၃. သညောဇနကထာဝဏ္ဏနာ

၈၈၁-၈၈၂. ဣဒါနိ သညောဇနကထာ နာမ ဟောတိ. တတ္ထ ယသ္မာ အရဟာ သဗ္ဗံ ဗုဒ္ဓဝိသယံ န ဇာနာတိ၊ တသ္မာ တဿ တတ္ထ အဝိဇ္ဇာဝိစိကိစ္ဆာဟိ အပ္ပဟီနာဟိ ဘဝိတဗ္ဗန္တိ သညာယ ‘‘အတ္ထိ ကိဉ္စိ သညောဇနံ အပ္ပဟာယ အရဟတ္တပ္ပတ္တီ’’တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အတ္ထိ ကိဉ္စိ သက္ကာယဒိဋ္ဌီတိအာဒိ အရဟတော သဗ္ဗသံယောဇနပ္ပဟာနဒဿနတ္ထံ ဝုတ္တံ. သဗ္ဗံ ဗုဒ္ဓဝိသယန္တိ ပဉှဒွယေ အရဟတော သဗ္ဗညုတညာဏာဘာဝေန ပဋိသေဓော ကတော၊ န အဝိဇ္ဇာဝိစိကိစ္ဆာနံ အပ္ပဟာနေန. ဣတရော ပန တေသံ အပ္ပဟီနတံ သန္ဓာယ တေန ဟီတိ လဒ္ဓိံ ပတိဋ္ဌပေတိ. သာ အယောနိသော ပတိဋ္ဌာပိတတ္တာ အပ္ပတိဋ္ဌိတာဝ ဟောတီတိ.

သညောဇနကထာဝဏ္ဏနာ.