၃. အနာသဝကထာဝဏ္ဏနာ

၃၉၁. ဣဒါနိ အနာသဝကထာ နာမ ဟောတိ. တတ္ထ ယေ ဓမ္မာ အနာသဝဿ အရဟတော၊ သဗ္ဗေ တေ အနာသဝါတိ ယေသံ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ အရဟတောတိ ပုစ္ဆာ သကဝါဒိဿ၊ ပဋိညာ ဣတရဿ. အထ နံ အနာသဝါ နာမ မဂ္ဂါဒယော၊ ကိံ တဿ တေယေဝ ဥပ္ပဇ္ဇန္တီတိ စောဒနတ္ထံ မဂ္ဂေါ ဖလန္တိအာဒိ အာရဒ္ဓံ. စက္ခု အနာသဝန္တိ ပုဋ္ဌော တဿ သာသဝတ္တာ ပဋိက္ခိပတိ. ဒုတိယံ ပုဋ္ဌော အနာသဝဿေတန္တိ ပဋိဇာနာတိ.

၃၉၂. စီဝရပဉှေ ဧကောဝ ဓမ္မော အနာသဝေါ သာသဝေါ စ ဟောတီတိ လက္ခဏဝိရောဓဘယာ ပဋိက္ခိပတိ. ဒုတိယံ ပုဋ္ဌော အနာသဝဿ ဟုတွာ သာသဝဿ ဟောတီတိ ပဋိဇာနာတိ. တညေဝ အနာသဝန္တိ ပဉှာဒွယေပိ ဧသေဝ နယော. သကဝါဒီ ပန တညေဝါတိ အနုညာတတ္တာ ‘‘မဂ္ဂေါ အနာသဝေါ ဟုတွာ’’တိအာဒီဟိ စောဒေတိ. ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗောတိ.

အနာသဝကထာဝဏ္ဏနာ.