၇. ပထဝီကမ္မဝိပါကောတိကထာဝဏ္ဏနာ

၄၉၂. ဣဒါနိ ပထဝီ ကမ္မဝိပါကောတိကထာ နာမ ဟောတိ. တတ္ထ ယသ္မာ ‘‘အတ္ထိ ဣဿရိယသံဝတ္တနိယံ ကမ္မံ၊ အာဓိပစ္စသံဝတ္တနိယံ ကမ္မ’’န္တိ ဧတ္ထ ဣဿရာနံ ဘာဝေါ ဣဿရိယံ နာမ၊ အဓိပတီနဉ္စ ဘာဝေါ အာဓိပစ္စံ နာမ၊ ပထဝိဿရိယအာဓိပစ္စသံဝတ္တနိကဉ္စ ကမ္မံ အတ္ထီတိ ဝုတ္တံ. တသ္မာ ယေသံ ‘‘ပထဝီ ကမ္မဝိပါကော’’တိ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပထဝီတိ ပုစ္ဆာ သကဝါဒိဿ၊ ပဋိညာ ဣတရဿ. သုခဝေဒနီယာတိအာဒိ ကမ္မဝိပါကသဘာဝဒဿနဝသေန ဝုတ္တံ. ‘‘ဖဿော ဟောတီ’’တိအာဒိနာ နယေန နိဒ္ဒိဋ္ဌေသု ဝိပါကေသု ဖဿော သုခဝေဒနီယာဒိဘေဒေါ ဟောတိ. သော စ သညာဒယော စ သုခဝေဒနာဒီဟိ သမ္ပယုတ္တာ၊ ဝေဒနာဒယော သညာဒီဟိ၊ သဗ္ဗေပိ သာရမ္မဏာ၊ အတ္ထိ စ နေသံ ပုရေစာရိကအာဝဋ္ဋနာဒိသင်္ခါတံ အာဝဇ္ဇနံ၊ ကမ္မပစ္စယဘူတာ စေတနာ၊ ယော တတ္ထ ဣဋ္ဌဝိပါကော၊ တဿ ပတ္ထနာ၊ ပဏိဓာနဝသေန ပဝတ္တာ မူလတဏှာ၊ ကိံ တေ ဧဝရူပါ ပထဝီတိ ပုစ္ဆတိ. ဣတရော ပဋိက္ခိပတိ. ပဋိလောမပုစ္ဆာဒီနိ ဥတ္တာနတ္ထာနေဝ.

၄၉၃. ကမ္မဝိပါကော ပရေသံ သာဓာရဏောတိ ပဉှေ ဖဿာဒယော သန္ဓာယ ပဋိက္ခိပတိ၊ ကမ္မသမုဋ္ဌာနံ ရူပဉ္စ ပထဝီအာဒီနံယေဝ စ သာဓာရဏဘာဝံ သန္ဓာယ ပဋိဇာနာတိ. အသာဓာရဏမညေသန္တိ သုတ္တံ ပရသမယတော အာဟရိတွာ ဒဿိတံ. သဗ္ဗေ သတ္တာ ပထဝိံ ပရိဘုဉ္ဇန္တီတိ ပဉှေ ပထဝိံ အနိဿိတေ သန္ဓာယ ပဋိက္ခိပတိ၊ နိဿိတေ သန္ဓာယ ပဋိဇာနာတိ. ပထဝိံ အပရိဘုဉ္ဇိတွာ ပရိနိဗ္ဗာယန္တီတိ ပဉှေ အာရုပ္ပေ ပရိနိဗ္ဗာယန္တာနံ ဝသေန ပဋိဇာနာတိ. ကမ္မဝိပါကံ အခေပေတွာတိ ဣဒံ ပရသမယဝသေန ဝုတ္တံ. ကမ္မဝိပါကဉှိ ခေပေတွာဝ ပရိနိဗ္ဗာယန္တီတိ တေသံ လဒ္ဓိ. သကသမယေ ပန ကတောကာသဿ ကမ္မဿ ဥပ္ပန္နံ ဝိပါကံ အခေပေတွာ ပရိနိဗ္ဗာနံ နတ္ထိ. တေသဉ္စ လဒ္ဓိယာ ပထဝီ သာဓာရဏဝိပါကတ္တာ ဥပ္ပန္နဝိပါကောယေဝ ဟောတိ. တံ ဝိပါကဘာဝေန ဌိတံ အခေပေတွာ ပရိနိဗ္ဗာနံ န ယုဇ္ဇတီတိ စောဒေတုံ ဝဋ္ဋတိ. ဣတရော လဒ္ဓိဝသေန ပဋိက္ခိပတိ. စက္ကဝတ္တိသတ္တဿ ကမ္မဝိပါကန္တိ ပဉှေ အသာဓာရဏံ ဖဿာဒိံ သန္ဓာယ ပဋိက္ခိပတိ၊ သာဓာရဏံ သန္ဓာယ ပဋိဇာနာတိ. ပထဝီသမုဒ္ဒသူရိယစန္ဒိမာဒယော ဟိ သဗ္ဗေသံ သာဓာရဏကမ္မဝိပါကောတိ တေသံ လဒ္ဓိ.

၄၉၄. ဣဿရိယသံဝတ္တနိယန္တိ ဧတ္ထ ဣဿရိယံ နာမ ဗဟုဓနတာ. အာဓိပစ္စံ နာမ သေသဇနေ အတ္တနော ဝသေ ဝတ္တေတွာ တေဟိ ဂရုကာတဗ္ဗဋ္ဌေန အဓိပတိဘာဝေါ. တတ္ထ ကမ္မံ ပဋိလာဘဝသေန တံသံဝတ္တနိကံ နာမ ဟောတိ၊ န ဇနကဝသေန. တသ္မာ ဝိပါကဘာဝေ အသာဓကမေတန္တိ.

ပထဝီ ကမ္မဝိပါကောတိကထာဝဏ္ဏနာ.