၉. ဓမ္မတဏှာအဗျာကတာတိကထာဝဏ္ဏနာ

၆၇၆-၆၈၀. ဣဒါနိ ဓမ္မတဏှာ အဗျာကတာတိကထာ နာမ ဟောတိ. တတ္ထ ရူပတဏှာ။ပေ။ ဓမ္မတဏှာတိ ဣမာသု ဆသု တဏှာသု ယသ္မာ သဗ္ဗပစ္ဆိမာ တဏှာ ဓမ္မတဏှာတိ ဝုတ္တာ၊ တသ္မာ သာ အဗျာကတာတိ ယေသံ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. သေသပဉှာနံ ပါဠိယာ အတ္ထော နိယျာတိ. ကာမတဏှာတိအာဒီဟိ တီဟိ ကောဋ္ဌာသေဟိ ဆပိ တဏှာ သင်္ခိပိတွာ ဒဿိတာ. ရူပါဒီသု ဟိ ဆသု အာရမ္မဏေသု ကာမဿာဒဝသေန ပဝတ္တာ တဏှာ ကာမတဏှာ. ‘‘ဘဝိဿတိ အတ္တာ စ လောကော စာ’’တိ သဿတဒိဋ္ဌိသဟဂတာ တဏှာ ဘဝတဏှာ. ‘‘န ဘဝိဿတီ’’တိ ဥစ္ဆေဒဒိဋ္ဌိသဟဂတာ တဏှာ ဝိဘဝတဏှာတိ. နနု သာ ဓမ္မတဏှာတိ ပဒံ တဏှာယ ဓမ္မာရမ္မဏံ အာရဗ္ဘ ပဝတ္တိံ ဒီပေတိ၊ န အဗျာကတဘာဝံ တသ္မာ အသာဓကန္တိ.

ဓမ္မတဏှာ အဗျာကတာတိကထာဝဏ္ဏနာ.