၃. ပဉ္စဝိညာဏသမင်္ဂိဿ မဂ္ဂကထာဝဏ္ဏနာ

၅၇၆. ဣဒါနိ ပဉ္စဝိညာဏသမင်္ဂိဿ မဂ္ဂကထာ နာမ ဟောတိ. တတ္ထ ယေသံ ‘‘စက္ခုနာ ရူပံ ဒိသွာ န နိမိတ္တဂ္ဂါဟီ ဟောတီ’’တိ သုတ္တံ နိဿာယ ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘သစေ တဿ မဂ္ဂဘာဝနာ အတ္ထိ၊ ပဉ္စဝိညာဏဂတိကေန ဝါ မဂ္ဂေန၊ မဂ္ဂဂတိကေဟိ ဝါ ပဉ္စဝိညာဏေဟိ ဘဝိတဗ္ဗံ၊ န စ တာနိ မဂ္ဂဂတိကာနိ အနိဗ္ဗာနာရမ္မဏတ္တာ အလောကုတ္တရတ္တာ စ၊ န မဂ္ဂေါ ပဉ္စဝိညာဏဂတိကော တေသံ လက္ခဏေန အသင်္ဂဟိတတ္တာ’’တိ စောဒေတုံ နနု ပဉ္စဝိညာဏာ ဥပ္ပန္နဝတ္ထုကာတိအာဒိမာဟ. တတြာယံ အဓိပ္ပါယော – ယဒိ ပဉ္စဝိညာဏသမင်္ဂိဿ မဂ္ဂဘာဝနာ သိယာ၊ ယေန မနောဝိညာဏေန မဂ္ဂေါ သမ္ပယုတ္တော၊ တမ္ပိ ပဉ္စဝိညာဏသမင်္ဂိဿ သိယာ. ဧဝံ သန္တေ ယဒိဒံ ‘‘ပဉ္စဝိညာဏာ ဥပ္ပန္နဝတ္ထုကာ’’တိအာဒိ လက္ခဏံ ဝုတ္တံ၊ တံ ဧဝံ အဝတွာ ‘‘ဆ ဝိညာဏာ’’တိ ဝတ္တဗ္ဗံ သိယာ. တထာ ပန အဝတွာ ‘‘ပဉ္စဝိညာဏာ’’တွေဝ ဝုတ္တံ၊ တသ္မာ န ဝတဗ္ဗံ ‘‘ပဉ္စဝိညာဏသမင်္ဂိဿ အတ္ထိ မဂ္ဂဘာဝနာ’’တိ. ယသ္မာ စေတ္ထ အယမေဝ အဓိပ္ပါယော၊ တသ္မာ သကဝါဒီ တံ လက္ခဏံ ပရဝါဒိံ သမ္ပဋိစ္ဆာပေတွာ နော စ ဝတ ရေ ဝတ္တဗ္ဗေ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ အာဟ.

အပရော နယော – ပဉ္စဝိညာဏာ ဥပ္ပန္နဝတ္ထုကာ၊ မဂ္ဂေါ အဝတ္ထုကောပိ ဟောတိ. တေ စ ဥပ္ပန္နာရမ္မဏာ၊ မဂ္ဂေါ နဝတ္တဗ္ဗာရမ္မဏော. တေ ပုရေဇာတဝတ္ထုကာဝ မဂ္ဂေါ အဝတ္ထုကောပိ. တေ ပုရေဇာတာရမ္မဏာ၊ မဂ္ဂေါ အပုရေဇာတာရမ္မဏော. တေ အဇ္ဈတ္တိကဝတ္ထုကာဝ မဂ္ဂေါ အဝတ္ထုကောပိ ဟောတိ. တေ စ ရူပါဒိဝသေန ဗာဟိရာရမ္မဏာ၊ မဂ္ဂေါ နိဗ္ဗာနာရမ္မဏော. တေ အနိရုဒ္ဓံ ဝတ္ထုံ နိဿယံ ကတွာ ပဝတ္တနတော အသမ္ဘိန္နဝတ္ထုကာ၊ မဂ္ဂေါ အဝတ္ထုကောပိ. တေ အနိရုဒ္ဓါနေဝ ရူပါဒီနိ အာရဗ္ဘ ပဝတ္တနတော အသမ္ဘိန္နာရမ္မဏာ၊ မဂ္ဂေါ နိဗ္ဗာနာရမ္မဏော. တေ နာနာဝတ္ထုကာ၊ မဂ္ဂေါ အဝတ္ထုကော ဝါ ဧကဝတ္ထုကော ဝါ. တေ နာနာရမ္မဏာ မဂ္ဂေါ ဧကာရမ္မဏော. တေ အတ္တနော အတ္တနောဝ ရူပါဒိဂေါစရေ ပဝတ္တနတော န အညမညဿ ဂေါစရဝိသယံ ပစ္စနုဘောန္တိ၊ မဂ္ဂေါ ရူပါဒီသု ဧကမ္ပိ ဂေါစရံ န ကရောတိ. တေ ကိရိယမနောဓာတုံ ပုရေစာရိကံ ကတွာ ဥပ္ပဇ္ဇနတော န အသမန္နာဟာရာ န အမနသိကာရာ ဥပ္ပဇ္ဇန္တိ၊ မဂ္ဂေါ နိရာဝဇ္ဇနောဝ. တေ သမ္ပဋိစ္ဆနာဒီဟိ ဝေါကိဏ္ဏာ ဥပ္ပဇ္ဇန္တိ၊ မဂ္ဂဿ ဝေါကာရောယေဝ နတ္ထိ. တေ အညမညံ ပုဗ္ဗစရိမဘာဝေန ဥပ္ပဇ္ဇန္တိ၊ မဂ္ဂဿ တေဟိ သဒ္ဓိံ ပုရိမပစ္ဆိမတာဝ နတ္ထိ၊ တေသံ အနုပ္ပတ္တိကာလေ တိက္ခဝိပဿနာသမယေ၊ တေသံ အနုပ္ပတ္တိဒေသေ အာရုပ္ပေပိ စ ဥပ္ပဇ္ဇနတော. တေ သမ္ပဋိစ္ဆနာဒီဟိ အန္တရိတတ္တာ န အညမညဿ သမနန္တရာ ဥပ္ပဇ္ဇန္တိ၊ မဂ္ဂဿ သမ္ပဋိစ္ဆနာဒီဟိ အန္တရိတဘာဝေါဝ နတ္ထိ. တေသံ အညတြ အဘိနိပါတာ အာဘောဂမတ္တမ္ပိ ကိစ္စံ နတ္ထိ၊ မဂ္ဂဿ ကိလေသသမုဂ္ဃါတနံ ကိစ္စန္တိ. ယသ္မာ စေတ္ထ အယမ္ပိ အဓိပ္ပါယော၊ တသ္မာ သကဝါဒီ ဣမေဟာကာရေဟိ ပရဝါဒိံ မဂ္ဂဿ အပဉ္စဝိညာဏဂတိကဘာဝံ သမ္ပဋိစ္ဆာပေတွာ နော စ ဝတ ရေ ဝတ္တဗ္ဗေ ပဉ္စဝိညာဏသမင်္ဂိဿ အတ္ထိ မဂ္ဂဘာဝနာတိ အာဟ.

၅၇၇. သုညတံ အာရဗ္ဘာတိ ‘‘ယထာ လောကုတ္တရမဂ္ဂေါ သုညတံ နိဗ္ဗာနံ အာရဗ္ဘ၊ လောကိယော သုဒ္ဓသင်္ခါရပုဉ္ဇံ အာရဗ္ဘ ဥပ္ပဇ္ဇတိ၊ ကိံ တေ ဧဝံ စက္ခုဝိညာဏ’’န္တိ ပုစ္ဆတိ. ဣတရော ‘‘စက္ခုဉ္စ ပဋိစ္စ ရူပေ စာ’’တိ ဝစနတော ပဋိက္ခိပတိ. ဒုတိယံ ပုဋ္ဌော ‘‘န နိမိတ္တဂ္ဂါဟီ’’တိ ဝစနတော ယံ တတ္ထ အနိမိတ္တံ၊ တဒေဝ သုညတန္တိ သန္ဓာယ ပဋိဇာနာတိ. စက္ခုဉ္စ ပဋိစ္စာတိ ပဉှဒွယေပိ ဧသေဝ နယော.

၅၇၈-၅၇၉. စက္ခုဝိညာဏံ အတီတာနာဂတံ အာရဗ္ဘာတိ ဧတ္ထ အယမဓိပ္ပါယော – မနောဝိညာဏသမင်္ဂိဿ အတ္ထိ မဂ္ဂဘာဝနာ၊ မနောဝိညာဏဉ္စ အတီတာနာဂတမ္ပိ အာရဗ္ဘ ဥပ္ပဇ္ဇတိ၊ ကိံ တေ ဧဝံ စက္ခုဝိညာဏမ္ပီတိ. ဖဿံ အာရဗ္ဘာတိအာဒီသုပိ ဧသေဝ နယော. စက္ခုနာ ရူပံ ဒိသွာ န နိမိတ္တဂ္ဂါဟီတိ ဧတ္ထ ဇဝနက္ခဏေ န နိမိတ္တဂ္ဂါဟိတာ ဝုတ္တာ၊ န စက္ခုဝိညာဏက္ခဏေ. တသ္မာ လောကိယမဂ္ဂမ္ပိ သန္ဓာယေတံ အသာဓကန္တိ.

ပဉ္စဝိညာဏသမင်္ဂိဿ မဂ္ဂကထာဝဏ္ဏနာ.