၁၁. အဝိညတ္တိ ဒုဿီလျန္တိကထာဝဏ္ဏနာ

၆၀၃-၆၀၄. ဣဒါနိ အဝိညတ္တိ ဒုဿီလျန္တိကထာ နာမ ဟောတိ. တတ္ထ စိတ္တဝိပ္ပယုတ္တံ အပုညူပစယဉ္စေဝ အာဏတ္တိယာ စ ပါဏာတိပါတာဒီသု အင်္ဂပါရိပူရိံ သန္ဓာယ ‘‘အဝိညတ္တိ ဒုဿီလျ’’န္တိ ယေသံ လဒ္ဓိ၊ သေယျထာပိ မဟာသံဃိကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘သစေ သာ ဒုဿီလျံ၊ ပါဏာတိပါတာဒီသု အညတရာ သိယာ’’တိ စောဒေတုံ ပါဏာတိပါတောတိအာဒိမာဟ. ပါပကမ္မံ သမာဒိယိတွာတိ ‘‘အသုကံ နာမ ဃာတေဿာမိ၊ အသုကံ ဘဏ္ဍံ အဝဟရိဿာမီ’’တိ ဧဝံ ပါပသမာဒါနံ ကတွာ. ဥဘော ဝဍ္ဎန္တီတိ ပုဋ္ဌော ဒါနက္ခဏေ ပါပဿ အနုပ္ပတ္တိံ သန္ဓာယ ပဋိက္ခိပတိ. ဒုတိယံ ပုဋ္ဌော စိတ္တဝိပ္ပယုတ္တံ ပါပူပစယံ သန္ဓာယ ပဋိဇာနာတိ. သေသမေတ္ထ ပရိဘောဂမယကထာယံ ဝုတ္တနယေနေဝ ဝေဒိတဗ္ဗံ. လဒ္ဓိပတိဋ္ဌာပနမ္ပိဿ ပါပသမာဒိန္နပုဗ္ဗဘာဂမေဝ သာဓေတိ၊ န အဝိညတ္တိယာ ဒုဿီလဘာဝန္တိ.

အဝိညတ္တိ ဒုဿီလျန္တိကထာဝဏ္ဏနာ.

ဒသမော ဝဂ္ဂေါ.

ဒုတိယပဏ္ဏာသကော သမတ္တော.