၁၀. ခဏိကကထာဝဏ္ဏနာ

၉၀၆-၉၀၇. ဣဒါနိ ခဏိကကထာ နာမ ဟောတိ. တတ္ထ ယသ္မာ သဗ္ဗသင်္ခတဓမ္မာ အနိစ္စာ၊ တသ္မာ ဧကစိတ္တက္ခဏိကာယေဝ. သမာနာယ ဟိ အနိစ္စတာယ ဧကော လဟုံ ဘိဇ္ဇတိ၊ ဧကော စိရေနာတိ ကော ဧတ္ထ နိယာမောတိ ယေသံ လဒ္ဓိ၊ သေယျထာပိ ပုဗ္ဗသေလိယာပရသေလိယာနံ၊ တေ သန္ဓာယ ဧကစိတ္တက္ခဏိကာတိ ပုစ္ဆာ သကဝါဒိဿ၊ ပဋိညာ ဣတရဿ. စိတ္တေ မဟာပထဝီတိအာဒီသု တေသံ တထာ သဏ္ဌာနံ အပဿန္တော ပဋိက္ခိပတိ. စက္ခာယတနန္တိအာဒိ ‘‘ယဒိ သဗ္ဗေ ဧကစိတ္တက္ခဏိကာ ဘဝေယျုံ၊ စက္ခာယတနာဒီနိ စက္ခုဝိညာဏာဒီဟိ သဒ္ဓိံယေဝ ဥပ္ပဇ္ဇိတွာ နိရုဇ္ဈေယျု’’န္တိ စောဒနတ္ထံ ဝုတ္တံ. ဣတရော ပန အန္တောမာတုကုစ္ဆိဂတဿ ဝိညာဏုပ္ပတ္တိံ သန္ဓာယ ပဋိက္ခိပတိ၊ ပဝတ္တံ သန္ဓာယ လဒ္ဓိဝသေန ပဋိဇာနာတိ. သေသမေတ္ထ ဥတ္တာနတ္ထမေဝါတိ. တေန ဟိ ဧကစိတ္တက္ခဏိကာတိ ယသ္မာ နိစ္စာ န ဟောန္တိ၊ တသ္မာ ဧကစိတ္တက္ခဏိကာတိ အတ္တနော ရုစိယာ ကာရဏံ ဝဒတိ. တံ အဝုတ္တသဒိသမေဝါတိ.

ခဏိကကထာဝဏ္ဏနာ.

ဗာဝီသတိမော ဝဂ္ဂေါ.