၁. ဂိဟိဿ အရဟာတိကထာဝဏ္ဏနာ

၃၈၇. ဣဒါနိ ဂိဟိဿ အရဟာတိ ကထာ နာမ ဟောတိ. တတ္ထ ယေသံ ယသကုလပုတ္တာဒီနံ ဂိဟိဗျဉ္ဇနေ ဌိတာနံ အရဟတ္တပ္ပတ္တိံ ဒိသွာ ‘‘ဂိဟိ အဿ အရဟာ’’တိ လဒ္ဓိ၊ သေယျထာပိ ဧတရဟိ ဥတ္တရာပထကာနံ၊ တေ သန္ဓာယ ပုစ္ဆာ သကဝါဒိဿ. တတ္ထ ဂိဟိဿာတိ ယော ဂိဟိသံယောဇနသမ္ပယုတ္တတာယ ဂိဟိ၊ သော အရဟံ အဿာတိ အတ္ထော. ပရဝါဒီ ပန အဓိပ္ပါယံ အသလ္လက္ခေတွာ ဂိဟိဗျဉ္ဇနမတ္တမေဝ ပဿန္တော ပဋိဇာနာတိ. ဣဒါနိဿ ‘‘ဂိဟိ နာမ ဂိဟိသံယောဇနေန ဟောတိ၊ န ဗျဉ္ဇနမတ္တေန. ယထာဟ ဘဂဝါ –

‘အလင်္ကတော စေပိ သမံ စရေယျ၊

သန္တော ဒန္တော နိယတော ဗြဟ္မစာရီ၊

သဗ္ဗေသု ဘူတေသု နိဓာယ ဒဏ္ဍံ၊

သော ဗြာဟ္မဏော သော သမဏော သ ဘိက္ခူ’’’တိ. (ဓ. ပ. ၁၄၂)၊

ဣမံ နယံ ဒဿေတုံ အတ္ထိ အရဟတောတိအာဒိ အာရဒ္ဓံ. တံ သဗ္ဗံ ဥတ္တာနတ္ထမေဝါတိ.

ဂိဟိဿ အရဟာတိကထာဝဏ္ဏနာ.