၂. အမတာရမ္မဏကထာဝဏ္ဏနာ

၅၄၉. ဣဒါနိ အမတာရမ္မဏကထာ နာမ ဟောတိ. တတ္ထ ယေသံ ‘‘နိဗ္ဗာနံ မညတီ’’တိအာဒီနံ အယောနိသော အတ္ထံ ဂဟေတွာ အမတာရမ္မဏံ သံယောဇနံ ဟောတီတိ လဒ္ဓိ၊ သေယျထာပိ ပုဗ္ဗသေလိယာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. အထ နံ သစေ အမတာရမ္မဏံ သံယောဇနံ၊ အမတဿ သံယောဇနိယာဒိဘာဝေါ အာပဇ္ဇတီတိ စောဒေတုံ အမတံ သံယောဇနိယန္တိအာဒိမာဟ. ဣတရော သုတ္တဝိရောဓဘယေန သဗ္ဗံ ပဋိက္ခိပတိ. ဣမိနာ ဥပါယေန သဗ္ဗဝါရေသု အတ္ထော ဝေဒိတဗ္ဗော. နိဗ္ဗာနံ နိဗ္ဗာနတောတိ အာဟဋသုတ္တံ ပန ဒိဋ္ဌဓမ္မနိဗ္ဗာနံ သန္ဓာယ ဘာသိတံ၊ တသ္မာ အသာဓကန္တိ.

အမတာရမ္မဏကထာဝဏ္ဏနာ.