၈. ဣန္ဒြိယကထာဝဏ္ဏနာ

၈၅၃-၈၅၆. ဣဒါနိ ဣန္ဒြိယကထာ နာမ ဟောတိ. တတ္ထ လောကိယာ သဒ္ဓါ သဒ္ဓါ ဧဝ နာမ၊ န သဒ္ဓိန္ဒြိယံ. တထာ လောကိယံ ဝီရိယံ။ပေ။ သတိ။ သမာဓိ။ ပညာ ပညာယေဝ နာမ၊ န ပညိန္ဒြိယန္တိ ယေသံ လဒ္ဓိ၊ သေယျထာပိ ဟေတုဝါဒါနဉ္စေဝ မဟိသာသကာနဉ္စ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. နတ္ထိ လောကိယာ သဒ္ဓါတိအာဒိ ယသ္မာ လောကိယာပိ သဒ္ဓါဒယောဝ ဓမ္မာ အဓိပတိယဋ္ဌေန ဣန္ဒြိယံ၊ န သဒ္ဓါဒီဟိ အညံ သဒ္ဓိန္ဒြိယာဒိ နာမ အတ္ထိ၊ တသ္မာ လောကိယာနမ္ပိ သဒ္ဓါဒီနညေဝ သဒ္ဓိန္ဒြိယာဒိဘာဝဒဿနတ္ထံ ဝုတ္တံ. အတ္ထိ လောကိယော မနောတိအာဒိ ယထာ တေ လောကိယာပိ မနာဒယော ဓမ္မာ မနိန္ဒြိယာဒီနိ၊ ဧဝံ လောကိယာ သဒ္ဓါဒယောပိ သဒ္ဓိန္ဒြိယာနီတိ ဥပမာယ တဿတ္ထဿ ဝိဘာဝနတ္ထံ ဝုတ္တံ. သေသမေတ္ထ ယထာပါဠိမေဝ နိယျာတီတိ.

ဣန္ဒြိယကထာဝဏ္ဏနာ.

ဧကူနဝီသတိမော ဝဂ္ဂေါ.