၁. ကပ္ပဋ္ဌကထာဝဏ္ဏနာ

၆၅၄-၆၅၇. ဣဒါနိ ကပ္ပဋ္ဌကထာ နာမ ဟောတိ. တတ္ထ ယေသံ ‘‘သံဃံ သမဂ္ဂံ ဘေတွာန၊ ကပ္ပံ နိရယမှိ ပစ္စတီ’’တိ ‘‘သကလမ္ပိ ကပ္ပံ သံဃဘေဒကော နိရယေ တိဋ္ဌတီ’’တိ လဒ္ဓိ၊ သေယျထာပိ ရာဇဂိရိကာနံ၊ တေ သန္ဓာယ ကပ္ပဋ္ဌောတိ ပုစ္ဆာ သကဝါဒိဿ၊ ပဋိညာ ဣတရဿ. ဗုဒ္ဓေါ စ လောကေတိ ဣဒံ ဝိနာ ဗုဒ္ဓုပ္ပါဒေန သံဃဘေဒဿ အဘာဝဒဿနတ္ထံ ဝုတ္တံ. ကပ္ပေါ စ သဏ္ဌာတိ သံဃော စ ဘိဇ္ဇတီတိအာဒိ ‘‘ယဒိ သော သကလံ ကပ္ပံ တိဋ္ဌတိ၊ သဏ္ဌဟနတော ပဋ္ဌာယ တံ ကမ္မံ ကတွာ တတ္ထ ဥပ္ပဇ္ဇိတွာ တိဋ္ဌေယျာ’’တိ ဒဿေတုံ ဝုတ္တံ. အတီတန္တိအာဒိ ဟေဋ္ဌာ ဝုတ္တာဓိပ္ပါယမေဝ. ကပ္ပဋ္ဌော ဣဒ္ဓိမာတိ ပဉှေ ဘာဝနာမယံ သန္ဓာယ ပဋိက္ခိပတိ၊ ပရသမယေ ပနဿ ဇာတိမယံ ဣဒ္ဓိံ ဣစ္ဆန္တိ၊ တံ သန္ဓာယ ပဋိဇာနာတိ. ဆန္ဒိဒ္ဓိပါဒေါတိအာဒိ ‘‘ဇာတိမယာယ ဣဒ္ဓိယာ ဣဒ္ဓိမာတိ လဒ္ဓိမတ္တမေတံ၊ ကိံ တေန၊ ယဒိ ပနဿ ဣဒ္ဓိ အတ္ထိ၊ ဣမိနာ နယေန ဣဒ္ဓိပါဒါ ဘာဝိတာ ဘဝေယျု’’န္တိ စောဒနတ္ထံ ဝုတ္တံ. အာပါယိကော နေရယိကောတိ သုတ္တံ ယံ သော ဧကံ ကပ္ပံ အသီတိဘာဂေ ကတွာ တတော ဧကဘာဂမတ္တံ ကာလံ တိဋ္ဌေယျ၊ တံ အာယုကပ္ပံ သန္ဓာယ ဝုတ္တံ၊ တသ္မာ အသာဓကန္တိ.

ကပ္ပဋ္ဌကထာဝဏ္ဏနာ.