၅. ရူပဓာတုကထာဝဏ္ဏနာ

၅၁၅-၅၁၆. ဣဒါနိ ရူပဓာတုကထာ နာမ ဟောတိ. တတ္ထ ‘‘ရူပိနော ဓမ္မာ ရူပဓာတု နာမာ’’တိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ရူပိနောတိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ သကဝါဒီ ယသ္မာ ရူပဓာတု နာမ ရူပဘဝေါ၊ န ရူပမတ္တမေဝ၊ တသ္မာ တေနတ္ထေန စောဒေတုံ ရူပဓာတူတိအာဒိမာဟ. တံ သဗ္ဗံ ကာမဂုဏကထာယံ ဝုတ္တနယေနေဝ ဝေဒိတဗ္ဗံ. သာဝ ကာမဓာတူတိ ပုဋ္ဌော ဘူမိပရိစ္ဆေဒေန ဝိရောဓံ ပဿမာနော ပဋိက္ခိပတိ. ပုန ဒဠှံ ကတွာ ပုဋ္ဌော အတ္တနော လဒ္ဓိဝသေန ပဋိဇာနာတိ. ဧဝံ သန္တေ ပန ဒွီဟိ ဘဝေဟိ သမန္နာဂတတာ အာပဇ္ဇတိ၊ တေန တံ သကဝါဒီ ကာမဘဝေန စာတိ အာဒိမာဟ. ဣတရော ဧကဿ ဒွီဟိ သမန္နာဂတာဘာဝတော ပဋိက္ခိပတီတိ.

ရူပဓာတုကထာဝဏ္ဏနာ.