၃. သုတ္တသာဓနပရိဟာနိဝဏ္ဏနာ

၂၆၅. ဣဒါနိ သုတ္တသာဓနာ ဟောတိ. တတ္ထ ဥစ္စာဝစာတိ ဥတ္တမဟီနဘေဒတော ဥစ္စာ စ အဝစာ စ. ပဋိပါဒါတိ ပဋိပဒါ. သမဏေန ပကာသိတာတိ ဗုဒ္ဓသမဏေန ဇောတိတာ. သုခါပဋိပဒါ ဟိ ခိပ္ပါဘိညာ ဥစ္စာ. ဒုက္ခာပဋိပဒါ ဒန္ဓာဘိညာ အဝစာ. ဣတရာ ဒွေ ဧကေနင်္ဂေန ဥစ္စာ၊ ဧကေန အဝစာ. ပဌမံ ဝုတ္တာ ဧဝ ဝါ ဥစ္စာ၊ ဣတရော တိဿောပိ အဝစာ. တာယ စေတာယ ဥစ္စာဝစာယ ပဋိပဒါယ န ပါရံ ဒိဂုဏံ ယန္တိ၊ ဧကမဂ္ဂေန ဒွိက္ခတ္တုံ နိဗ္ဗာနံ န ဂစ္ဆန္တီတိ အတ္ထော. ကသ္မာ? ယေန မဂ္ဂေန ယေ ကိလေသာ ပဟီနာ၊ တေန တေသံ ပုန အပ္ပဟာတဗ္ဗတော. ဧတေန ပရိဟာနိဓမ္မာဘာဝံ ဒီပေတိ. နယိဒံ ဧကဂုဏံ မုတန္တိ တဉ္စ ဣဒံ ပါရံ ဧကဝါရံယေဝ ဖုသနာရဟံ န ဟောတိ. ကသ္မာ? ဧကေန မဂ္ဂေန သဗ္ဗကိလေသာနံ အပ္ပဟာနတော. ဧတေန ဧကမဂ္ဂေနေဝ အရဟတ္တာဘာဝံ ဒီပေတိ.

အတ္ထိ ဆိန္နဿ ဆေဒိယန္တိ ဆိန္နဿ ကိလေသဝဋ္ဋဿ ပုန ဆိန္ဒိတဗ္ဗံ ကိဉ္စိ အတ္ထီတိ ပုစ္ဆတိ. ဣတရော တိက္ခိန္ဒြိယံ သန္ဓာယ ပဋိက္ခိပိတွာ ပုန ပုဋ္ဌော မုဒိန္ဒြိယံ သန္ဓာယ ပဋိဇာနာတိ. သကဝါဒီ သုတ္တံ အာဟရိတွာ နတ္ထိဘာဝံ ဒဿေတိ. တတ္ထ ဩဃပါသောတိ ကိလေသောဃော စေဝ ကိလေသပါသော စ.

၂၆၆. ကတဿ ပဋိစယောတိ ဘာဝိတဿ မဂ္ဂဿ ပုန ဘာဝနာ. ဣဓာပိ ပဋိက္ခေပပဋိဇာနနာနိ ပုရိမနယေနေဝ ဝေဒိတဗ္ဗာနိ.

၂၆၇. ပရိဟာနာယ သံဝတ္တန္တီတိ ပရဝါဒိနာ အာဘတေ သုတ္တေ ပဉ္စ ဓမ္မာ အပ္ပတ္တပရိဟာနာယ စေဝ လောကိယသမာပတ္တိပရိဟာနာယ စ သံဝတ္တန္တိ. သော ပန ပတ္တဿ အရဟတ္တဖလဿ ပရိဟာနာယ သလ္လက္ခေတိ. တေနေဝ အတ္ထိ အရဟတော ကမ္မာရာမတာတိ အာဟ. ဣတရောပိ အသမယဝိမုတ္တံ သန္ဓာယ ပဋိက္ခိပိတွာ ဣတရံ သန္ဓာယ ပဋိဇာနာတိ. ကာမရာဂဝသေန ဝါ ပဝတ္တမာနံ တံ ပဋိက္ခိပိတွာ ဣတရထာ ပဝတ္တမာနံ ပဋိဇာနာတိ. ရာဂါဒီနံ ပန အတ္ထိတံ ပုဋ္ဌော ပဋိဇာနိတုံ န သက္ကောတိ.

၂၆၈. ကိံ ပရိယုဋ္ဌိတောတိ ကေန ပရိယုဋ္ဌိတော အနုဗဒ္ဓေါ အဇ္ဈောတ္ထတော ဝါ ဟုတွာတိ အတ္ထော. အနုသယပုစ္ဆာယပိ တိက္ခိန္ဒြိယမုဒိန္ဒြိယဝသေနေဝ ပဋိက္ခေပပဋိဇာနနာနိ ဝေဒိတဗ္ဗာနိ. ကလျာဏာနုသယောတိ ဝစနမတ္တသာမညေန ဝါ ပဋိဇာနာတိ. ရာဂေါ ဥပစယံ ဂစ္ဆတီတိ ဘာဝနာယ ပဟီနံ သန္ဓာယာဟ. ပရတော ဒေါသမောဟေသုပိ ဧသေဝ နယော. သက္ကာယဒိဋ္ဌိအာဒီနံ ပန ဒဿနေန ပဟီနတ္တာ ဥပစယံ န ဣစ္ဆတိ. သေသံ သဗ္ဗတ္ထ ဥတ္တာနတ္ထမေဝါတိ.

သုတ္တသာဓနာ.

ပရိဟာနိကထာ နိဋ္ဌိတာ.