၆. သမ္မုတိဉာဏကထာဝဏ္ဏနာ

၄၃၄-၄၃၅. ဣဒါနိ သမ္မုတိဉာဏကထာ နာမ ဟောတိ. တတ္ထ သမ္မုတိသစ္စံ ပရမတ္ထသစ္စန္တိ ဒွေ သစ္စာနိ. ယေ ပန ဧဝံ ဝိဘာဂံ အကတွာ သစ္စန္တိ ဝစနသာမညေန သမ္မုတိဉာဏမ္ပိ ‘‘သစ္စာရမ္မဏမေဝါ’’တိ ဝဒန္တိ၊ သေယျထာပိ အန္ဓကာ၊ တေ အယုတ္တဝါဒိနောတိ တေသံ ဝါဒဝိသောဓနတ္ထံ အယံ ကထာ အာရဒ္ဓါ. တတ္ထ န ဝတ္တဗ္ဗန္တိ ပုစ္ဆာ ပရဝါဒိဿ၊ ပရမတ္ထသစ္စံ သန္ဓာယ ပဋိညာ သကဝါဒိဿ. သမ္မုတိသစ္စမှီတိ သမ္မုတိံ အနုပဝိဋ္ဌေ သစ္စမှိ. ပစ္စတ္တေ ဝါ ဘုမ္မဝစနံ၊ သမ္မုတိသစ္စန္တိ အတ္ထော. သမ္မုတိဉာဏံ သစ္စာရမ္မဏညေဝါတိ ပုစ္ဆာ သကဝါဒိဿ၊ ပဋိညာ ဣတရဿ. တတော နံ ‘‘ယဒိ တံ အဝိသေသေန သစ္စာရမ္မဏညေဝ၊ တေန ဉာဏေန ဒုက္ခပရိညာဒီနိ ကရေယျာ’’တိ စောဒေတုံ တေန ဉာဏေနာတိအာဒိမာဟ.

သမ္မုတိဉာဏကထာဝဏ္ဏနာ.