၁. အသဉ္စိစ္စကထာဝဏ္ဏနာ

၈၅၇-၈၆၂. ဣဒါနိ အသဉ္စိစ္စကထာ နာမ ဟောတိ. တတ္ထ ‘‘အာနန္တရိယဝတ္ထူနိ နာမ ဂရူနိ ဘာရိယာနိ၊ တသ္မာ အသဉ္စိစ္စာပိ တေသု ဝတ္ထူသု ဝိကောပိတေသု အာနန္တရိကော ဟောတီ’’တိ ယေသံ လဒ္ဓိ၊ သေယျထာပိ ဧကစ္စာနံ ဥတ္တရာပထကာနံ၊ တေ သန္ဓာယ အသဉ္စိစ္စာတိ ပုစ္ဆာ သကဝါဒိဿ၊ လဒ္ဓိဝသေန ပဋိညာ ဣတရဿ. အထ နံ ‘‘ယသ္မာ အာနန္တရိယကမ္မံ နာမ ကမ္မပထပ္ပတ္တံ. ယဒိ စ အသဉ္စိစ္စ ကမ္မပထဘေဒေါ သိယာ၊ အဝသေသာ ပါဏာတိပါတာဒယောပိ အသဉ္စိစ္စ ဘဝေယျု’’န္တိ စောဒနတ္ထံ အသဉ္စိစ္စပါဏံ ဟန္တွာတိအာဒိမာဟ. ဣတရော တထာရူပါယ လဒ္ဓိယာ အဘာဝေန ပဋိက္ခိပတိ. သေသံ ယထာပါဠိမေဝ နိယျာတိ. န ဝတ္တဗ္ဗံ မာတုဃာတကောတိ ပုစ္ဆာ ပရဝါဒိဿ၊ ရောဂပဋိကာရာဒိကာလေ အသဉ္စိစ္စ ဃာတံ သန္ဓာယ ပဋိညာ သကဝါဒိဿ. နနု မာတာ ဇီဝိတာ ဝေါရောပိတာတိ ပဉှေပိ အသဉ္စိစ္စ ဝေါရောပိတံ သန္ဓာယ ပဋိညာ သကဝါဒိဿေဝ. ဧဝံ အဓိပ္ပါယံ ပန အဂ္ဂဟေတွာ ဟဉ္စီတိ လဒ္ဓိပတိဋ္ဌာပနံ ဣတရဿ. တံ အယောနိသော ပတိဋ္ဌာပိတတ္တာ အပ္ပတိဋ္ဌိတမေဝ. ပိတုဃာတကာဒီသုပိ ဧသေဝ နယော. သံဃဘေဒကေ ပန ဓမ္မသညိံ သန္ဓာယ သံဃဘေဒေါ အာနန္တရိကောတိ ပုစ္ဆာ သကဝါဒိဿ၊ ‘‘သံဃံ သမဂ္ဂံ ဘေတွာန၊ ကပ္ပံ နိရယမှိ ပစ္စတီ’’တိ ဝစနံ အယောနိသော ဂဟေတွာ ပဋိညာ ပရဝါဒိဿ. ပုန သဗ္ဗေတိ ပုဋ္ဌော သကပက္ခေ ဓမ္မသညိံ သန္ဓာယ ပဋိက္ခိပတိ၊ ပရပက္ခေ ဓမ္မသညိံ သန္ဓာယ ပဋိဇာနာတိ. ဓမ္မသညီတိ ပဉှဒွယေပိ ဧသေဝ နယော. နနု ဝုတ္တံ ဘဂဝတာတိ သုတ္တံ ဧကန္တေနေဝ ဓမ္မဝါဒိဿ အာနန္တရိကဘာဝဒဿနတ္ထံ ဝုတ္တံ. အာပါယိကော နေရယိကောတိ ဂါထာယပိ အဓမ္မဝါဒီယေဝ အဓိပ္ပေတော. ဣတရော ပန အဓိပ္ပါယံ အဂ္ဂဟေတွာ လဒ္ဓိံ ပတိဋ္ဌပေတိ. သာ အယောနိသော ပတိဋ္ဌာပိတတ္တာ အပ္ပတိဋ္ဌိတာယေဝါတိ.

အသဉ္စိစ္စကထာဝဏ္ဏနာ.