၅. ပဉ္စဝိညာဏာ သာဘောဂါတိကထာဝဏ္ဏနာ

၅၈၄-၅၈၆. ဣဒါနိ ပဉ္စဝိညာဏာ သာဘောဂါတိကထာ နာမ ဟောတိ. တတ္ထ အာဘောဂေါ နာမ ကုသလာကုသလဝသေန ဟောတိ သတ္ထာရာ စ ‘‘စက္ခုနာ ရူပံ ဒိသွာ နိမိတ္တဂ္ဂါဟီ ဟောတိ၊ န နိမိတ္တဂ္ဂါဟီ ဟောတီ’’တိအာဒိ ဝုတ္တံ၊ တံ အယောနိသော ဂဟေတွာ ‘‘ပဉ္စဝိညာဏာ သာဘောဂါ’’တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. သေသမေတ္ထ ပုရိမကထာသဒိသမေဝါတိ.

ပဉ္စဝိညာဏာ သာဘောဂါတိကထာဝဏ္ဏနာ.