၁. အတ္ထိ အရဟတော ပုညူပစယကထာဝဏ္ဏနာ

၇၇၆-၇၇၉. ဣဒါနိ အတ္ထိ အရဟတော ပုညူပစယောတိကထာ နာမ ဟောတိ. တတ္ထ ယေသံ အရဟတော ဒါနသံဝိဘာဂစေတိယဝန္ဒနာဒီနိ ကမ္မာနိ ဒိသွာ အတ္ထိ အရဟတော ပုညူပစယောတိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘အရဟာ နာမ ပဟီနပုညပါပေါ၊ သော ယဒိ ပုညံ ကရေယျ၊ ပါပမ္ပိ ကရေယျာ’’တိ စောဒေတုံ အပုညူပစယောတိ အာဟ. ဣတရော ပါဏာတိပါတာဒိကိရိယံ အပဿန္တော ပဋိက္ခိပတိ. ပုညာဘိသင်္ခါရန္တိအာဒီသု ဘဝဂါမိကမ္မံ အရဟတော နတ္ထီတိ ပဋိက္ခိပတိ. ဒါနံ ဒဒေယျာတိအာဒီသု ကိရိယစိတ္တေန ဒါနာဒိပဝတ္တိသဗ္ဘာဝတော သကဝါဒီ ပဋိဇာနာတိ. ဣတရော စိတ္တံ အနာဒိယိတွာ ကိရိယာပဝတ္တိမတ္တဒဿနေနေဝ လဒ္ဓိံ ပတိဋ္ဌပေတိ. သာ ပန အယောနိသော ပတိဋ္ဌာပိတတ္တာ အပ္ပတိဋ္ဌာပိတာ ဟောတီတိ.

အတ္ထိ အရဟတော ပုညူပစယောတိကထာဝဏ္ဏနာ.