၃. ကရုဏာကထာဝဏ္ဏနာ

၈၀၇-၈၀၈. ဣဒါနိ ကရုဏာကထာ နာမ ဟောတိ. တတ္ထ ပိယာယိတာနံ ဝတ္ထူနံ ဝိပတ္တိယာ သရာဂါနံ ရာဂဝသေန ကရုဏာပတိရူပိကံ ပဝတ္တိံ ဒိသွာ ‘‘ရာဂေါဝ ကရုဏာ နာမ၊ သော စ ဘဂဝတော နတ္ထိ၊ တသ္မာ နတ္ထိ ဗုဒ္ဓဿ ဘဂဝတော ကရုဏာ’’တိ ယေသံ လဒ္ဓိ၊ သေယျထာပိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ကရုဏာ နာမေသာ နိက္ကိလေသတာယ စေဝ သတ္တာရမ္မဏတာယ စ စေတောဝိမုတ္တိတာယ စ ဧကာဒသာနိသံသတာယ စ မေတ္တာဒီဟိ သမာနဇာတိကာ၊ တသ္မာ ယဒိ ဘဂဝတော ကရုဏာ နတ္ထိ၊ မေတ္တာဒယောပိဿ န သိယု’’န္တိ စောဒနတ္ထံ နတ္ထိ ဗုဒ္ဓဿ ဘဂဝတော မေတ္တာတိအာဒိမာဟ. အာကာရုဏိကောတိ ပဉှေ တထာရူပံ ဝေါဟာရံ အပဿန္တော ပဋိက္ခိပတိ. သေသမေတ္ထ ဥတ္တာနတ္ထမေဝါတိ.

ကရုဏာကထာဝဏ္ဏနာ.