၇. သီလံ အစေတသိကန္တိကထာဝဏ္ဏနာ

၅၉၀-၅၉၄. ဣဒါနိ သီလံ အစေတသိကန္တိကထာ နာမ ဟောတိ. တတ္ထ ယသ္မာ သီလေ ဥပ္ပဇ္ဇိတွာ နိရုဒ္ဓေပိ သမာဒါနဟေတုကော သီလောပစယော နာမ အတ္ထိ၊ ယေန သော သီလဝါယေဝ နာမ ဟောတိ၊ တသ္မာ ‘‘သီလံ အစေတသိက’’န္တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. သေသမေတ္ထ ‘‘ဒါနံ အစေတသိက’’န္တိကထာယံ ဝုတ္တနယေနေဝ ဝေဒိတဗ္ဗံ. လဒ္ဓိပတိဋ္ဌာပနမ္ပိ အယောနိသော ဂဟိတတ္တာ အပ္ပတိဋ္ဌာပနမေဝါတိ.

သီလံ အစေတသိကန္တိကထာဝဏ္ဏနာ.