၄. ဓာတုယမကံ

၁-၁၉. ဣဒါနိ တေယေဝ မူလယမကေ ဒေသိတေ ကုသလာဒိဓမ္မေ ဓာတုဝသေန သင်္ဂဏှိတွာ အာယတနယမကာနန္တရံ ဒေသိတဿ ဓာတုယမကဿ ဝဏ္ဏနာ ဟောတိ. တတ္ထ အာယတနယမကေ ဝုတ္တနယေနေဝ ပါဠိဝဝတ္ထာနံ ဝေတိဒဗ္ဗံ. ဣဓာပိ ဟိ ပဏ္ဏတ္တိဝါရာဒယော တယော မဟာဝါရာ၊ အဝသေသာ အန္တရဝါရာ စ သဒ္ဓိံ ကာလပ္ပဘေဒါဒီဟိ အာယတနယမကေ အာဂတသဒိသာယေဝ. ဣဓာပိ စ ယမကပုစ္ဆာသုခတ္ထံ ပဋိပါဋိယာ အဇ္ဈတ္တိကဗာဟိရာ ရူပဓာတုယောဝ ဝတွာ ဝိညာဏဓာတုယော ဝုတ္တာ. ဓာတူနံ ပန ဗဟုတ္တာ ဣဓ အာယတနယမကတော ဗဟုတရာနိ ယမကာနိ၊ ယမကဒိဂုဏာ ပုစ္ဆာ၊ ပုစ္ဆာဒိဂုဏာ စ အတ္ထာ ဟောန္တိ. တတ္ထ စက္ခုဓာတုမူလကာဒီသု ယမကေသု လဗ္ဘမာနာနံ ယမကာနံ အတ္ထဝိနိစ္ဆယော အာယတနယမကေ ဝုတ္တနယေနေဝ ဝေဒိတဗ္ဗော. တံသဒိသာယေဝ ဟေတ္ထ အတ္ထဂတိ၊ တေနေဝ စ ကာရဏေန ပါဠိပိ သင်္ခိတ္တာ. ပရိညာဝါရော ပါကတိကောယေဝါတိ.

ဓာတုယမကဝဏ္ဏနာ နိဋ္ဌိတာ.