၉. ယထာကမ္မူပဂတဉာဏကထာဝဏ္ဏနာ

၃၇၇. ဣဒါနိ ယထာကမ္မူပဂတဉာဏကထာ နာမ ဟောတိ. တတ္ထ ယေသံ ‘‘ဣတိ ဒိဗ္ဗေန စက္ခုနာ ဝိသုဒ္ဓေန။ပေ။ ယထာကမ္မူပဂေ သတ္တေ ပဇာနာတီ’’တိ (ဒီ. နိ. ၁.၂၄၆၊ ပဋိ. မ. ၁.၁၀၆) သုတ္တံ အယောနိသော ဂဟေတွာ ယထာကမ္မူပဂတဉာဏမေဝ ဒိဗ္ဗစက္ခုန္တိ လဒ္ဓိ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. ပုန ယထာကမ္မူပဂတဉ္စ မနသိ ကရောတီတိ ပုဋ္ဌော ဧကစိတ္တဿ အာရမ္မဏဒွယာဘာဝါ ပဋိက္ခိပတိ. ဒုတိယံ ပုဋ္ဌော နာနာစိတ္တဝသေန ပဋိဇာနာတိ. ပုန လေသောကာသံ အဒတွာ ဒွိန္နံ ဖဿာနန္တိ ပုဋ္ဌော ပဋိက္ခိပတိ. ဣတိ ယထာ ဣမိနာ ယထာကမ္မူပဂတပဒေန၊ ဧဝမေဝ ဣမေ ဝတ ဘောန္တော၊ သတ္တာတိအာဒိပဒေဟိပိ သဒ္ဓိံ ယောဇနာသု အတ္ထော ဝေဒိတဗ္ဗော.

၃၇၈. အာယသ္မာ သာရိပုတ္တော ယထာကမ္မူပဂတံ ဉာဏံ ဇာနာတီတိ ဣဒံ သကဝါဒီ ယသ္မာ ထေရော အပ္ပိစ္ဆတာယ အဘိညာဉာဏာနိ န ဝဠဉ္ဇေတီတိ ဧကစ္စေ န ဇာနန္တိ၊ တာနိ ပနဿ နေဝ အတ္ထီတိ မညန္တိ၊ တသ္မာ တံ ‘‘ဒိဗ္ဗစက္ခုနော အလာဘီ ထေရော’’တိ မညမာနံ ပုစ္ဆတိ. တေနေဝ ကာရဏေန ‘‘အတ္ထာယသ္မတော သာရိပုတ္တဿ ဒိဗ္ဗစက္ခူ’’တိ ပရတော ပုဋ္ဌော ပဋိက္ခိပတိ. ဒုတိယံ ပုဋ္ဌော ယံကိဉ္စိ သာဝကေန ပတ္တဗ္ဗံ၊ သဗ္ဗံ တံ ထေရေန အနုပ္ပတ္တန္တိ ပဋိဇာနာတိ. ဣဒါနိဿ ဝိက္ခေပံ ကရောန္တော သကဝါဒီ နနု အာယသ္မာ သာရိပုတ္တောတိအာဒိမာဟ. ဣမဉှိ ဂါထံ ထေရော ဝဠဉ္ဇနပဏိဓိယာ ဧဝ အဘာဝေန အာဟ၊ န အဘိညာဉာဏဿ အဘာဝေန. ပရဝါဒီ ပန အဘာဝေနေဝါတိ အတ္ထံ သလ္လက္ခေတိ. တသ္မာ တဿ လဒ္ဓိယာ ထေရဿ ယထာကမ္မူပဂတဉာဏမေဝ အတ္ထိ၊ နော ဒိဗ္ဗစက္ခု. တေန ဝုတ္တံ ‘‘တေန ဟိ န ဝတ္တဗ္ဗံ ယထာကမ္မူပဂတဉာဏံ ဒိဗ္ဗစက္ခူ’’တိ.

ယထာကမ္မူပဂတဉာဏကထာဝဏ္ဏနာ.