၃. သဒ္ဒေါ ဝိပါကောတိကထာဝဏ္ဏနာ

၆၃၆-၆၃၇. ဣဒါနိ သဒ္ဒေါ ဝိပါကောတိကထာ နာမ ဟောတိ. တတ္ထ ‘‘သော တဿ ကမ္မဿ ကတတ္တာ ဥပစိတတ္တာ ဥဿန္နတ္တာ ဝိပုလတ္တာ ဗြဟ္မဿရော ဟောတီ’’တိအာဒီနိ (ဒီ. နိ. ၃.၂၃၆) အယောနိသော ဂဟေတွာ ‘‘သဒ္ဒေါ ဝိပါကော’’တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေသံ ‘‘ကမ္မသမုဋ္ဌာနာ အရူပဓမ္မာဝ ဝိပါကာတိ နာမံ လဘန္တိ. ရူပဓမ္မေသု ပနာယံ ဝေါဟာရော နတ္ထီ’’တိ ဒဿေတုံ ပုစ္ဆာ သကဝါဒိဿ၊ ပဋိညာ ဣတရဿ. သုခဝေဒနီယောတိအာဒိ ‘‘ဝိပါကော နာမ ဧဝရူပေါ ဟောတီ’’တိ ဒဿနတ္ထံ ဝုတ္တံ. ‘‘သော တဿ ကမ္မဿာ’’တိ သုတ္တံ လက္ခဏပဋိလာဘဒဿနတ္ထံ ဝုတ္တံ. မဟာပုရိသော ဟိ ကမ္မဿ ကတတ္တာ သုစိပရိဝါရောပိ ဟောတိ၊ န စ ပရိဝါရော ဝိပါကော၊ တသ္မာ အသာဓကမေတန္တိ.

သဒ္ဒေါ ဝိပါကောတိကထာဝဏ္ဏနာ.