယာ နာပိ ဧကသ္မိံ ဌာနေ ဥပ္ပဇ္ဇန္တိ၊ န ဧကံ ဓမ္မံ အာရမ္မဏံ ကရောန္တိ၊ တသ္မာ နတ္ထီတိ ပဋိက္ခေပေါ ကတော. အယဉှေတ္ထ အဓိပ္ပါယော. ယသ္မိံ ဣမေ ဒွေ အနုသယာ အနုသယေယျုံ၊ တံ ဌာနမေဝ နတ္ထိ. တသ္မာ ‘‘ကတ္ထ မာနာနုသယော အနုသေတီ’’တိ အယံ ပုစ္ဆာ အပုစ္ဆာယေဝါတိ. အညေသုပိ ဧဝရူပေသု ဧသေဝ နယော.

၂၇. ပုဂ္ဂလောကာသဝါရေ စတုန္နန္တိ ပုထုဇ္ဇနသောတာပန္နသကဒါဂါမိအနာဂါမီနံ.

၃၆. ပဋိလောမနယေ ယဿ ကာမရာဂါနုသယော နာနုသေတီတိ အယံ ပုစ္ဆာ အနာဂါမိံ ဂဟေတွာ ပုစ္ဆတိ.

၅၆. ဒွိန္နံ ပုဂ္ဂလာနံ သဗ္ဗတ္ထ ကာမရာဂါနုသယော နာနုသေတီတိ အနာဂါမိအရဟန္တာနံ. ကာမဓာတုယာ တီသု ဝေဒနာသူတိ စ ဝေဒနာဂ္ဂဟဏေန ဝေဒနာသမ္ပယုတ္တကာနမ္ပိ တေသံ ဝတ္ထာရမ္မဏာနမ္ပီတိ သဗ္ဗေသမ္ပိ ကာမာဝစရဓမ္မာနံ ဂဟဏံ ဝေဒိတဗ္ဗံ. အယံ အနုသယဝါရေ ဝိနိစ္ဆယကထာ.

အနုသယဝါရဝဏ္ဏနာ.

၂. သာနုသယဝါရဝဏ္ဏနာ

၆၆-၁၃၁. သာနုသယဝါရေ ပန ယော ကာမရာဂါနုသယေန သာနုသယောတိ ယထာ ဧကန္တရိကဇရာဒိရောဂေန အာဗာဓိကော ယာဝ တမှာ ရောဂါ န မုစ္စတိ၊ တာဝ တဿ ရောဂဿ အနုပ္ပတ္တိက္ခဏေပိ သရောဂေါယေဝ နာမ ဟောတိ. ဧဝံ သသံကိလေသဿ ဝဋ္ဋဂါမိသတ္တဿ ယာဝ အရိယမဂ္ဂေန အနုသယာ သမုဂ္ဃါတံ န ဂစ္ဆန္တိ၊ တာဝ တေသံ အနုသယာနံ အနုပ္ပတ္တိက္ခဏေပိ သာနုသယောယေဝ နာမ ဟောတိ. ဧဝရူပံ သာနုသယတံ သန္ဓာယ ‘အာမန္တာ’တိ ဝုတ္တံ. သေသမေတ္ထ အနုသယဝါရသဒိသမေဝ.

ဩကာသဝါရေ ပန ‘‘ရူပဓာတုယာ အရူပဓာတုယာ ဧတ္ထ မာနာနုသယေန သာနုသယော’’တိ ဝုတ္တေ တာသု ဓာတူသု ပုဂ္ဂလဿ သာနုသယတာ ပညာယေယျ၊ အနုသယဿ ဥပ္ပတ္တိဋ္ဌာနံ န ပညာယေယျ. အနုသယဿ စ ဥပ္ပတ္တိဋ္ဌာနဒဿနတ္ထံ အယံ ဝါရော အာရဒ္ဓေါ၊ တသ္မာ တတော မာနာနုသယေန သာနုသယောတိ ဝုတ္တံ. ဧဝဉှိ သတိ တတော ဓာတုဒွယတော ဥပ္ပန္နေန မာနာနုသယေန သာနုသယောတိ အနုသယဿ ဥပ္ပတ္တိဋ္ဌာနံ ဒဿိတံ ဟောတိ. ဣမဿ ပန ပဉှဿ အတ္ထေ အဝုတ္တေ အာဒိပဉှဿ အတ္ထော ပါကဋော န ဟောတီတိ ပဌမံ န ဝုတ္တော၊ တသ္မာ သော ဧဝံ ဝေဒိတဗ္ဗော. ယတော ကာမရာဂါနုသယေနာတိ ယတော ဥပ္ပန္နေန ကာမရာဂါနုသယေန သာနုသယော၊ ကိံ သော တတော ဥပ္ပန္နေန ပဋိဃာနုသယေနပိ သာနုသယောတိ? ယသ္မာ ပနေတေ ဒွေ ဧကသ္မာ ဌာနာ နုပ္ပဇ္ဇန္တိ၊ တသ္မာ ‘‘နော’’တိ ပဋိသေဓော ကတော. အရဟာ သဗ္ဗတ္ထာတိ အရဟာ သဗ္ဗဓမ္မေသု ဥပ္ပဇ္ဇနကေန ကေနစိ အနုသယေန နိရာနုသယောတိ. ဣမိနာ အတ္ထဝသေန နိပ္ပဒေသဋ္ဌာနေသု ဘုမ္မဝစနမေဝ ကတန္တိ. ဣမိနာ ဥပါယေန သဗ္ဗတ္ထ အတ္ထဝိနိစ္ဆယော ဝေဒိတဗ္ဗောတိ.

သာနုသယဝါရဝဏ္ဏနာ.

၃. ပဇဟနဝါရဝဏ္ဏနာ

၁၃၂-၁၉၇. ပဇဟနဝါရေ ပဇဟတီတိ တေန တေန မဂ္ဂေန ပဟာနပရိညာဝသေန ပဇဟတိ၊ အာယတိံ အနုပ္ပတ္တိဓမ္မတံ အာပါဒေတိ. အာမန္တာတိ အနာဂါမီမဂ္ဂဋ္ဌံ သန္ဓာယ ပဋိဝစနံ. တဒေကဋ္ဌံ ပဇဟတီတိ ပဟာနေကဋ္ဌတံ သန္ဓာယ ဝုတ္တံ. နောတိ အရဟတ္တမဂ္ဂဋ္ဌံ သန္ဓာယ ပဋိသေဓော.

ယတော ကာမရာဂါနုသယံ ပဇဟတီတိ ယတော ဥပ္ပဇ္ဇနကံ ကာမရာဂါနုသယံ ပဇဟတီတိ အတ္ထော. အဋ္ဌမကောတိ အရဟတ္တဖလဋ္ဌတော ပဋ္ဌာယ ပစ္စောရောဟနဂဏနာယ ဂဏိယမာနော သောတာပတ္တိမဂ္ဂဋ္ဌော အဋ္ဌမကော နာမ. ဒက္ခိဏေယျဂဏနာယ ဟိ အရဟာ အဂ္ဂဒက္ခိဏေယျတ္တာ ပဌမော၊ အရဟတ္တမဂ္ဂဋ္ဌော ဒုတိယော၊ အနာဂါမီ တတိယော။ပေ။ သောတာပတ္တိမဂ္ဂဋ္ဌော အဋ္ဌမော. သော ဣဓ ‘‘အဋ္ဌမကော’’တိ ဝုတ္တော. နာမသညာယေဝ ဝါ ဧသာ တဿာတိ. အနာဂါမိမဂ္ဂသမင်္ဂိဉ္စ အဋ္ဌမကဉ္စ ဌပေတွာ အဝသေသာတိ သဒ္ဓိံ ပုထုဇ္ဇနေန သေက္ခာသေက္ခာ. တေသု ဟိ ပုထုဇ္ဇနော ပဟာနပရိညာယ အဘာဝေန နပ္ပဇဟတိ. သေသာ တေသံ အနုသယာနံ ပဟီနတ္တာ. ဒွိန္နံ မဂ္ဂသမင်္ဂီနန္တိ ဒွေ မဂ္ဂသမင်္ဂိနော ဌပေတွာတိ အတ္ထော. ဣမိနာ နယေန သဗ္ဗတ္ထ ဝိနိစ္ဆယော ဝေဒိတဗ္ဗောတိ.

ပဇဟနဝါရဝဏ္ဏနာ.

၄. ပရိညာဝါရဝဏ္ဏနာ

၁၉၈-၂၆၃. ပရိညာဝါရေ ပရိဇာနာတီတိ တီဟိ ပရိညာဟိ ပရိဇာနာတိ. သေသမေတ္ထ ဟေဋ္ဌာ ဝုတ္တနယမေဝ. အယမ္ပိ ဟိ ဝါရော ပဇဟနဝါရော ဝိယ မဂ္ဂဋ္ဌာနညေဝ ဝသေန ဝိဿဇ္ဇိတောတိ.

ပရိညာဝါရဝဏ္ဏနာ.

၅. ပဟီနဝါရဝဏ္ဏနာ

၂၆၄-၂၇၄. ပဟီနဝါရေ ဖလဋ္ဌဝသေနေဝ ဒေသနာ အာရဒ္ဓါ. အနာဂါမိဿ ဟိ ဥဘောပေတေ အနုသယာ ပဟီနာ၊ တသ္မာ ‘‘အာမန္တာ’’တိ ဝုတ္တံ.

၂၇၅-၂၉၆. ဩကာသဝါရေ ယတ္ထ ကာမရာဂါနုသယော ပဟီနော တတ္ထ ပဋိဃာနုသယော ပဟီနောတိ ပုစ္ဆိတွာ န ဝတ္တဗ္ဗော ပဟီနောတိ ဝါ အပ္ပဟီနောတိ ဝါတိ ဝုတ္တံ တံ ကသ္မာတိ? ဥပ္ပတ္တိဋ္ဌာနဿ အသာဓာရဏတ္တာ. အညံ ဟိ ကာမရာဂါနုသယဿ ဥပ္ပတ္တိဋ္ဌာနံ၊ အညံ ပဋိဃာနုသယဿ. အဘာဝိတမဂ္ဂဿ စ ယတ္ထ အနုသယော ဥပ္ပဇ္ဇတိ၊ မဂ္ဂေ ဘာဝိတေ တတ္ထေဝ သော ပဟီနော နာမ ဟောတိ. တတ္ထ ယသ္မာ နေဝ ကာမရာဂါနုသယဋ္ဌာနေ ပဋိဃာနုသယော ဥပ္ပဇ္ဇတိ၊ န ပဋိဃာနုသယဋ္ဌာနေ ကာမရာဂါနုသယော၊ တသ္မာ တတ္ထ သော ပဟီနောတိ ဝါ အပ္ပဟီနောတိ ဝါ န ဝတ္တဗ္ဗော. သော ဟိ ယသ္မိံ အတ္တနော ဥပ္ပတ္တိဋ္ဌာနေ ကာမရာဂါနုသယော ပဟီနော၊ တသ္မိံ အပ္ပဟီနတ္တာ တတ္ထ ပဟီနောတိ န ဝတ္တဗ္ဗော. ယံ ကာမရာဂါနုသယဿ ဥပ္ပတ္တိဋ္ဌာနံ၊ တသ္မိံ အဋ္ဌိတတ္တာ တတ္ထ အပ္ပဟီနောတိ န ဝတ္တဗ္ဗော.

ယတ္ထ ကာမရာဂါနုသယော ပဟီနော၊ တတ္ထ မာနာနုသယော ပဟီနောတိ ဧတ္ထ ပန သာဓာရဏဋ္ဌာနံ သန္ဓာယ အာမန္တာတိ ဝုတ္တံ. ကာမရာဂါနုသယော ဟိ ကာမဓာတုယာ ဒွီသု ဝေဒနာသု အနုသေတိ. မာနာနုသယော တာသု စေဝ ရူပါရူပဓာတူသု စ. သော ဌပေတွာ အသာဓာရဏဋ္ဌာနံ သာဓာရဏဋ္ဌာနေ တေန သဒ္ဓိံ ပဟီနော နာမ ဟောတိ. တသ္မာ ‘အာမန္တာ’တိ ဝုတ္တံ. ဣမိနာ နယေန သဗ္ဗသ္မိမ္ပိ ဩကာသဝါရေ ပဟီနတာ စ နဝတ္တဗ္ဗတာ စ ဝေဒိတဗ္ဗာ. ‘နတ္ထီ’တိ အာဂတဋ္ဌာနေသု ပန ဟေဋ္ဌာ ဝုတ္တသဒိသောဝ ဝိနိစ္ဆယော. ပုဂ္ဂလောကာသဝါရော၊ ဩကာသဝါရဂတိကောယေဝ.

၂၉၇-၃၀၇. ပဋိလောမနယေ ယဿ ကာမရာဂါနုသယော အပ္ပဟီနောတိ ပုထုဇ္ဇနသောတာပန္နသကဒါဂါမိဝသေန ပုစ္ဆတိ. ကိဉ္စာပိ ဟိ ဣမေ ဒွေ အနုသယာ ပုထုဇ္ဇနတော ပဋ္ဌာယ ယာဝ အနာဂါမိမဂ္ဂဋ္ဌာ ဆန္နံ ပုဂ္ဂလာနံ အပ္ပဟီနာ. ဣဓ ပန ပရတော ‘‘တိဏ္ဏံ ပုဂ္ဂလာနံ ဒွိန္နံ ပုဂ္ဂလာန’’န္တိအာဒိဝစနတော မဂ္ဂဋ္ဌာ အနဓိပ္ပေတာ၊ တသ္မာ ပုထုဇ္ဇနသောတာပန္နသကဒါဂါမိနောဝ သန္ဓာယ ‘အာမန္တာ’တိ ဝုတ္တံ. ဒွိန္နံ ပုဂ္ဂလာနန္တိ သောတာပန္နသကဒါဂါမီနံ. ဣမိနာ နယေန ပုဂ္ဂလဝါရေ ဝိနိစ္ဆယော ဝေဒိတဗ္ဗော.

၃၀၈-၃၂၉. ဩကာသဝါရပုဂ္ဂလောကာသဝါရာ ပန ဟေဋ္ဌာ ဝုတ္တနယေနေဝ ဝေဒိတဗ္ဗာတိ.

ပဟီနဝါရဝဏ္ဏနာ.

၆. ဥပ္ပဇ္ဇနဝါရဝဏ္ဏနာ

၃၃၀. ဥပ္ပဇ္ဇနဝါရော အနုသယဝါရသဒိသောယေဝ.

၇. ဓာတုပုစ္ဆာဝါရဝဏ္ဏနာ

၃၃၂-၃၄၀. ဓာတုဝါရဿ ပုစ္ဆာဝါရေ တာဝ ကတိ အနုသယာ အနုသေန္တီတိ ကတိ အနုသယာ သန္တာနံ အနုဂတာ ဟုတွာ သယန္တိ. ကတိ အနုသယာ နာနုသေန္တီတိ ကတိ အနုသယာ သန္တာနံ န အနုဂတာ ဟုတွာ သယန္တိ. ကတိ အနုသယာ ဘင်္ဂါတိ ကတိ အနုသယာ အနုသေန္တိ နာနုသေန္တီတိ ဧဝံ ဝိဘဇိတဗ္ဗာတိ အတ္ထော. သေသမေတ္ထ ယံ ဝတ္တဗ္ဗံ သိယာ၊ တံ ဟေဋ္ဌာ ပါဠိဝဝတ္ထာနေ ဝုတ္တမေဝ.

၇. ဓာတုဝိဿဇ္ဇနာဝါရဝဏ္ဏနာ

၃၄၁-၃၄၉. နိဒ္ဒေသဝါရေ ပနဿ ကဿစိ သတ္တ အနုသယာ အနုသေန္တီတိ ပုထုဇ္ဇနဝသေန ဝုတ္တံ. ကဿစိ ပဉ္စာတိ သောတာပန္နသကဒါဂါမိဝသေန ဝုတ္တံ. တေသဉှိ ဒိဋ္ဌာနုသယော စ ဝိစိကိစ္ဆာနုသယော စ ပဟီနာတိ ပဉ္စေဝ အနုသေန္တိ. တတ္ထ ယထာ အနုသယဝါရေ ‘‘အနုသေန္တီ’’တိ ပဒဿ ဥပ္ပဇ္ဇန္တီတိ အတ္ထော ဂဟိတော၊ ဧဝမိဓ န ဂဟေတဗ္ဗော. ကသ္မာ? တသ္မိံ ခဏေ အနုပ္ပဇ္ဇနတော. ကာမဓာတုံ ဥပပဇ္ဇန္တဿ ဟိ ဝိပါကစိတ္တဉ္စေဝ ကမ္မသမုဋ္ဌာနရူပဉ္စ ဥပ္ပဇ္ဇတိ၊ အကုသလစိတ္တံ နတ္ထိ. အနုသယာ စ အကုသလစိတ္တက္ခဏေ ဥပ္ပဇ္ဇန္တိ၊ န ဝိပါကစိတ္တက္ခဏေတိ တသ္မိံ ခဏေ အနုပ္ပဇ္ဇနတော တထာ အတ္ထော န ဂဟေတဗ္ဗော. ကထံ ပန ဂဟေတဗ္ဗောတိ? ယထာ လဗ္ဘတိ တထာ ဂဟေတဗ္ဗော. ကထဉ္စ လဗ္ဘတိ? အပ္ပဟီနဋ္ဌေန. ယထာ ဟိ ရာဂဒေါသမောဟာနံ အပ္ပဟီနတ္တာ. ကုသလာဗျာကတစိတ္တသမင်္ဂီ ပုဂ္ဂလော ‘‘သရာဂေါ သဒေါသော သမောဟော’’တိ ဝုစ္စတိ၊ ဧဝံ မဂ္ဂဘာဝနာယ အပ္ပဟီနတ္တာ ပဋိသန္ဓိက္ခဏေပိ တဿ တဿ ပုဂ္ဂလဿ တေ တေ အနုသယာ အနုသေန္တီတိ ဝုစ္စန္တိ. န ကေဝလဉ္စ ဝုစ္စန္တိ၊ အပ္ပဟီနတ္တာ ပန တေ အနုသေန္တိယေဝ နာမာတိ ဝေဒိတဗ္ဗာ.

အနုသယာ ဘင်္ဂါ နတ္ထီတိ ယဿ ဟိ ယော အနုသေတိ၊ သော အနုသေတိယေဝ၊ ယော နာနုသေတိ၊ သော နာနုသေတိယေဝ. အယံ အနုသေတိ စ နာနုသေတိ စ၊ အယံ သိယာ အနုသေတိ သိယာ နာနုသေတီတိ၊ ဧဝံ ဝိဘဇိတဗ္ဗော အနုသယော နာမ နတ္ထိ. ရူပဓာတုံ ဥပပဇ္ဇန္တဿ ကဿစိ တယောတိ အနာဂါမိဝသေန ဝုတ္တံ. တဿ ဟိ ကာမရာဂပဋိဃဒိဋ္ဌိဝိစိကိစ္ဆာနုသယာ စတ္တာရောပိ အနဝသေသတော ပဟီနာ. ဣတရေ တယောဝ အပ္ပဟီနာ. တေန ဝုတ္တံ – ‘‘ကဿစိ တယော အနုသယာ အနုသေန္တီ’’တိ.

န ကာမဓာတုန္တိ ကာမဓာတုယာ ပဋိသိဒ္ဓတ္တာ သေသာ ဒွေ ဓာတုယော ဥပပဇ္ဇန္တဿာတိ အတ္ထော. သတ္တေ ဝါတိ ယသ္မာ အရိယသာဝကဿ ရူပဓာတုယာ စုတဿ ကာမဓာတုယံ ဥပပတ္တိ နာမ နတ္ထိ၊ ပုထုဇ္ဇနဿေဝ ဟောတိ၊ တသ္မာ သတ္တေဝါတိ နိယမေတွာ ဝုတ္တံ. ‘‘အရူပဓာတုယာ စုတဿ ကာမဓာတုံ ဥပပဇ္ဇန္တဿ သတ္တေဝါ’’တိ ဧတ္ထာပိ ဧသေဝ နယော. ရူပဓာတုယာ ဥပပတ္တိ နတ္ထီတိ ကသ္မာ နတ္ထိ? ဥပပတ္တိနိပ္ဖါဒကဿ ရူပါဝစရဇ္ဈာနဿ အဘာဝါ. သော ဟိ သဗ္ဗသော ရူပသညာနံ သမတိက္ကမာ တံ ဓာတုံ ဥပပန္နောတိ နာဿ တတ္ထ ရူပါဝစရဇ္ဈာနံ အတ္ထိ. တဒဘာဝါ ရူပဓာတုယံ ဥပပတ္တိ နတ္ထီတိ ဝေဒိတဗ္ဗာ. အရူပဓာတုယာ စုတဿ န ကာမဓာတုန္တိ ဧတ္ထ အရူပဓာတုယေဝ အဓိပ္ပေတာ. ဣမိနာ နယေန သဗ္ဗဝိဿဇ္ဇနေသု အတ္ထော ဝေဒိတဗ္ဗောတိ.

ဓာတုဝါရဝဏ္ဏနာ.

အနုသယယမကဝဏ္ဏနာ နိဋ္ဌိတာ.