၅. ပရိဘောဂမယပုညကထာဝဏ္ဏနာ

၄၈၃. ဣဒါနိ ပရိဘောဂမယပုညကထာ နာမ ဟောတိ. တတ္ထ ‘‘တေသံ ဒိဝါ စ ရတ္တော စ၊ သဒါ ပုညံ ပဝဍ္ဎတီ’’တိ (သံ. နိ. ၁.၄၇) စ ‘‘ယဿ ဘိက္ခဝေ၊ ဘိက္ခု စီဝရံ ပရိဘုဉ္ဇမာနော’’တိ (အ. နိ. ၄.၅၁) စ ဧဝမာဒီနိ သုတ္တာနိ အယောနိသော ဂဟေတွာ ယေသံ ပရိဘောဂမယံ နာမ ပုညံ အတ္ထီ’’တိ လဒ္ဓိ၊ သေယျထာပိ ရာဇဂိရိကသိဒ္ဓတ္ထိကသမ္မိတိယာနံ၊ တေ သန္ဓာယ ပရိဘောဂမယန္တိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ ‘‘ပုညံ နာမ ဖဿာဒယော ကုသလာ ဓမ္မာ၊ န တတော ပရံ၊ တသ္မာ ဖဿာဒီဟိ တေ ဝဍ္ဎိတဗ္ဗ’’န္တိ စောဒေတုံ ပရိဘောဂမယော ဖဿောတိအာဒိ အာရဒ္ဓံ. တံ သဗ္ဗံ ဣတရေန တေသံ အဝဍ္ဎနတော ပဋိက္ခိတ္တံ. လတာဝိယာတိအာဒီနိ ‘‘ကိရိယာယ ဝါ ဘာဝနာယ ဝါ ဝိနာပိ ယထာ လတာဒီနိ သယမေဝ ဝဍ္ဎန္တိ၊ ကိံ တေ ဧဝံ ဝဍ္ဎန္တီ’’တိ စောဒနတ္ထံ ဝုတ္တာနိ. တထာ ပနဿ အဝဍ္ဎနတော န ဟေဝါတိ ပဋိက္ခိတ္တံ.

၄၈၄. န သမန္နာဟရတီတိ ပဉှေ ပဋိဂ္ဂါဟကာနံ ပရိဘောဂေန ပုရိမစေတနာ ဝဍ္ဎတိ၊ ဧဝံ တံ ဟောတိ ပုညန္တိ လဒ္ဓိဝသေန ပဋိဇာနာတိ. တတော အနာဝဋ္ဋေန္တဿာတိအာဒီဟိ ပုဋ္ဌော ဒါယကဿ စာဂစေတနံ သန္ဓာယ ပဋိက္ခိပတိ. တတ္ထ အနာဝဋ္ဋေန္တဿာတိ ဒါနစေတနာယ ပုရေစာရိကေန အာဝဇ္ဇနေန ဘဝင်္ဂံ အနာဝဋ္ဋေန္တဿ အပရိဝဋ္ဋေန္တဿ. အနာဘောဂဿာတိ နိရာဘောဂဿ. အသမန္နာဟရန္တဿာတိ န သမန္နာဟရန္တဿ. အာဝဇ္ဇနဉှိ ဘဝင်္ဂံ ဝိစ္ဆိန္ဒိတွာ အတ္တနော ဂတမဂ္ဂေ ဥပ္ပဇ္ဇမာနံ ဒါနစေတနံ သမန္နာဟရတိ နာမ. ဧဝံကိစ္စေန ဣမိနာ စိတ္တေန အသမန္နာဟရန္တဿ ပုညံ ဟောတီတိ ပုစ္ဆတိ. အမနသိကရောန္တဿာတိ မနံ အကရောန္တဿ. အာဝဇ္ဇနေန ဟိ တဒနန္တရံ ဥပ္ပဇ္ဇမာနံ မနံ ကရောတိ နာမ. ဧဝံ အကရောန္တဿာတိ အတ္ထော. ဥပယောဂဝစနသ္မိဉှိ ဧတံ ဘုမ္မံ. အစေတယန္တဿာတိ စေတနံ အနုပ္ပါဒေန္တဿ. အပတ္ထေန္တဿာတိ ပတ္ထနာသင်္ခါတံ ကုသလစ္ဆန္ဒံ အကရောန္တဿ. အပ္ပဏိဒဟန္တဿာတိ ဒါနစေတနာဝသေန စိတ္တံ အဋ္ဌပေန္တဿာတိ အတ္ထော. နနု အာဝဋ္ဋေန္တဿာတိ ဝါရေ အာဘောဂဿာတိ အာဘောဂဝတော. အထ ဝါ အာဘောဂါ အဿ၊ အာဘောဂဿ ဝါ အနန္တရံ တံ ပုညံ ဟောတီတိ အတ္ထော.

၄၈၅. ဒွိန္နံ ဖဿာနန္တိအာဒီသုပိ ဧကက္ခဏေ ဒါယကဿ ဒွိန္နံ ဖဿာဒီနံ အဘာဝါ ပဋိက္ခိပတိ၊ ဒါယကဿ စ ပရိဘုဉ္ဇန္တဿ စာတိ ဥဘိန္နံ ဖဿာဒယော သန္ဓာယ ပဋိဇာနာတိ. အပိစဿ ပဉ္စန္နံ ဝိညာဏာနံ သမောဓာနံ ဟောတီတိ လဒ္ဓိ၊ တဿာပိ ဝသေန ပဋိဇာနာတိ. အထ နံ သကဝါဒီ ပရိယာယဿ ဒွါရံပိဒဟိတွာ ဥဇုဝိပစ္စနီကဝသေန စောဒေတုံ ကုသလာဒိပဉှံ ပုစ္ဆတိ. တတြာပိ ကုသလာကုသလာနံ ဧကဿေကက္ခဏေ သမ္ပယောဂါဘာဝံ သန္ဓာယ ပဋိက္ခိပတိ. ပရိဘောဂမယံ ပန စိတ္တဝိပ္ပယုတ္တံ ဥပ္ပဇ္ဇတီတိ လဒ္ဓိယာ ပဋိဇာနာတိ. အထ နံ သကဝါဒီ သုတ္တေန နိဂ္ဂဏှာတိ.

၄၈၆. သုတ္တသာဓနေ အာရာမရောပကာဒီနံ အနုဿရဏပဋိသင်္ခရဏာဒိဝသေန အန္တရန္တရာ ဥပ္ပဇ္ဇမာနံ ပုညံ သန္ဓာယ သဒါ ပုညံ ပဝဍ္ဎတီတိ ဝုတ္တံ. အပ္ပမာဏော တဿ ပုညာဘိသန္ဒောတိ ဣဒံ အပ္ပမာဏဝိဟာရိနော ဒိန္နပစ္စယတ္တာ စ ‘‘ဧဝရူပေါ မေ စီဝရံ ပရိဘုဉ္ဇတီ’’တိ အနုမောဒနဝသေန စ ဝုတ္တံ. တံ သော ပရိဘောဂမယန္တိ သလ္လက္ခေတိ. ယသ္မာ ပန ပဋိဂ္ဂါဟကေန ပဋိဂ္ဂဟေတွာ အပရိဘုတ္တေပိ ဒေယျဓမ္မေ ပုညံ ဟောတိယေဝ၊ တသ္မာ သကဝါဒီဝါဒေါဝ ဗလဝါ၊ တတ္ထ ပဋိဂ္ဂါဟကေန ပဋိဂ္ဂဟိတေတိ အတ္ထော ဒဋ္ဌဗ္ဗော. သေသံ ဥတ္တာနတ္ထမေဝါတိ.

ပရိဘောဂမယပုညကထာဝဏ္ဏနာ.