၁၀. ဝိပါကော ဝိပါကဓမ္မဓမ္မောတိကထာဝဏ္ဏနာ

၅၀၁. ဣဒါနိ ဝိပါကော ဝိပါကဓမ္မဓမ္မောတိကထာ နာမ ဟောတိ. တတ္ထ ယသ္မာ ဝိပါကော ဝိပါကဿ အညမညာဒိပစ္စယဝသေန ပစ္စယော ဟောတိ၊ တသ္မာ ဝိပါကောပိ ဝိပါကဓမ္မဓမ္မောတိ ယေသံ လဒ္ဓိ၊ သေယျထာပိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. တဿ ဝိပါကောတိ တဿ ဝိပါကဓမ္မဓမ္မဿ ဝိပါကဿ ယော ဝိပါကော၊ သောပိ တေ ဝိပါကဓမ္မဓမ္မော ဟောတီတိ ပုစ္ဆတိ. ဣတရော အာယတိံ ဝိပါကဒါနာဘာဝံ သန္ဓာယ ပဋိက္ခိပတိ. ဒုတိယံ ပုဋ္ဌော တပ္ပစ္စယာပိ အညဿ ဝိပါကဿ ဥပ္ပတ္တိံ သန္ဓာယ ပဋိဇာနာတိ. ဧဝံ သန္တေ ပနဿ ကုသလာကုသလဿ ဝိယ တဿာပိ ဝိပါကဿ ဝိပါကော၊ တဿာပိ ဝိပါကောတိ ဝဋ္ဋာနုပစ္ဆေဒေါ အာပဇ္ဇတီတိ ပုဋ္ဌော သမယဝိရောဓဘယေန ပဋိက္ခိပတိ.

ဝိပါကောတိ ဝါတိအာဒိမှိ ဝစနသာဓနေ ပန ယဒိ ဝိပါကဿ ဝိပါကဓမ္မဓမ္မေန ဧကတ္ထတာ ဘဝေယျ၊ ကုသလာကုသလဗျာကတာနံ ဧကတ္ထတံ အာပဇ္ဇေယျာတိ ပဋိက္ခိပတိ. ဝိပါကော စ ဝိပါကဓမ္မဓမ္မော စာတိ ဧတ္ထ အယံ အဓိပ္ပါယော – သော ဟိ စတူသု ဝိပါကက္ခန္ဓေသု ဧကေကံ အညမညပစ္စယာဒီသု ပစ္စယဋ္ဌေန ဝိပါကဓမ္မဓမ္မတံ ပစ္စယုပ္ပန္နဋ္ဌေန စ ဝိပါကံ မညမာနော ‘‘ဝိပါကော ဝိပါကဓမ္မဓမ္မော’’တိ ပုဋ္ဌော အာမန္တာတိ ပဋိဇာနာတိ. အထ နံ သကဝါဒီ ‘‘ယသ္မာ တယာ ဧကက္ခဏေ စတူသု ခန္ဓေသု ဝိပါကော ဝိပါကဓမ္မဓမ္မောပိ အနုညာတော၊ တသ္မာ တေသံ သဟဂတာဒိဘာဝေါ အာပဇ္ဇတီ’’တိ စောဒေတုံ ဧဝမာဟ. ဣတရော ကုသလာကုသလသင်္ခါတံ ဝိပါကဓမ္မဓမ္မံ သန္ဓာယ ပဋိက္ခိပတိ. တညေဝ အကုသလန္တိ ယဒိ တေ ဝိပါကော ဝိပါကဓမ္မဓမ္မော၊ ယော အကုသလဝိပါကော၊ သော အကုသလံ အာပဇ္ဇတိ. ကသ္မာ? ဝိပါကဓမ္မဓမ္မေန ဧကတ္တာ. တညေဝ ကုသလန္တိအာဒီသုပိ ဧသေဝ နယော.

၅၀၂. အညမညပစ္စယာတိ ဣဒံ သဟဇာတာနံ ပစ္စယမတ္တဝသေန ဝုတ္တံ၊ တသ္မာ အသာဓကံ. မဟာဘူတာနမ္ပိ စ အညမညပစ္စယတာ ဝုတ္တာ၊ န စ တာနိ ဝိပါကာနိ၊ န စ ဝိပါကဓမ္မဓမ္မာနီတိ.

ဝိပါကော ဝိပါကဓမ္မဓမ္မောတိကထာဝဏ္ဏနာ.

သတ္တမော ဝဂ္ဂေါ.