၆. အာကာသကထာဝဏ္ဏနာ

၄၆၀-၄၆၂. ဣဒါနိ အာကာသကထာ နာမ ဟောတိ. တတ္ထ တိဝိဓော အာကာသော – ပရိစ္ဆေဒါကာသော၊ ကသိဏုဂ္ဃါဋိမာကာသော၊ အဇဋာကာသော. ‘‘တုစ္ဆာကာသော’’တိပိ တဿေဝ နာမံ. တေသု ပရိစ္ဆေဒါကာသော သင်္ခတော၊ ဣတရေ ဒွေ ပညတ္တိမတ္တာ. ယေသံ ပန ‘‘ဒုဝိဓောပိ ယသ္မာ သင်္ခတော န ဟောတိ၊ တသ္မာ အသင်္ခတော’’တိ လဒ္ဓိ၊ သေယျထာပိ ဥတ္တရာပထကာနံ မဟိသာသကာနဉ္စ၊ တေ သန္ဓာယ အာကာသောတိ ပုစ္ဆာ သကဝါဒိဿ၊ ပဋိညာ ဣတရဿ. သေသမေတ္ထ ဥတ္တာနတ္ထမေဝါတိ.

အာကာသကထာဝဏ္ဏနာ.